PINAINTALANG 2
2
Bilin posoboyon ra pasimpungan ulun Kristian ra bandar Ipisus
1“Tulisi' koson ragitio ra malaikat ru pasimpungan ulun Kristian ra bandar Ipisus:
Gitio noyo bilin intor Riso ondo' mampaguut ra tulu' butitin ra kalindu' pamiris Nano, ondo' mugar ra tatanga' ru tulu' tampakan ra lampung mas. 2Nakapandai Aku atan noyo binaal mino; nakapandai Aku ra mumpara' boo pirot min mangandoi am ati koson ra akau tumaan paat imboloon. Nakapandai Aku ra kalo mangapu kau ra ulun malaat. Am kininaman min noyo ilo ondo' migiangku ra rasul saboi napandayan min ilo ti ra maabau-abau. 3Kataan guang mino ra akau imboloon sabap ra Aku am kalo lumugut kau. 4Kaa' gitio kalo kaansayan Kuno ramuyun; raino kalo boo nai motogom kau Raki' koson ra talimpuun i. 5Karaa' noyo ra kalo boo motogom kau! Talikur kano intor ra tula mino am baalo' noyo atan ondo' binaal min ra talimpuun i. Amon ru kalo tumalikur kau, matong Aku ramuyun am mangiru' ra tampakan ra lampung mino. 6Kaa' mokoondo' kaansayan Ku ramuyun, ioginio; masisang kau ra atan binaal ru maamaya' ri Nikolaus, ondo' kasisangin Ku niayuk.
7 “Rongogo' am karaa' noyo atan kon ru Ambiluo ri Aki Kapuuno' ra pasimpungan ulun Kristian no!
Osoi ayuk mangala ra kuasa' ru kalaatan paakanon Ku io ra kawa' intor ra puun ru mampakaayag ondo' tumuu' ra Pirdaus.”
Bilin tinaakan ra pasimpungan ulun Kristian ra bandar Simirna
8 “Tulisi' koson ragitio ra malaikat ru pasimpungan ulun Kristian ra bandar Simirna:
Gitio noyo bilin intor Riso ondo' talimpuun am pupus, ondo' minatoi am naayag saguli'. 9Nakapandai Aku ra kapaganan mino; nakapandai Aku ra musikin kau, kaa' sotopot no langkaya' kau ra pangintapatan! Nakapandai Aku ra inuwan kau ru ulun migiangku ra ulun ru Jaudi, ondo' sotopot no sala' ka Jaudi; ilo ti maamaya' ru Tingganai ru riwato! 10Pai' kano kalaa' ra kaimbalaan ondo' malimanan min ra maagu no. Karaa'! Tingganai ru riwato no mangkinam ramuyun. Mangkinibit io ra kukula' intor ramuyun pasubolon ra pangaputan am mopor ngoorou buoi ru kapaganan mino. Gagaya' ayuk toojo Raki' saboi ra potoyon kau pana, am aniin takamin ra kaayagan mantilayun koson ra ampos ru kamanangan mino.
11 “Rongogo' am karaa' noyo atan kon ru Ambiluo ri Aki Kapuuno' ra pasimpungan ulun Kristian no!
“Osoi ayuk mangala ra kuasa' ru kalaatan kalo makaliman ra kapatayan karuo.”
Bilin posoboyon ra pasimpungan ulun Kristian ra bandar Pirgamum
12“Tulisi' koson ragitio ra malaikat ru pasimpungan ulun Kristian ra bandar Pirgamum:
“Gitio noyo bilin intor Riso ondo' makailang ruo larom. 13Makapandai Aku ati inayanan mino. Ioginio giu' ra panguasaan ru Tingganai ru riwato no. Nangintopot kau toojo Raki' am kalo inali' min Aku kabalu' pana i Antipas, sasi' Kuno ondo' malansanan, pinatoi ra saang min, giu' ra nanguasaan ru Tingganai ru riwato i. 14 Kaa' mokoondo' kalo kaansayan Kuno ramuyun; mokoondo' kukula' ramuyun minaya' ra pangilaan ri Biliam. Sabap ra nangila' i Biliam ri Balak ra mangkinibit ra ulun ru Israil mambaal ra tula, koson mangkinibit risilo mangakan ra akanon ondo' pinataak ra sinungkalalaing am inila' ra mansasawa'. 15Koson niayuk ra kukula' intor ramuyun no ondo' minaya' ra pangilaan ri Nikolaus. 16Sabap raginio, talikur kano intor ra tula mino! Amon ru kalo tumalikur kau, matong Aku ramuyun ra mataki' am tumula' ra ulun-ulun ra ilang ondo' mingkual ra kabang Kuno.
17 “Rongogo' am karaa' noyo atan kon ru Ambiluo ri Aki Kapuuno' ra pasimpungan ulun Kristian no!
“Osoi mangala ra kuasa' ru kalaatan, aniin Ku io ra ruti' ondo' nakasibuni no – ondo' sabiton ra manna. Mangani' Aku niayuk riso ra rondo' batu mapulak ondo' tinulisan ra inggalan nakabagu ondo' kalo mauligan ru ulun bokon kaa' ulun mangapu no ayuk.”
Bilin posoboyon ra pasimpungan ulun Kristian ra bandar Tiatira
18“Tulisi' koson ragitio ra malaikat ru pasimpungan ulun Kristian ra bandar Tiatira:
“Gitio noyo bilin intor ra Anak ri Aki Kapuuno', ondo' mato Nano mapaang koson ra apui am kalayam Nano makabinusasal koson ra gangsa' ondo' manguliat. 19Nakapandai Aku ra atan binaal mino, togom mino, gagaya' mino, kandoi mino am kaaratan mino ra akau imboloon. Nakapandai Aku ra raino kandoi mino moonsoi poyo ka ragili. 20 Kaa' mokoondo' kalo kaansayan Kuno ramuyun: Mompoloso kau ri Ijabil, ruandu' no ondo' migiangku ra nabi. Mansail ra pangilaan nano mampakalayau io ra ulipon-ulipon Kuno koson mansasawa' am mangakan ra akanon ondo' pinataak ra sinungkalalaing. 21Nangani' Aku noyo riso ra kaluagan tumalikur intor ra tula nano, kaa' marara' io tumalikur intor ra pansasawaan nano. 22Ginio boo ra rualin Ku io mababaya' ra ulun ondo' nansasawa' riso am imboloon ilo ra makalalaa'. Saukon Ku noyo gitio raino ru kalo tumalikur ilo intor ra tula nilo. 23 Potoyon Ku niayuk maamaya' nano, am ngaangai' boo ru pasimpungan ulun Kristian makatutun ra Aku noyo Io ondo' makapandai ra pangkaraan am guang ru sasangulun. Balasin takamin maya' ra binaal mino sigagama'.
24“Kaa' akau ondo' bokon no ra bandar Tiatira, ondo' kalo minaya' ra pangilaan malaat no am kalo mila' ra kapandayan ru Tingganai ru riwato, balain takamin: kalo boo ruangin Ku kapaganan maagat min. 25Kaa' guuto' min noyo pangintapatan mino Raki' saboi ra Aku matong.
26-27 “Osoi ayuk mangala ra kuasa' ru kalaatan am kalo lumonggo' mambaal ra kasagaan Kuno saboi ra pupus no, aniin Ku ilo ra kuasa' mogondo' ra tinaakan Raki' ru Ama' Kuno. Aniin Ku ilo ra kuasa' mamarinta ra ulun ru tana' ti ra kalo makaasi', am mampalunsai ilo risilo koson ra pagangan tana' pipilangon. 28Makapangani' Aku niayuk risilo ra butitin ru sirangon.
29“Rongogo' am karaa' noyo atan kon ru Ambiluo ri Aki Kapuuno' ra pasimpungan ulun Kristian no!”
Currently Selected:
PINAINTALANG 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.