IBRANI 13
13
Ati kulaan mapabansuk ra guang ri Aki Kapuuno'
1Pontotogom kano ra rondo' am bokon ra mabubukat takau ralalom ri Kristus. 2 Pai' kano karara' tambuluyon ru ulun ondo' kalo nauligan min. Mokoondo' tinambului koson raginio am kalo nakatutun ilo ra sotopot no malaikat tambului nilai i. 3Indangano' noyo pabukat min ra Kristian ondo' inaput no, am limani' min koson ra akau pana inaput mabaya' risilo. Am poyo karaa' min niayuk ilo ondo' imboloon, koson ra akau pana imboloon mabaya' risilo.
4Kaulayan ru paguatan musiti' no urumaton ru ngaangai' ulun, ra moonong ralaki kapoam andu' kalo iowon sumimpung ra bokon. Sabap ra ulun ondo' lumapau kapoam mansawa' pana, ukumin ri Aki Kapuuno'. 5 Pai' noyo pagingkaut ayuk ra ruit, kaa' karaan min ayuk ra sama' noyo atan ondo' soroi ramuyun no. Sabap ra minindagu noyo i Aki Kapuuno', “Kalo noyo toojo polosoon kapoam iruanin takamin.” 6 Intor raginio makakau' takau mindagu ra,
“Tuhan noyo mangingindangan kuno,
ginio ra kalo noyo malaa' aku.
Kolondo' noyo maalap kabaal raki' ru ulun.”
7Karaa' noyo tingganai min ondo' nampasaboi ramuyun ra bala' ri Aki Kapuuno', ra ati kulaan kiralan am ampos ru kaayagan nilai, am tilu kano risilo. 8I Jisus Kristus kalo makulau, intor ra galing i, raino am ra sabuoi-buoi no. 9Pai' kano karuung ra nansalinut pangilaan ondo' mampakalayau, kaa' musiti' mangapu takau ra kataawan ri Aki Kapuuno', maa' raginio kaikangon guang takau Riso. Pai' takano boo baya' ra kaulayan intor ra atan kia maakan kapoam kalo, sabap raginio kalo noyo nakapangindangan risilo ondo' sumugut raginio.
10Imam-imam Jaudi ondo' mangandoi ra Kim Sambayangan, kalo makaaya' ritakau mampataak ra taak simbalui koson paringkuanangan ra sambayangan takau. 11 Raraa' ru bibiag ondo' alapon ra taak simbalui koson mangampun ra tula ibiton ru Tingganai Maayo Imam giu' ra Intok Matulai Kaga'. Kaa' baangkai ru bibiag no solobon patiri' ra liwar ru kim. 12Ginio nai i Jisus pana minatoi giu' ra liwar ru bandar i, maa' raginio, mansail ra raraa' Nano galama' ondo' pinasasar makapamasau Io ra ulun intor ra tula. 13Sabap raginio, ongoi takano Riso giu' ra liwar ru bandar, kabalu' pana tauyuon takau mabaya' Riso. 14Sabap ra giti ra tana' ti itakau kolondo' pagun randanan, kaa' sotopot no maguyum takau poyo ra randanan ondo' matong no. 15Ginio ra ralalom inggalan ri Jisus, kasalok takano pongompor ri Aki Kapuuno'; gitio noyo koson ra taak simbalui koson paringkuanangan ondo' mangiou ra Io no Tuhan takau. 16Pai' kano pakalilian mambaal ra moonsoi am mangindangan ra rondo' am bokon, sabap raginio noyo koson ra taak simbalui ondo' mapabansuk ra guang ri Aki Kapuuno'.
17Gagaya' kano ra tingganai mino am niayuk urumato' min ilo. Sabap ra ilo ti noyo linansanan ri Aki Kapuuno' magalung ra pangintapatan min. Amon ru gumagaya' kau risilo, makapangandoi ilo ra guang maansukan, kaa' amon ru kalo, maagat boo guang nilo am kolondo' onong ru ginio ramuyun.
18Kasalok kano pakiasi' ri Aki Kapuuno' ramon. Mangintopot akai ra bolos ru guang mai no mapasau, sabap ra mirot akai mambaal ra motopot ra ngaangai' baal. 19Am maminson aku poyo ramuyun koson kiasii' min aku toojo ri Aki Kapuuno', maa' raginio poongoyon aku boo ri Aki Kapuuno' ramuyun ra mataki'.
Pakiasian ra pupus
20I Aki Kapuuno', ondo' puun ru pabansayan, namayag noyo saguli' ra Tuhan takau i Jisus intor ra kapatayan. I Jisus noyo koson ra Magagalung Maayo takau domba Nano. Pinatayan Nano noyo ondo' nangaru' Io ritakau ra nabantuan mantilayun. 21Gama' ru mangani' Io ramuyun ra moonong baal moonsoi, koson makapambaal kau ra kasagaan Nano. Gama' ru ralalom ri Jisus Kristus noyo, mampasauk Io ra kasagaan Nano ralalom kaayagan takau. Musiti' takau mongompor ri Kristus ra sabuoi-buoi no! Amin.
Ragu pupus
22Pabukat kau ngai' ra Kristian, maminson aku po ra posoroto' min noyo pambalaan kutu ra guang pantataan, sabap ra surat kutu ragitio kalo kukula' maawar. 23Mambala' aku ramuyun ra pabukat takau i Timotius pinaingkual noyo intor ra lamin pangaputan. Amon ru mataki' io matong ragiti, paayaan ku io mongoi uma' ramuyun.
24Posoboyo' min noyo bilin kaansayan mai ra tingganai mino am poyo ra ngaangai' ulun ri Aki Kapuuno'. Pabukat ra Kristian intor ra Itali pana mampasaboi ramuyun ra bilin kaansayan nilai. 25Gama' ru i Aki Kapuuno' mambarakat ramuyun ngaangai'.
Currently Selected:
IBRANI 13: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.