IBRANI 12
12
I Aki Kapuuno', Ama' takau
1Ngaangai' sasi' ra raitii' ni makakito ritakau; intor raginio tatango' takano ngaangai' ondo' mongompong ritakau am niayuk tula ondo' masalok mumbir ritakau, am pirot takano baya' ra pasimbulan ondo' inaru' ri Aki Kapuuno' ritakau. 2Guango' takano toojo i Jisus, sabap ra Io noyo intaran am mampakatanda' ra pangintapatan takau. Tinaanan No ayuk kauyuan paat ra Io sinalip, sabap ra nangkara' Io ayuk ra kaansukan ondo' apuon No ra tauli no. Raino ti manturung Io ra tampilon pamiris ru takhta ri Aki Kapuuno'.
3Guango' min noyo ati koson Io inimbolo' am kasisangin ru ulun makatula, maa' raginio kalo lumawo kau saboi mangkaus. 4Ra akau mantutula' ra kuasa' ru tula, kalo poyo igondo' sangulun intor ramuyun giminula' suku' potoyon. 5 “Nakalilian kano kia ra bala' ri Aki Kapuuno' ra Io minindagu ramuyun koson ra anak Nano? Kon Nano:
Anak Ku, guango' min ra akau loposon am ilaan ru Tuhan,
am pai' pangkaus amon ru mansawai Io ramuyun.
6Sabap ra moonong ulun tagamin Nano
loposon am ilaan No poyo,
am mampakaruol Io niayuk ra moonong ulun
ondo' sabiton No ra anak Nano.”
7Musiti' min tataani' ayuk ra akau loposon am ilaan ri Aki Kapuuno', sabap ra akau ti sabiton No ra anak. Maaru' noyo ra moonong anak loposon am ilaan niayuk ru ama' nano. 8Amon ru kalo loposon am ilaan kau mabaya' ra ngaangai' ondo' sabiton No ra anak, arati' no akau ti sala' ka anak Nano galama', kaa' koson kau ayuk ra anak sawa'. 9Itakau sigagama' makaama' ra tana' ti ondo' mampalapos am mangila' ritakau am mangurumat takau risilo. Amon ru ginio noyo, sotopot no musiti' takau mangurumat ri Aki Kapuuno' giu' ra suruga', maa' raginio maayag takau ra mantilayun. 10Lapos am ila' ru ama' takano ondo' maya' ra pamaguangan nilo moonsoi, sotopot no kalo mantilayun; kaa' lapos am ila' ri Aki Kapuuno' inatang No ritakau, maa' raginio kolondo' boo tula takau mogondo' Riso. 11Paat ra itakau loposon am ilaan koson raginio, mangiluk guang takau am sala' ka maansukan. Kaa' tauli no ilo ondo' loposon am ilaan ri Aki Kapuuno' koson raginio mokoowot ra kaansayan am masauk ra ulun ra motopot.
Panuluan am pansawayan
12 Kaikango' noyo rondo' am bokon koson ra kalindu' malami' kapoam atur monontol kaikangon. 13 Parayus kano baya' ra ralan mabanis am pangindangan ra bokon, koson ra ulun pakira' no kalo masilik, kaa' mapali' boo.
14Gogot kano pobonsoi ra ngaangai' ulun am poyo kaayag kano ra mapasau, sabap ra kolondo' sangulun pana makakito ra Tuhan, amon ru kalo maya' io raginio. 15 Ilalai' noyo ra kolondo' sangulun pana tumalikur ra kataawan ri Aki Kapuuno', maa' raginio kolondo' sangulun pana mantipagon ra bokon mogondo' ra tutuu' makatuwo ondo' makaanit ra ulun. 16 Ilalai' noyo ra kolondo' sangulun mansawa' kapoam tumilu ri Isau ondo' kalo nangurumat ri Aki Kapuuno' ragili. Tayar tungkuson nali koson ra anak katuaan inaligan no ra samangkuk akanon ayuk. 17 Napandayan min ra tauli i, nakibarakat niayuk i Isau ra ama' nali, kaa' kalo binarakat io, kabalu' pana nangkinam io pangulau ra binaal nali saboi nantangi', kaa' kalo niayuk naalap no.
18Akau sala' ka koson ra ulun ru Israil ra galing i. Ilo nakainggaar ra gunung Sinai ondo' makambong ru ulun, makaapui nanimbula', makakalandaman am poyo bagiu' mapuor ondo' nalimanan nilo. 19 Am nakaining ilo ra bolos ru bujung am poyo ragu ra mapuor, saboi ra palanggain nilo boo. 20 Sabap ra kalo tumaan ilo mangkirongog ra panusuban Nano ra Io minindagu, “Amon ru sanginan bibiag ayuk pana manginjang ra gunung ti, musiti' io bobolon ra batu saboi matoi.” 21 Ngaangai' ru ginio makalalaa' toojo, saboi i Musa pana minindagu ra: “Nonontol aku ra laa'!”
22Kaa' sotopot no nakainggaar kau ra Bulur Sion am bandar ri Aki Kapuuno' ondo' maayag no, ioginio Jirusalim am poyo riribu malaikat giu' ra suruga'. 23Nakasaang kau noyo ra bunsag maayo mabaya' ra anak-anak katuaan ri Aki Kapuuno', ondo' inggalan nilono tinulisan noyo giu' ra suruga'. Mininggaar kau ri Aki Kapuuno' ondo' mangakim ra ngaangai' ulun, am poyo ra ambiluo-ambiluo ru ulun motopot ondo' tinanda' ri Aki Kapuuno'. 24 Mininggaar kau ri Jisus ondo' nampasauk ra nabantuan nakabagu ti, am pinatayan Nali magibit ritakau mobonsoi ri Aki Kapuuno', sala' ka koson ra pinatayan ri Abil ra galing i ondo' makimambalos.
25 Ilalai' noyo ra kasalok kano mangkirongog Riso ondo' mindagu. Sabap ra ilo ondo' kalo nangkirongog Riso ondo' nampasaboi ra bala' ri Aki Kapuuno' ra tana' ti, kalo noyo nakapagiru' ilo. Mulu' piboo ritakau, ra kalo makapagiru' takau amon ru kalo mangkirongog Riso ondo' minindagu intor ra suruga'. 26 Paat ragili, bolos Nano nanguyog ra tana' ti, kaa' raino mokoondo' poyo bantu' Nano ra: “Igondo' poyo uyogon Ku tana' ti, am sala' ka ginio ayuk, kaa' limbowon poyo.” 27Ragu ra “Igondo' poyo” ti mampaintutun ra ngaangai' ondo' sinauk Nano ra tana' ti, uyogon am kulawon, maa' raginio baal ru suruga' ondo' kalo mauyog ayuk boo tumilayun.
28Intor raginio, paringkuanang takano ri Aki Kapuuno', sabap ra inanian takau ra rondo' pagun ondo' kalo maalap kauyog. Pongompor am samba takano Riso maya' ra kasagaan Nano, ioginio mabaya' ra urumat am inggana' ru guang. 29 Sabap ri Aki Kapuuno' takau mangukum ra pantula' Nano mogondo' ra apui ondo' mangumpo.
Currently Selected:
IBRANI 12: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.