RINALATAN 27
27
Nasundoi i Paulus ra Roma
1Kopongo ilo nangaru' ra poongoyon akai ra pagun ru Itali, i Paulus am kukula' ngaulun ondo' inaput no pinaalungan ri Julius. Io ti sangulun tingganai ru saujor Roma intor ra tayar ondo' sabiton ra “Rejimen ru Kaisar”. 2Siminakoi akai ra kapal intor ra Adramitium, ondo' nakatampos mongoi ra intok raralan ru kapal ra pagun ru Asia. I Aristarkus, ulun ru Tisalonika intor ra pagun ru Makidonia, minaya' ramon. 3Iosuabon, nakasuku' akai ra Sidon. Moonsoi pamakuan ri Julius no ri Paulus. Nangiou io riso muma' ra rangan nano ondo' masaga' mangani' riso ra atan ayuk kolondo' riso. 4Tungguli' mai poyo pangkiralanan, kaa' nakauma' akai ra bagiu' mapuor, ginio ra nasundoi akai nansusug ra pulu' Siprus, koson kalo matiu' ra bagiu' no. 5Pakasandaup akai ra raat ra tuma' ru pagun Kilikia am Pampilia, nakasaboi akai poyo ra bandar Mira, giu' ra pagun Likia. 6Giu' i, natuum ru tingganai ru saujor no rondo' kapal intor ra Aliksandria ondo' masundoi mongoi ra Itali. Ginio ra pabandingo' no akai ra kapal raginio.
7Kaa' kukula' ngoorou maginut ayuk ugar ru kapal sinakayan maili sabap ra inayat ru bagiu' i. Pupus nali maar akai no makasuku' ra bandar Knidus. Sabap ra lakat ayuk poyo mapuor bagiu' i, kalo niayuk nakarayus akai. Intor raginio, pantabas akai ayuk boo mongoi ra rabugus ru pulu' Krita, mansail ra Tanjung Salmoni, koson kalo matiu' ra bagiu' no. 8Ra mapagon akai kaga' nansusug ra nagas ru pulu' i. Pupus i, nakasuku' akai ra rondo' intok ininggalanan ra Raralan Moonsoi, ondo' kalo niayuk maalur toojo intor ra bandar Lasia.
9Paat ragili Orou Pangampunan ra Tula ru ulun ru Jaudi nansail noyo, saboi ra orou moonsoi ru pasundayan i pana nalubat ayuk, sabap ra nansail noyo boo. Ginio ra i Paulus nampakara' risilo, kono, 10“Pabukat kau ngaangai', guang ku makalalaa' toojo amon ru tunggulin takau poyo pangkiralanan ti. Sala' ka kuliamos am kapal takau ti ayuk malunsai, kaa' maaru' mokoondo' niayuk ondo' matoi no.” 11Kaa' tingganai ru saujor i kalo niayuk minaya' ra ragu ri Paulus. Nangintopot io ayuk ragu ru kaptin ru kapal am ondo' tatangan ra kapal i. 12Sotopot no kalo moonsoi muog ra intok raginio amon ru musim masimu'. Ginio ra kasuangan ru mangngandoi ra kapal no mangiou ra marayus ayuk masundoi am kuminam sumuku' ra Piniks am muog ra giu' i saboi musim masimu' ti makai'. Piniks ti rondo' raralan ru kapal ra pulu' Krita ondo' tumuma' ra kait am pamiris ru kalasaan.
Bagiu' mapuor kaga' giu' ra raat
13Kalo boo nabuoi ragili am ratong bagiu' siob-siob intor ra rabugus. Ginio ra pangkaraan nilai ra moonsoi niayuk ru masundoi noyo. Ginio boo posokoyo' nilo simbagat ru kapal i am pasundoi boo pansusug ra nagas ru pulu' Krita. 14Kaa' ratong boo bagiu' mapuor kaga' intor ra lantur. Angin ragitio ininggalanan ra “Nagayantanga' ra ralayo am sirangon”. 15Kakapatir ayuk kapal mai matiu' ra bagiu' mapuor i. Sabap ra kalo lair magula' mai, pinoloso mai ayuk kapal i maabas ayaton ru bagiu'. 16Matasu' koborok ra akai nakaintuma' ra rabugus ru pulu' Kauda ondo' boborok. Giu' pana mokoondo' niayuk kapaganan mai magalung ra parau ru kapal i. 17Kopongo parau i pinasakoi ra kapal i, pioto' nilo pinamangkos nilai. Kapal i niayuk liniput rinilitan ra kalat, sabap ra malaa' ilo makararal ra intok makaagis ra Sirtis. Puruno' nilo boo layar ru kapal i am pinoloso ayuk maayat ru bagiu'. 18Lakat akai ayuk poyo inibit ra bagiu' mapuor i, saboi ra suabon i, kuliamos pinasakoi ra kapal i pana pinatiran ra raat. 19Suabon poyo ragili, mangangandoi ra kapal galama' namatir poyo ra atan ayuk kuliamos ru kapal ra raat. 20Buoi kukula' ngoorou kalo nakakito akai ra mato ru orou kapoam butitin am bagiu' mapuor ti pana lakat ayuk poyo makalalaa' toojo. Pupus nali kolondo' boo kalansanan mai ra maayag akai poyo.
21Nabuoi noyo kalo nangakan ulun-ulun no, bigor boo i Paulus ra tatanga' nilai am indagu, “Pabukat kau ngaangai'! Amon ru giminagaya' kau ayuk ra ragu kuli ra kalo masundoi intor ra Krita, kalo lair maluusan am malunsayan takau koson ragitio. 22Kaa' raino mambilin aku toojo ra pai' kau pagalabo sabap ra kolondo' sangulun pana intor ritakau ti matoi. Kaa' kapal ti ayuk matungkob. 23Sabap ra mokoondo' malaikat minatong raki' ra rondom i. Sinusub io ri Aki Kapuuno' ondo' sambaan kuno am ondo' masalok sumimpung raki'. 24Indagu malaikat i, ‘Pai' kalaa' Paulus! Makauma' kou niayuk ra Kaisar. Ra mataau i Aki Kapuuno' ra ulun nabaya' rirun ra kapal ti, ra ilo pana maayag mabaya' rirun.’ 25Sabap raginio, pabukat kau ngaangai', paikango' ayuk guang mino, sabap ra mangintopot aku no ri Aki Kapuuno' ra masauk noyo sumugut ra atan ondo' rinagu Nali raki'. 26Kaa' makaasak takau ra nagas ru rondo' pulu'.”
27Pakasail koopor am apat ngoorou buoi, lakat ayuk poyo akai nakalabui ra Raat Tanga'. Kaa' olo'-olo' tanga' ru rondom, mangngandoi ra kapal i nakaliman ra maar noyo makasuku' ra lantur. 28Ginio ra patapungo' nilo rondo' panukat koson mangkinam ra landom ru timug. Landom ti mokoondo' maar apat ngoopor ngamito. Kalo nabuoi ragili patapungo' nilo poyo panukat i am raino landom ru timug i maar talu ngoopor ngamito ayuk boo. 29Malaa' ilo ra kapal ti makajunjung ra batu maayo, ginio ra patapungo' nilo apat simbagat intor ra tinaulian ru kapal i. Pakiasi' ilo boo am malansan ra tumawang ra mataki'. 30Kaa' mangngandoi ra kapal nangkinam magiru'. Patuuno' nilo rondo' parau ra timug, koson mampatuun ilo kunu' ra simbagat ra saang ru kapal i. 31Kaa' indagu i Paulus ra saujor am niayuk tingganai nilai, “Amon ru mangngandoi ra kapal kalo sumoroi ra kapal ti, akau pana ngaangai' kalo noyo lair maayag.” 32Ginio ra putulo' boo ru saujor-saujor kalat ru parau i am pinoloso nilo ayuk boo naabas.
33Maar matawang, susubo' ilo ri Paulus mangakan. Indagu io, “Mopor am apat ngoorou noyo buoi min magalabo am kalo mangakan. 34Ginio ra maminson aku ramuyun ra pangakan kau! Ginio koson mampaligag poyo ramuyun. Kalo matoi kau, rondo' abuk min pana am kalo maubul.” 35Pakaindagu raginio, alapo' ri Paulus ruti' am paringkuanang ri Aki Kapuuno' ra saang nilai. Pipilango' no am pangakan io. 36Maikang boo saguli' guang nilai am rorondo' ilo boo nangakan. 37Suang mai ondo' minaya' ra kapal i am 276 ngaulun ringai'. 38Kaasug ilo ngaangai', patiri' nilo ngaangai' gandum ra raat koson mampamaan poyo ra kapal ti.
Kapal i nakalom
39Paat ra matawang, mangngandoi ra kapal i nakakito ra nagas, kaa' kalo nakatutun ilo libung ru lantur no. Guang nilo ra pararalon ayuk kapal ra giu' i. 40Ginio ra pinutul nilo tali ru simbagat ru kapal i am pinoloso ayuk ilo luminjob ra raat. Paat ragili niayuk palabuso' nilo tali ondo' pinarilit nilo ra kemudi. Bingkalo' nilo boo layar ra saang ru kapal i maa' raginio maibit ru bagiu' mongoi ra nagas i. 41Kaa' nakajunjung kapal i ra intok makaagis ralalom ru timug am nakararal ayuk boo. Tampilon saang ru kapal ondo' nakalom i kalo boo makaimbuor. Tampilon ra tinaulian i nalunsai boo sabap ra linapos ru kinulun maayo kaga'.
42Saujor-saujor makaguang mamatoi ra ngaangai' ulun inaput no, sabap ra malaa' ilo ra makapansarui lair ulun-ulun inaput no ra lantur am magiru'. 43Kaa' kalo iniou ilo ru tingganai nilai sabap ra masaga' io mamayag ri Paulus. Ginio ra susubo' no ngaangai' ulun ondo' mapandai mansarui galing tumindak am mansarui ra nagas. 44Ondo' bokon siminunu' ayuk boo ra giminuut ra kuliamos ra makalabui kapoam pilang ru kapal i. Koson raginio noyo nakasuku' akai ngai' ra lantur am naayag.
Currently Selected:
RINALATAN 27: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.