2 TUNUNG RU BANSA' ISRAIL 36
36
Raja' Joagas, raja' ru Jiuda
(2 Raj. 23:30-35)
1Mamagun ru Jiuda nampili' ra Raja' Joagas anak ungkuyon ru Raja' Josia, am nampalantik riso nasauk ra raja' giu' ra Jirusalim. 2Raja' Joagas makaumur ruo ngoopor am talu ngambilor paat ra io nasauk ra raja' ru Jiuda, am namarinta io ra Jirusalim buoi talu ngansila'. 3Raja' Niko intor ra Misir, namparakop ra Raja' Joagas am nampajajal ra Jiuda nambayar ra cukai suang 3,400 ngakilogram pirok am 34 ngakilogram mas. 4 Raja' Niko nampili' ra Raja' Iliakim pabukat ru Raja' Joagas, nasauk ra raja' Jiuda, am nangulau ra inggalan ru Raja' Iliakim nasauk ra Raja' Joyakim. Raja' Joagas inibit ru Raja' Niko giu' ra Misir.
Raja' Joyakim, raja' ru Jiuda
(2 Raj. 23:36—24:7)
5 Raja' Joyakim makaumur ruo ngoopor am limo ngambilor paat io nasauk ra raja' ru Jiuda, am namarinta io giu' ra Jiuda buoi mopor am rondo' ngambilor. Makatula Raja' Joyakim ra Tuhan, i Aki Kapuuno' nano. 6 Raja' Nibukadnijar intor ra Babilonia namulunsar ra Jiuda. Rinakop no Raja' Joyakim, binangkil no io, am inibit no io ra Babilonia. 7Raja' Nibukadnijar nagibit ra santayaran ra rapu' intor ra Baloi ru Tuhan ra istana nano giu' ra Babil. 8Ngaangai' binaal ru Raja' Joyakim, nakaaya' binaal nano ondo' majamol am malaat, tinulisan ra ralalom ru kitab Sejarah Raja'-Raja' ru Israil am Jiuda. Anak ungkuyon nano, i Joyakin minalit riso koson ra raja'.
Raja' Joyakin, raja' ru Jiuda
(2 Raj. 24:8-17)
9Raja' Joyakin makaumur mopor am balu' ngambilor paat ra io nasauk ra raja' ru Jiuda, am namarinta io giu' ra Jirusalim buoi talu ngansila' am mopor ngoorou. Raja' Joyakin niayuk makatula ra Tuhan. 10 Paat ra mambusak bilor raginio, Raja' Nibukadnijar namparakop ra Raja' Joyakin am nagibit riso ra Babilonia. Raja' Nibukadnijar niayuk nagibit ra rapu' intor ra Baloi ru Tuhan. Kopongo raginio Raja' Nibukadnijar nampili' ri Jidikia, kamaman ru Raja' Joyakin, nasauk ra raja' ru Jiuda am Jirusalim.
Raja' Jidikia, raja' ru Jiuda
(2 Raj. 24:18-20; Jir. 52:1-3a)
11 I Jidikia makaumur 21 ngambilor paat ra io nasauk ra raja' ru Jiuda, am namarinta io giu' ra Jirusalim buoi mopor am rondo' ngambilor. 12Raja' Jidikia makatula ra Tuhan, am marara' minggana' guang koson rumongog ra Nabi Jirimia, ondo' nampasaboi ra ragu ru Tuhan.
Naratuan ru Jirusalim
(2 Raj. 25:1-21; Jir. 52:3b-11)
13 Raja' Jidikia giminuor ra Raja' Nibukadnijar, ondo' nampajajal riso nagibot ralalom inggalan ri Aki Kapuuno' ra gumagaya' io ra Raja' Nibukadnijar. Raja' Jidikia bambalingatan am marara' tumalikur intor ra tula am niayuk sumaguli' ra Tuhan, i Aki Kapuuno' ru Israil. 14Suai intor raginio, tingganai-tingganai ru Jiuda, imam-imam am mamagun minaya' ra ralan kaayagan ru bansa'-bansa' ra naginggaar ondo' makatula. Sinamba nilo sinungkalalaing am nampajamol ra Baloi ru Tuhan, ondo' timpokon ayuk ru Tuhan galama' ra inan Nano. 15Buoi ru ginio Tuhan, i Aki Kapuuno' ru kinamatuaan nilo, nararayus nanusub ra nabi koson mampakara' ra ulun Nano, sabap ra masaga' Io mamayag risilo am Baloi ru Tuhan. 16Kaa' kinuli-kuli nilo ulun-ulun sinusub ri Aki Kapuuno' no, kalo nampalio ra ragu Nano, am nakakurit ra nabi-nabi Nano. Pupus no, siminangit kaga' Tuhan risilo saboi kolondo' boo ralan mingkual koson mapalabus ra ulun Nano intor ra ukuman Nano.
17 Ginio ra Tuhan namparatong ra raja' ru Babilonia koson mamulunsar risilo. Namatoi raja' Babilonia ra ulun mamulok ru Jiuda, am poyo ulun soroi giu' ra Baloi ru Tuhan. Kalo nakaasi' raja' no ra osoi pana, mamulok am matutuo, ungkuyon am ruandu', ulun marualan kapoam ulun maligag. Pinataak ri Aki Kapuuno' ilo ngaangai' ra raja' ru Babilonia. 18Kuliamos-kuliamos ra Baloi ru Tuhan am kuliamos-kuliamos mologo ondo' soroi ra giu' no, rapu' ru raja' am pagawai-pagawai nano, ginaau ru raja' Babilonia, am inibit ra Babil. 19Linunsai ru raja' no timbok ra bandar ru Jirusalim am nonolob ra bandar no, nakaaya' Baloi ru Tuhan am ngaangai' istana, nababaya' ra kuliamos mongologo giu' ra ralalom ru istana. 20Inibit ru Raja' Babilonia ngaangai' ulun ondo' lakat poyo naayag giu' ra bandar no ra Babilonia. Jinajalan ilo nasauk ra inulipon ra raja' am papag nano saboi ra talimpuun ru pamarintaan ru Pirsia. 21 Koon raginio noyo nasauk atan ondo' rinagu ru Tuhan ondo' pinabala' galing ra Nabi Jirimia, “Pagun ragitio mokoloso buoi tulu' ngoopor ngambilor koson papaliton ra bilor-bilor Sabat ondo' kalo linio.”
Raja' Koris nangiou ra ulun ru Jaudi muli'
(Ijr. 1:1-4)
22Paat ra bilor kasaa' ra pamarintaan ru Raja' Koris, raja' Pirsia, inintopot ru Tuhan ragu Nano ondo' pinasaboi ru Nabi Jirimia. Namuir Tuhan ra guang ru Raja' Koris maa' raginio mangingkual ra susuban tinulisan koson basaan giu' ra titikop ru pamarintaan nano. Bolos ru surat no koon ragitio,
23 “Gitio noyo ragu ru Raja' Koris, raja' ru Pirsia. Tuhan, i Aki Kapuuno' panguasa' giu' ra suruga', nampasauk raki' ra raja' ru titikop ru tana' ti. Nangani' Io raki' ra kandoi koson mambaal rondo' baloi Riso giu' ra Jirusalim, giu' ra wilayah ru Jiuda. Ginio ra, akau ngaangai' ondo' nasauk ra ulun ri Aki Kapuuno' musiti' sumaguli' ra giu'. Gama' ru Tuhan, i Aki Kapuuno' min mabaya' ramuyun.”
Currently Selected:
2 TUNUNG RU BANSA' ISRAIL 36: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.