2 TUNUNG RU BANSA' ISRAIL 35
35
Nangiantak Raja' Josia ra Paska
(2 Raj. 23:21-23)
1Nangiantak Raja' Josia ra Paska giu' ra Jirusalim koson mangurumat ra Tuhan. Paat ra orou koopor am apat ru sila' kasaa', nanimbalui ilo ra domba koson ra pangiantakan no. 2Inanian no imam-imam ra kandoi-kandoi ondo' musiti' baalon nilo giu' ra Baloi ru Tuhan, am nangunsu' risilo maa' raginio mambaal ra kandoi no ra matanda'. 3Ulun-ulun ru Liwi, iono mangingila' ru Israil ondo' timpokon ayuk ra Tuhan, nakaalap ra susuban ragitio intor ra Raja' Josia, “Pabantaa' noyo Kaban Nabantuan ondo' matulai ti giu' ra Baloi ru Tuhan, ondo' binaal ru Raja' Salomo anak ungkuyon ru Raja' Daut. Kalo pana boo ibiton min ginio intor ra intok ka intok, kaa' musiti' kau mangandoi ayuk ra Tuhan, i Aki Kapuuno' min am ulun Nano Israil. 4 Paugaro' kandoi tinaak ramuyun giu' ra Baloi ru Tuhan, sumugut ra bansa' min am kandoi ondo' tinaak ru Raja' Daut am anak ungkuyon nano Raja' Salomo. 5Aturo' min bansa' min maa' raginio maindangan min moonong sasambaloi ru ulun ru Israil. 6Akau no ondo' musiti' manimbalui ra domba am kambing koson ra Pangiantakan Paska. Ginio ra impasawi' min inan am potomposo' min taak-taak simbalui no, maa' raginio akau ngai' ulun ru Israil makapambaal ra atan ondo' sinusub ru Tuhan ondo' pinabala' galing ri Musa.”
7Nangani' Raja' Josia 30,000 ngainan domba, anak domba am anak kambing, am niayuk 3,000 ngainan sapi' gawayan intor ra bibiag tinambiag nano galama', ra mamagun ondo' siminaang ra giu' no maa' raginio makapampataak ilo ra taak simbalui koson ra Pangiantakan Paska. 8Pagawai-pagawai ri Josia niayuk nangani' ra indangan ra mamagun, imam-imam am ulun ru Liwi. Pagawai-pagawai ondo' nangandoi giu' ra Baloi ru Tuhan, iono Tingganai Maayo Imam Ilkia, Jakaria am Jiwil, nangani' ra 2,600 ngainan anak domba am anak kambing, am niayuk 300 ngainan sapi' gawayan, ra imam-imam koson pataakon paat ra pangiantakan no. 9Tingganai-tingganai ru ulun ru Liwi, iono i Konanya, i Simaya am i Nitaniil pabukat nano, i Gasabia, i Jiyil am i Jojabad nangani' 5,000 ngainan anak domba am anak kambing, am niayuk 500 ngainan sapi' gawayan ra ulun ru Liwi koson pataakon ra pangiantakan no.
10Paat ra ngaangai' no nopongo noyo koson ra pangiantakan Paska, imam-imam am ulun-ulun ru Liwi minongoi ra intok ru sigagama' koson ondo' nanusuban ru raja'. 11Kopongo kambing am domba sinimbalui, ulun-ulun ru Liwi nanganit ra kungkung ru ngaangai' no; kopongo raginio imam-imam nampatakis ra raraa' ru bibiag no ra rasawat ru altar. 12Tinayar nilo bibiag-bibiag raginio ra tayar ru taak simbalui koson mapabansuk ra guang ru Tuhan, ra moonong pulalai ru sasambaloi, maa' raginio makapampataak ilo raginio sumugut ra kaulayan ru Ukum ri Musa. 13 Ulun ru Liwi namanggang ra taak-taak simbalui koson ra Pangiantakan Paska ra ralimbou ru apui, sumugut ra kaulayan, am nantanok ra taak-taak simbalui ra luntukon giu' ra ralalom ru paliuk, pagangan am pagangan tana', am inidibakan kual no tinayar-tayar ra mamagun. 14Kopongo raginio bagu no tinayar ru ulun ru Liwi ra ilo galama' am imam-imam papag ri Arun, sabap ra saboi ra rondom imam-imam nangandoi nonolob ra bibiag-bibiag ondo' pinataak koson ra taak simbalui koson mapabansuk ra guang ru Tuhan, am nonolob ra lomok intor ra taak-taak simbalui no. 15 Kukula' ngaulun mangkuli ra miujik intor ra bansa' ru Asap ralalom bansa' ru Liwi, iono i Asap, Giman am Jidutun nabi ru raja' no, minongoi ra intok nilo koson ondo' inaru' ru Raja' Daut. Ulun magalung ondo' nangandoi giu' ra kulobon garabang Baloi ru Tuhan kalo pana mangiruan ra intok-intok alungin nilo sabap ra ulun-ulun ru Liwi ra bokon nomongo noyo ra luntuk ra Pangiantakan Paska koson risilo. 16Koon raginio noyo ngaangai' baal no binaal paat ra orou raginio koson sumamba ra Tuhan, mangiantak ra Pangiantakan Paska, am mampataak ra taak simbalui koson mapabansuk ra guang ru Tuhan, giu' ra rasawat ru altar, koson ra ondo' nanusuban ru Raja' Josia. 17 Buoi tulu' ngoorou ngaangai' ulun ru Israil ondo' siminaang ra giu' no nangiantak ra Pangiantakan Paska am Pangiantakan ra Ruti' Kalo Linatakan ra Ragi. 18Intor ra bulintok ru Nabi Samuil, kalo igondo' Paska iniantak ra maayo toojo koson raginio. Kolondo' sangulun pana ra gino ngai' ru raja'-raja' ru Israil ondo' igondo' nangiantak ra Pangiantakan Paska koson ondo' iniantak ru Raja' Josia, imam-imam, ulun-ulun ru Liwi am mamagun ru Jiuda, Israil am niayuk Jirusalim, 19paat ra bilor koopor am balu' ra pamarintaan ru Raja' Josia.
Pupus ra pamarintaan ru Raja' Josia
(2 Raj. 23:28-30)
20Kopongo Raja' Josia nambaal ra ngaangai' baal raginio ra tayar Baloi ru Tuhan, Raja' Niko intor ra Misir naningganai ra saujor nano koson mangayou giu' ra Karkimis mamaar ra Sungoi Iprat. Nangkinam Raja' Josia mongompong ra Raja' Niko, 21kaa' Raja' Niko nangator ra tanou ragitio riso, “Pangayawan ti kalo nakakulawit rirun, raja' ru Jiuda. Aku minatong sala' ka koson manggal rirun, kaa' manggal ra pantula' kuno galama'. Nanusub i Aki Kapuuno' raki' koson mingkuor ra mataki'. Io galama' nanaung raki', ginio ra pai' anggal raki'. Amon ru manggal kou raki', pusoon kou ri Aki Kapuuno'.” 22Kaa' Raja' Josia jajajal koson mongoi pangayou. Kalo linio no ragu ri Aki Kapuuno' ondo' rinagu ru Raja' Niko. Siminalu Raja' Josia am nangayou giu' ra tana' marata' ru Migido.
23Ralalom ru pangayawan no, napanah Raja' Josia ru saujor ru Misir. Indagu io boo ra ulipon-ulipon nano, “Malandom pilat kutu! Ibito' aku mingkual intor ragiti.” 24Pinabanding nilo Raja' Josia intor ra kurita' kuda nano ra kurita' kuda ra bokon, am inibit io ra Jirusalim. Raja' Josia minatoi giu' ra Jirusalim am linobong giu' ra kalabangan ru raja'. Ngaangai' mamagun ru Jiuda am Jirusalim nangulir sabap ra pinatayan nano.
25Nabi Jirimia nanulis rondo' rimbai sulaboi ra Raja' Josia. Giu' ra Israil saboi raino, rimbai no rinimbai ru ulun-ulun maririmbai, ondo' ungkuyon am poyo ruandu', ralalom pangkaraan ra panguliran ra Raja' Josia. Rimbai no pinasimpung ra ralalom ru pulalai rimbai ru sulaboi.
26Ngaangai' binaal ru Raja' Josia, ondo' togom nano ra Tuhan, gagaya' nano ra Ukum ru Tuhan 27am poyo sejarah ru kaayagan nano intor ra talimpuun polos ra pupus, tinulisan ra ralalom ru kitab Sejarah Raja'-Raja' ru Israil am Jiuda.
Currently Selected:
2 TUNUNG RU BANSA' ISRAIL 35: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.