1 TIMOTIUS 3
3
Tingganai ru pasimpungan ulun Kristian
1Ragu ragitio motopot: “Amon ru sangulun makaguang maningganai ra pasimpungan ulun Kristian, masaga' io ra rondo' kandoi ondo' mokoonong toojo.” 2 Sangulun tingganai ru ulun Kristian no musiti' kolondo' sala, sangulun ayuk andu' nano, makapantataan ra guang, mapintar, makapaliso matanda', mataau mangapu ra tambului am makapangila' ra ulun. 3Am poyo kalo gagaukon, kalo makimansangor kaa' sotopot no lumomoi ayuk am makimobonsoi am kalo maringkumaa' ra kalangkayaan. 4Io musiti' makapakan ra sasambaloi nano am mangila' ra anak-anak nano gumagaya' am mangurumat riso. 5Sabap ra amon ru mailo io magalung ra sasambaloi nano galama', ati kulaan io makapaningganai ra pasimpungan ulun Kristian? 6Musiti' io ti poyo sala' ka bagu ayuk siminauk ra Kristian, sabap ra maagu minsawat lair guang nati am ulason io mogondo' ra Tingganai ru riwato ra galing i. 7Io musiti' no sangulun ondo' urumaton ru mamagun ondo' sala' ka Kristian pana, maa' raginio kalo tauyuon io saboi marukuan ru Tingganai ru riwato no.
Mangingindangan ra pasimpungan ulun Kristian
8Mangingindangan ra pasimpungan ulun Kristian musiti' makapaliso ra moonsoi am mabanis guang; kalo gagaukon kapoam kalo maringkumaa' ra kalangkayaan. 9Mabaya' ra guang mabanis ilo musiti' sumugut toojo ra pangintapatan ra motopot ondo' pinaintalang ri Aki Kapuuno'. 10Ilo ti kinamin galing am amon ru makasail ilo, bagu no pasaukon ilo ra mangingindangan ra pasimpungan ulun Kristian. 11Andu' nilo pana musiti' makapaliso ra moonsoi, sala' ka masaga' mansunur ra bokon, mataan guang am malansanan ra atan ayuk baal. 12Sangulun mangingindangan musiti' sangulun ayuk andu' nano am makapagalung ra sasambaloi nano. 13Mangingindangan ra mapandai makaalap ra inggalan moonsoi am makakau' ilo mampatanou ra pangintapatan nilo intor ri Jisus Kristus.
Papaintalangan ra pangilaan motopot
14Kabalu' pana tulisin tokou niayuk ra surat ti, malansan aku ra kalo boo mabuoi mongoi aku tuum rirun. 15Kaa' amon ru kalo makaratong aku ra mataki', okou mokoondo' noyo ra kaintutunan ra ati kulaan musiti' takau maayag koson ra anak ri Aki Kapuuno', ioginio pasimpungan ru ulun ondo' mangintopot ri Aki Kapuuno' ondo' maayag. Itakau noyo ondo' mampabala' am manungka' ra katapatan. 16Kolondo' sangulun pana makapagali' ra mumpara' boo bonsoi ru pangilaan motopot ondo' kalo igondo' pinabala' i, ioginio:
Minintalang i Jisus Kristus am nasauk ra ulun,
iniou Io ru Ambiluo ri Aki Kapuuno',
nakito Io ru malaikat-malaikat.
Pinatanou Io ra ngaangai' bansa',
inintopot Io ru ulun ra ngaangai' libung ru tana' ti,
am kinayang Io minuli' ra katulayan ru suruga'.
Currently Selected:
1 TIMOTIUS 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.