1 TIMOTIUS 2
2
Sambayang ru ulun Kristian
1Pagulu, kitaakon ku toojo ra pakitaakan, pakiasian, pambarakatan ra ulun bokon am paringkuanangan posoboyon min ri Aki Kapuuno' ra ngaangai' ulun; 2ioginio raja'-raja' am ngaangai' ru ulun mangunguasa', maa' raginio maayag takau ralalom pabansayan, sumambayang takau ri Aki Kapuuno' am makapaliso takau ra matanda'. 3Ginio noyo ondo' moonsoi am mampakatasu' ri Aki Kapuuno', Mamamayag takau, 4ondo' masaga' ra ngaangai' ulun bayagon am makaulig ra katapatan. 5Sabap ra rorondo' ayuk i Aki Kapuuno' am rondo' niayuk ondo' mompobonsoi ritakau ri Aki Kapuuno', iono i Jisus Kristus, ondo' nasauk ra ulun. 6Io nampataak ra painawo Nano koson mampalabus ra ngaangai' ulun ondo' makatula ra paat inaru' ri Aki Kapuuno'. Gitio noyo tatandu' ra i Aki Kapuuno' masaga' ra ngaangai' ulun bayagon. 7 Am ginio nai ra aku ti pinasauk ra rasul am mangingila' ra tayar ru ulun sala' ka Jaudi, koson mampatanou ra pangintapatan ondo' motopot. Am motopot ngaangai' rinagu kutu, pai' ru magabau aku.
8Paat ra akau sumambayang, masaga' aku ra ungkuyon rati makiasi' mabaya' ra guang mapasau ra kolondo' kasisangan am niayuk kolondo' pansasangaran.
9 Am masaga' aku ra ruandu'-ruandu' mambayang ayuk ra ondo' sama' tantangin am kalo mampakauyu' ra pagilangan ru ulun; ioginio kalo majanjayan sikot ru abuk, mampakai ra mas, mutiara kapoam bayang ra mongologo. 10Kaa' sotopot no, musiti' ruandu'-ruandu' mambaal ayuk ra moonsoi, sabap ra ginio noyo kataluran ru ruandu' ondo' mangintopot ri Aki Kapuuno'. 11Am poyo musiti' ilo migigila' makapaliso ra mongkoror am minggana' guang. 12Am manginggalar aku ra ruandu' mangila' kapoam manguasa' ra ungkuyon, kaa' ilo ti musiti' mongkoror. 13 Sabap ra i Adam ondo' pinasauk pagulu am sunu' bagu i Awa. 14 Am pai' ru i Adam naruung kaa' ruandu' i, saboi kalo boo ginagaya' no susuban ri Aki Kapuuno'. 15Kaa' ruandu' pana bayagon ra io maganak, amon ru magulayun io mangintopot, motogom ra ulun bokon, mapasau guang am makapaliso ondo' sama' bayaan.
Currently Selected:
1 TIMOTIUS 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.