Luka 11
11
Kukamba kwa-Mwami
(Matayo 6:9-13)
1 #
Lk 5:33
Eno naakali kukomba kubusena bumwi, naakamana, umwi wabasikwiiya bakwe wakamwaambila kuti, O mwami, utwiisye kukomba, mbuli Johane mbwaakaiisya basikwiiya bakwe. 2#Mt 6:9-13Wakati kulimbabo, Mwakomba amwaambe kuti, Taateesu, ooli kujulu, alilemekwe zina lyako. Abuze Bwami bwako. Alucitwe luyando lwako ansi ano mbubonya mbolucitwa kujulu. 3Utupe zilyo zitweelede mazuba amazuba. 4Utujatile milandu yesu, nkaambo aswebo tulabajatila abali emilandu kulindiswe. Utatweenzyi mukutepaulwa, utuvune kumubi.
Makani amwi aakukombelela
5Elyo wakabaambila kuti, Anooli umwi wanu uujisi mweenzinyina, eno wainka kulinguwe akati kamasiku wati, Mweenzuma, ndyaabila mikamu yotatwe, 6nkaambo mweenzuma umwi uwali mulweendo wasika kulindime, pele nsijisi cakumusomba, 7#Mt 26:10nkokuya uuli muŋanda avuwe kuti, Utandikataazyi, mulyango wajalwa kale, tuli abulo abana bangu, nsikonzya kubuka kukupa, 8#Lk 18:5ndamwaambila kuti, Naakaka kubuka kumupa mbwali mweenzinyina, nekubaboobo nkaambo kakukakatila kwakwe ulabuka amupe zyoonse nzyabula. 9#Mt 7:7-11Aboobo ndamwaambila kuti, Amukumbile muzoopegwa, amuyandaule muzoojana, amukonkomone muzoojulilwa. 10Nkaambo umwi umwi uukumbila ulatambula, uuyandaula ulajana, uukonkomona ulajulilwa. 11Alimwi nguuli wisi mwana akati kanu kuti mwanaakwe wakumbila nsima, sena ulamuna bbwe? Kuti wakumbila inswi, sena ulamupa nzoka, iitali nswi njiyonya na? 12Kuti wakumbila iji, sena ulamupa kabanze? 13Nywebo, nobabi, mbomuzi kupa bana banu zintu zibotu, Usowanu uuli kujulu sena takooindilila kubapa Muuya Uusalala abakumbila kulinguwe?
Ba-Farisi mbobakanenya Jesu
(Matayo 12:22-32; Marko 3:22-30)
14 #
Mt 12:22-30,43-45; Mk 3:22-27 Wakali kugwisya daimona syataambi. Elyo daimona naakamuzwa, syataambi wakaamba, makamu makamu aabantu akayoowa. 15#Mt 9:34; 10:25Pele bamwi bakaamba kuti, Ulagwisya badaimona kunguzu zya-Belzebule, mwami wabadaimona. 16#Mt 12:38; 16:1; Mk 8:11Abamwi bakamusunka, bayanda kubona kulinguwe citondezyo icizwa kujulu. 17Kwalo mbwaakali kuzi kuyeeya kwabo, wakabaambila kuti, Kufumbwa cisi icilyaandaanina, cilasaalwa, eŋanda ilyaandaanina ilawa. 18Awalo Saatani kuti walyaandaanina, ino bwami bwakwe bunoozooimvwi buti? Nkaambo mwaamba kuti ndagwisya badaimona enguzu zya-Belzebule. 19Eno kuti mebo ndigwisya badaimona enguzu zya-Belzebule, ino bana banu babagwisya enguzu zyani? Aboobo balo bayooba babetesi banu. 20#Kul 8:19Pele kuti mebo ndigwisya badaimona amunwe wa-Leza, nkokuya bwami bwa-Leza bwamusikila. 21Singuzu uuli azilwanyo nalindila ŋanda yakwe, lubono lwakwe lunookede kabotu. 22#Kol 2:15Pele kuti kwasika umwi umwiinda nguzu, amuzunda, ulamunyanga zyoonse zilwanyo zyakwe nzyaali kusyoma, akwaaba zisaalwa zyakwe. 23#Mk 9:40; Lk 9:50Oyu ngotutali awe ulandilwanya, ayooyo ngotutabungi awe ulamwaya. 24Umuuya mubi azwa kumuntu uleendeenda mumasena aatakwe maanzi, uya buyandaula cilyookezezyo, atacijana ulaamba kuti, Ndapiluka kuŋanda yangu nkwendakazwa. 25Asika wiijana ilikukwidwe akubambwa kabotu. 26#Joh 5:14Ndilyonya ulainka kuyooleta imwi myuuya iili musanu mwiibili, iimwiinda kubija, yanjila ilakala mumo omo, eno milimo yakusyaalila yamuntu oyo ilabijisya kwiinda yakusaanguna.
27 #
Lk 1:28,42,48 Naakaamba obo, umwi mukaintu wamunkamu wakoompolola wati kulinguwe, Lili acoolwe ida ilyakakuzyala enkolo nzookanyonka. 28#Lk 8:15,21Pele walo wateeti, Ii, kwalo akapati bali acoolwe abaswiilila makani aa-Leza akwaacita.
Citondezyo ca-Jona
(Matayo 12:38-42)
29 #
Mt 12:38-42
#
Mt 16:4; Mk 8:12; 1 Kor 1:22 Elyo bantu banjibanji nobakali kumuyobolokela, wakatalika kwaamba kuti, Abasunu mbantu babi, bayanda kubona citondezyo. Eno tabakooyoopegwa citondezyo pele citondezyo ca-Jona musinsimi. 30#Jon 3:4Nkaambo mbuli Jona mbwaakaba citondezyo kulibaku-Nineve, mbubonya awalo Mwana a-Muntu mbwayooba kulibasunu. 31#1 Bam 10:1-10; 2 Mak 9:1-12Mwami mukaintu wakumabizi uyooima antoomwe abantu basunu mulubeta, akabazule, nkaambo wakazwa kumagolelo aanyika kuti amvwe busongo bwa-Solomoni, eno ano mpali uumwiinda Solomoni. 32#Jon 3:5Abalo baalumi baku-Nineve bayooima antoomwe abasunu mulubeta, bakabazule, nkaambo bakasanduka Jona naakabakambaukila makani, eno ano mpali uumwiinda Jona.
Makani elambe lyamubili
33 #
Mt 5:15; Mk 4:21; Lk 8:16 Taakwe muntu uutomeka lambe kuti alibike kusitilide, nekuba kunsi amutiba, pele acikalikilo, kuti abanjila babone kusalala. 34#Mt 6:22,23Ilambe lyamubili ndiso, iliso lyako lyanooluzi awalo mubili wako woonse ulizywide kusalala, kwala kuti lyanooli bbi awalo mubili wako ulizywide kusia, 35Nkaambo kaako kolilanga, kuti mumuni uuli mukati kako tuuli mudima. 36Nkaako kuti mubili wako woonse ulizywide mumuni, kuutakwe kabala akasiasia, uzoozyula mwa akusalala, mbuli lambe mbolisalazya kukuyaka kwalyo.
Jesu mbwaakatapatila ba-Farisi abalembi
(Matayo 23)
37 #
Lk 7:36; 14:1 Jesu naakamana kwaamba, umwi mu-Farisi wakamukumbila kuti balye awe. Nkabela wakanjila, wakala kukulya, 38#Mt 15:2Eno mu-Farisi wakayoowa naakabona kuti walya buyo, tasambide. 39#Mt 23:1-36Pele Mwami wakamwaambila kuti, Nywebo noba-Farisi, mulasalazya cinywido amutiba kunze, anu mukati mulizywide kunyanga abubi. 40Nywebo, nobafubafuba, oyo uwakacita kunze engwe ngowakacita amukati na? 41Kwalo amupe zipo nzizyo zyamukati, nkokuti zyoonse zilasalala kulindinywe.
42 #
Lev 27:30
Pele maawe nywebo, noba-Farisi, nkaambo mulapaizya cimanyakumi canamunkulungwe ebbondwe ezisyu zyoonse, kwalo mwainda bululami aluzyalo lwa-Leza, anukuti ngoonya aya ngomwali kweelede kwaacita akutaaleka ayo amwi. 43#Lk 20:46Maawe nywebo, noba-Farisi, nkaambo mulayanda zyuuno zyakumbele muzikombelo, akwaanzigwa muzisambalilo. 44Maawe nywebo, nkaambo mulikozyene ezyuumbwe izitalibonyi, nkabela bantu abazilyata tabazizi kuti nzizyo.
45Eno umwi wabasimilao, wakamwaambila kuti, Mufundisi, mboamba obo watutukana aswebo, 46Nkabela wakati, Maawe anywebo, nobasimilao, nkaambo mutwika bantu mikuli milemu iiminya, anu nywebo nobeni tamwiijati mikuli eyo nekuba kumunwe wanu omwe. 47Maawe kulindinywe, nkaambo muyaka zyuumbwe zyabasinsimi, abamauso mbabakabajaya. 48Nkaambo muli bakamboni, mwiizumina milimo yabamauso, nkaambo balo bakabajaya, eno nywebo muyaka zyuumbwe zyabo. 49Ncencico ncobwakaamba busongo bwa-Leza kuti, Ndiyoobatumina basinsimi abaapostolo, bamwi bayoobajaya akubapenzya, 50kuti akayandaulwe kulibasunu malowa oonse aabasinsimi aakatilwa kuzwa kumatalikilo aanyika, 51#Matl 4:8; 2 Mak 24:20-21kuzwa kubulowa bwa-Abele mane kusikila kubulowa bwa-Zakariya, uwakajayigwa akati kacituulilo eŋanda ya-Leza, Ii, ndati kulindinywe, buyooitwa kulibasunu. 52Maawe kulindinywe, nobasimilao, nkaambo mwacitola cijuzyo caluzibo, tamukwe nomwanjila nobeni, abalo abali kunjila mwabakasya.
53Naakazwa omo, abalembi aba-Farisi bakatalika kumusungilizya enguzu akumuyungila kuti kacaamba zintu zinjizinji, 54#Lk 20:20bakamubenda-benda kuti bajane ijwi ilizwa kumulomo wakwe, kuti bamubike mulandu.
Currently Selected:
Luka 11: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.