1 Saˍmo-eˍlaˆ li‸ 30
30
Aˍmaˍlehˆ chaw hui hta‸ ma‸ bawˆ ve
1Nyiˇ nyi ponˬ peuˬ hkʼaw‸ nawˉ Daˍviˆ leh yawˇ ve ma‸ yaˇ teˇ hpaˍ Ziˆkaˍlaˆ venˇ lo kʼaw‸ gaˬ la ve yoˬ. Aˍmaˍlehˆ chaw teˇ hpaˍ lehˬ, Yuˇda‸ mvuhˇmiˬ awˬ hawˉ te taw hta‸ bawˆ yuˬ leh, Ziˆkaˍlaˆ venˇ hta‸ htawˇ ca bawˆ la ve yoˬ. Yawˇ hui lehˬ, venˇ oˇ ve hta‸ htawˇ aˬ miˍ tuˉ baˬ leh, 2yaˇ miˇ yaˇ nehˬ hkʼa peu-eˬ hta‸ hpeh kʼai ve yoˬ. Yawˇ hui chaw teˇ gʼaˇ hta‸ ka‸ maˇ tiˇ pehˍ. Ya‸ hkʼaˇ, yawˇ hui tawˆ kʼai ve teˇ yanˇ chaw hkʼa peu-eˬ ve hta‸ hpeh kʼai ve yoˬ. 3Daˍviˆ leh yawˇ ve ma‸ yaˇ teˇ hpaˍ kʼaw‸ gaˬ la ve teˇ yanˇ, yawˇ hui ve venˇ hta‸ aˬ miˍ tuˉ baˬ leh, yawˇ hui ve miˇ yaˇ hkʼa peu-eˬ shu hpeh kʼai ve hta‸ gʼa mawˬ ve yoˬ. 4Daˍviˆ leh yawˇ ve ma‸ yaˇ teˇ hpaˍ gʼaˇ nuˇ jaˇ htaˇ hkʼa gaˬ gʼaˇ hte‸ kuˬ hawˬ ve yoˬ. 5Daˍviˆ ve awˬ miˇ ma Aˍhiˆnonˍ leh Aˍbiˆgeˍlaˆ hui hta‸ htawˇ shu hpeh kʼai ve yoˬ.
6Daˍviˆ lehˬ dawˇ tuiˬ jaˇ ve yoˬ. Yawˇ ve ma‸ yaˇ teˇ hpaˍ lehˬ yawˇ hui ve miˇ yaˇ teˇ hpaˍ hta‸ shu hpeh kʼai peuˬ ve pa taw nyi ma zuhˆ jaˇ leh, Daˍviˆ hta‸ haˉ pui baˬ-a teh‸ te ve yoˬ. Ya‸ hkʼaˇ, Gʼuiˬsha yawˇ hta‸ awˬ gʼaˇ kʼaw‸ cawˬ la piˇ ve yoˬ. 7Oˇ htaˇ Daˍviˆ lehˬ, Da‸ kehˬ ve ta kʼoˍ ngaˬ geh yuˬ veu laˇ-oˆ, teh‸ Aˍbiˆ maˍ lehˆ ve yaˇ paw hkuˇ Aˍbyaˍtaˍ hta‸ kʼoˆ piˇ ve yoˬ. Hkʼe te leh, Aˍbyaˍtaˍ lehˬ ta kʼoˍ oˇ ve yawˇ geh yuˬ laˬ ve yoˬ. 8Oˇ htaˇ, Daˍviˆ Gʼuiˬsha hta‸ na nyi leh, Gʼuiˬsha-oˬ, ngaˬ canˇ paˍ oˇ ve teˇ hpaˍ hkʼaˇ suh gʼa gʼa‸ yuˬ tuˬ ve laˇ. Ngaˬ yawˇ hui hta‸ gʼa‸ mi tuˬ sheˍ laˇ, teh‸ kʼoˆ ve yoˬ.
Gʼuiˬsha lehˬ, Kʼai loˬ, nawˬ chaw oˇ ve teˇ hpaˍ hta‸ gʼa‸ mi leh yawˇ hui hta‸ htaiˍ hkʼaw‸ piˇ gʼa tuˬ yoˬ, teh‸ kʼaw‸ kʼoˆ piˇ ve yoˬ.
9Hkʼe te leh, Daˍviˆ lehˬ yawˇ ve ma‸ yaˇ 600 gʼaˇ ve hta‸ shiˍ veu leh tawˆ kʼai ve yoˬ. Yawˇ hui Beˍtawˍ teh‸ kʼoˆ ve iˉ kaˆ lawˬ lo gaˬ htaˇ, chaw teˇ hpaˍ hpaˍ oˇ kaˬ lo chehˇ taˉ ve yoˬ. 10Daˍviˆ lehˬ, yawˇ ve ma‸ yaˇ 400 hta‸ shiˍ veu leh awˬ gʼuˇ suhˍ kʼaw‸ kʼai ve yoˬ. Awˬ nu ve ma‸ yaˇ 200 gʼaˇ lehˬ, heuˬ jaˇ peuˬ leh iˉ kaˆ lawˬ hta‸ hkanˍ tuˬ dawˇ maˇ tawˆ ve pa taw oˇ kaˬ lo chehˇ taˉ ve yoˬ. 11Daˍviˆ geh kʼai chehˇ ve ma‸ yaˇ oˇ ve teˇ hpaˍ lehˬ, heh puiˉ hkʼaw lo Eˇjiˇtu‸ chaw teˇ gʼaˇ hta‸ mawˬ leh, yawˇ hta‸ Daˍviˆ geh shiˍ laˬ ve yoˬ. Yawˇ hui yawˇ hta‸ caˇ tuˬ caˍ piˇ leh iˉ kaˆ taw piˇ ve yoˬ. 12Chi awˬ hkʼoˆ yawˇ hui yawˇ hta‸ maˉ nawˆ shiˍ awˬ goˇ leh a pehˉ meuˇ shiˍ awˬ goˇ nyiˇ kʼoˍ caˍ piˇ ve yoˬ. Yawˇ caˇ peuˬ ve teˇ yanˇ, awˬ gʼaˇ kʼaw‸ cawˬ la ve yoˬ. Yaˇ paˍ oˇ ve lehˬ, te‸ chiˉ maˇ gʼa caˇ ve shehˆ nyi gaˬ peuˬ ve yoˬ. 13Oˇ htaˇ Daˍviˆ lehˬ, Nawˬ ve awˬ shehˍ hpaˇ a shu le. Nawˬ hkʼaˬ lo chehˇ ve le, teh‸ yawˇ hta‸ na nyi ve yoˬ.
Yawˇ kʼaw‸ yaw hkʼaw‸ leh kʼoˆ ve, Ngaˬ lehˬ Eˇjiˇtu‸ chaw hpeh‸ leh, Aˍmaˍ lehˆ chaw teˇ gʼaˇ ve awˬ ceˬ hpeh‸ ve yoˬ. Ngaˬ chehˇ haˍ ve pa taw, ngaˬ ve awˬ shehˍ hpaˇ ngaˬ hta‸ baˬ taˉ laˇ ve ya‸ nyi shehˆ nyi gaˬ peuˬ. 14Ngaˬ hui lehˬ Yuˇda‸ mvuhˇmiˬ awˬ hawˉ te taw lo cawˬ ve Hkeˍraˍtiˆ chaw hui ve mvuhˇmiˬ, Kaˍlehˆ awˬ ceuˬ awˬ hkʼaˇ teˇ hpaˍ ve mvuhˇmiˬ hta‸ ca bawˆ yuˬ leh, Ziˆkaˍlaˆ venˇ hta‸ aˬ miˍ tuˉ baˬ taˉ ve yoˬ, teh‸ kʼoˆ ve yoˬ.
15Oˇ htaˇ Daˍviˆ lehˬ, Chaw oˇ ve teˇ hpaˍ geh nawˬ ngaˬ hta‸ shiˍ kʼai laˇ hpeh‸ aw laˇ, teh‸ yawˇ hta‸ na nyi ve yoˬ.
Nawˬ ngaˬ hta‸ maˇ tiˇ pehˍ leh, ngaˬ ve awˬ shehˍ hpaˇ ve la‸ sheh hkʼaw maˇ chiˇ a‸ laˇ tuˬ, Gʼuiˬsha ve awˬ meh hkʼaw ka ti‸ te laˇ ve kʼo, ngaˬ shiˍ maˍ laˇ tuˬ yoˬ, teh‸ kʼaw‸ yaw hkʼaw‸ piˇ ve yoˬ.
16Yaˇ paˍ oˇ ve lehˬ, Daˍviˆ hta‸ chaw oˇ ve teˇ hpaˍ geh shiˍ kʼai piˇ ve yoˬ. Yawˇ hui lehˬ, Hpiˇliˇtiˆ leh Yuˇda‸ mvuhˇmiˬ hkʼaw mawˇ jeˬ maˇ maˇ gʼa veu laˇ ve pa taw ha lehˬ jaˇ leh hti caˇ hti dawˬ chehˇ taˍ ve yoˬ. 17Shawˉ pawˍ teˇ na‸ Daˍviˆ tu leh mvuhˇ hpeu‸ la htaˇ hkʼa gaˬ yawˇ hui hta‸ bawˆ da‸ ve yoˬ. Kaˍlaˍoˆ ciˇ leh gʼuiˇ hpaw-e ve yaˇ nehˬ 400 gʼaˇ maˇ heˆ kʼo, teˇ gʼaˇ ka‸ maˇ ponˬ. 18Aˍmaˍlehˆ chaw hui hpeh kʼai taˍ ve chaw hkʼa peu-eˬ leh yawˇ ve awˬ miˇ ma nyiˇ gʼaˇ hta‸ Daˍviˆ htaiˍ hkʼaw‸ piˇ ve yoˬ. 19Yawˇ hui ve mawˇ htawˇ te‸ chiˉ ka‸ maˇ mehˉ. Yawˇ hui ve yaˇ paˍ yaˇ miˇ hkʼa peu-eˬ leh, Aˍmaˍlehˆ chaw hui yuˬ kʼai taˍ ve mawˇ jeˬ hkʼa peu-eˬ hta‸ yawˇ hui kʼaw‸ gʼa hkʼaw‸ ve yoˬ. 20Daˍviˆ lehˬ, ceˇ hkʼa peu-eˬ ve hta‸ htawˇ kʼaw‸ gʼa hkʼaw‸ ve yoˬ. Yawˇ ve ma‸ yaˇ teˇ hpaˍ lehˬ, ceˇ oˇ ve teˇ hpaˍ hta‸ Daˍviˆ gʼuˇ suhˍ gʼa‸ veu laˇ leh, Chi teˇ hpaˍ lehˬ Daˍviˆ ve mawˇ hpeh‸ ve yoˬ, teh‸ kʼoˆ ve yoˬ.
21Oˇ ve hkʼaw‸ nawˉ yawˇ hui lehˬ Beˍtawˍ iˉ kaˆ lawˬ lo chehˇ taˉ ve chaw 200 gʼaˇ geh kʼaw‸ kʼo‸-e ve yoˬ. Yawˇ hui lehˬ Daˍviˆ leh yawˇ ve ma‸ yaˇ teˇ hpaˍ hta‸ ca ha‸ yuˬ la tuˬ laˬ ve yoˬ. Daˍviˆ htawˇ, yawˇ hui hta‸ ha lehˬ ha kʼa ha‸ yuˬ leh tawˇ yaw piˇ ve yoˬ. 22Ya‸ hkʼaˇ, Daˍviˆ geh kʼai taˍ ve chaw haiˬ teˇ hpaˍ hpaˍ lehˬ, Yawˇ hui ngaˬ hui geh maˇ laˬ. Chi hta‸ pa taw, ngaˬ hui gʼa taˍ ve mawˇ yawˇ hui hta‸ maˇ pehˬ piˇ-o. Yawˇ hui ve miˇ yaˇ hta‸ shiˍ leh tawˆ kʼai tcuh-o, teh‸ kʼoˆ ve yoˬ.
23Ya‸ hkʼaˇ, Daˍviˆ kʼaw‸ yaw hkʼaw‸ leh kʼoˆ ve, Awˬ chawˇ teˇ hpaˍ-oˬ, Gʼuiˬsha ngaˬ hui hta‸ pe‸ laˇ taˍ ve mawˇ hta‸ nawˬ hui chi hkʼe te maˇ hpeh‸. Gʼuiˬsha lehˬ, ngaˬ hui hta‸ ha‸ shaˉ laˇ leh, canˇ paˍ teˇ hpaˍ hta‸ ngaˬ hui ve la‸ sheh hkʼaw chiˇ a‸ laˇ taˍ peuˬ. 24Nawˬ hui kʼoˆ ve hkʼe chaw teˇ gʼaˇ ka‸ maˇ te gaˇ taˬ. Ngaˬ hui mawˇ hta‸ hkʼa ma-ehˬ gʼa pehˬ da‸ ve yoˬ. Hkʼaw‸ nawˉ paˉ lo caˇ tuˬ dawˬ tuˬ hta‸ shaw chehˇ taˉ ve chaw htawˇ, ma‸ bawˆ kuiˬ lo kʼai ve chaw hui gʼa ve hkʼa shuˍ gʼa cawˇ ve yoˬ, teh‸ yawˇ hui hta‸ kʼoˆ piˇ ve yoˬ. 25Daˍviˆ lehˬ, chi hkʼe awˬ liˇ teh taˍ ve yoˬ. Oˇ ve teˇ nyi hta‸ te leh, Iˉsaˍreˍlaˆ mvuhˇmiˬ hkʼaw lo awˬ liˇ chi hta‸ yehˇ chehˇ ve yoˬ.
26Daˍviˆ lehˬ, Ziˆkaˍlaˆ venˇ lo kʼaw‸ gaˬ la ve teˇ yanˇ, yawˇ gʼa taˍ ve mawˇ jeˬ teˇ hpaˍ hpaˍ, Yuˇda‸ mvuhˇmiˬ hkʼaw chehˇ ve awˬ hoˉ awˬ naˬ teˇ hpaˍ geh feu piˇ leh tawˇ chi hkʼe shanˍ feu piˇ ve yoˬ. Chi lehˬ, Gʼuiˬsha ve canˇ paˍ teˇ hpaˍ geh ngaˬ hui hiˉ yuˬ gʼa taˍ ve mawˇ hpeh‸ ve yoˬ, teh‸ kʼoˆ ve yoˬ. 27Yawˇ lehˬ, la‸shawnˍ chi teˇ hpaˍ hta‸ ponˬ laˬ htaˇ yawˇ ca hpaw va‸ taˍ jaw ve Beˍteˍlaˆ, Yuˇda‸ mvuhˇmiˬ awˬ hawˉ teˇ tawn lo cawˬ ve Raˍmaˆ, Yaˍtiˇraˆ, 28Aˍyawˍ, Shiˉhpaˍmoˆ, Eˇshaˍteˍmawˇ, 29Keˍmeˍlaˆ, Yeˍraˆmeˍlaˆ chaw hui ve venˇ teˇ hpaˍ, Keˍniˆ chaw hui ve venˇ teˇ hpaˍ, 30Hawˇmaˍ, Beˍraˍshanˍ, Aˍtehˇ leh, 31Heˍbronˍ venˇ chi teˇ hpa hkʼaw chehˇ ve chaw hui hta‸ feu piˇ ve yoˬ.
Currently Selected:
1 Saˍmo-eˍlaˆ li‸ 30: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.