1 Saˍmo-eˍlaˆ li‸ 29
29
Hpiˇliˇtiˆ chaw Daˍviˆ hta‸ kʼo‸-e tcuh ve
1Hpiˇliˇtiˆ chaw teˇ hpaˍ lehˬ, yawˇ hui ve ma‸ yaˇ hkʼa peu-eˬ hta‸ shiˍ veu laˇ leh, Aˍhpehˆ venˇ hkʼaw deh chehˇ taˍ ve yoˬ. Iˉsaˍreˍlaˆ chaw teˇ hpaˍ lehˬ, Yeˍzaˍreˍlaˆ lawˬ hkʼo‸ iˉ kaˆ tawˆ kuiˬ lo deh chehˇ taˍ ve yoˬ. 2Hpiˇliˇtiˆ ma‸ poˍ lonˉ ngaˇ gʼaˇ lehˬ, yawˇ hui ve ma‸ yaˇ teˇ ha gʼaˇ kʼo teˇ moˍ, teˇ hinˉ gʼaˇ teˇ moˍ te leh, awˬ moˍ awˬ moˍ te tawˆ la chehˇ ve yoˬ. Daˍviˆ leh yawˇ ve ma‸ yaˇ teˇ hpaˍ lehˬ, Aˍhkiˆ geh teˇ geh shu hkʼaw‸ nawˉ lo laˬ chehˇ ve yoˬ. 3Oˇ htaˇ Hpiˇliˇtiˆ ma‸ poˍ lonˉ teˇ hpaˍ lehˬ, Heˍbrehˇ chaw chi teˇ hpaˍ choˬ kaˬ aˬ hto‸ ma te chehˇ ve le, teh‸ kʼoˆ ve yoˬ.
Aˍhkiˆ kʼaw‸ yaw hkʼaw‸ leh kʼoˆ ve, Chaw chi hpaˇ lehˬ Iˉsaˍreˍlaˆ jawˇmawˇ Sawˉlu‸ ve ma‸ poˍ lonˉ Daˍviˆ hpeh‸ ve yoˬ. Yawˇ ngaˬ geh chehˇ taˍ ve hkʼa cawˇ maw peuˬ. Yawˇ ngaˬ geh gaˬ la ve teˇ nyi hta‸ te leh ya‸ nyi hkʼa gaˬ, ngaˬ yawˇ hta‸ venˇbaˆ taˍ kuiˬ teˇ ceuˬ ka‸ maˇ mawˬ, teh‸ kʼoˆ ve yoˬ.
4Oˇ htaˇ Hpiˇliˇtiˆ ma‸ ponˍ lonˉ oˇ ve teˇ hpaˍ nyi ma zuhˆ leh kʼoˆ ve, Chaw chi hpaˇ hta‸ nawˬ piˇ taˍ ve venˇ lo kʼaw‸ kʼo‸-e peu-o. Yawˇ hta‸ ngaˬ hui geh ma‸ bawˆ kuiˬ lo taˇ kʼai tcuh. Aˬ muiˬ ma‸ bawˆ kuiˬ lo ngaˬ hui hta‸ kʼaw‸ hpfuhˆ bawˆ la naˍ maˇ shiˍ. Yawˇ ve awˬ shehˍ hpaˇ yawˇ hta‸ kʼaw‸ ha‸ la tuˬ, ngaˬ hui ve ma‸ yaˇ teˇ hpaˍ hta‸ tiˇ pehˍ piˇ ve a‸ kehˉ da‸ ve kanˉ aˬ hto‸ ma cawˬ sheˍ le. 5Sawˉlu‸ lehˬ, chaw awˬ hinˉ gʼaˇ hta‸ tiˇ pehˍ ve yoˬ. Daˍviˆ lehˬ chaw awˬ meunˍ gʼaˇ hta‸ tiˇ pehˍ ve yoˬ, teh‸ yaˇ miˇ teˇ hpaˍ kʼa muiˬ hkawˇ kʼa leh chiˇ mvuh piˇ ve lehˬ, chi hpaˇ hta‸ kʼoˆ ve maˇ heˆ laˇ, teh‸ kʼoˆ ve yoˬ.
6Oˇ htaˇ Aˍhkiˆ Daˍviˆ hta‸ kuˬ leh kʼoˆ ve, Nawˬ lehˬ ngaˬ hta‸ ka ti‸ yeˬ ve chaw hpeh‸ ve yoˬ. Ngaˬ nawˬ hta‸ ngaˬ geh teˇ geh ma‸ bawˆ kuiˬ lo kʼai piˇ gaˇ jaˇ ve hta‸ te‸ chehˇ ve Gʼuiˬsha hta‸ cuˇ leh hkanˍ hpeh‸ ve yoˬ. Nawˬ ngaˬ geh gaˬ la ve teˇ nyi hta‸ te leh ya‸ nyi hkʼa gaˬ, nawˬ hta‸ venˇbaˆ taˍ kuiˬ teˇ ceuˬ ka‸ maˇ mawˬ. Ya‸ hkʼaˇ, awˬ nu ve Hpiˇliˇtiˆ ma‸ poˍ lonˉ teˇ hpaˍ nawˬ hta‸ ma‸ bawˆ kuiˬ lo maˇ kʼai tcuh piˇ lawˬ gaˇ ve law. 7Chi hta‸ pa taw, nawˬ gawˬ lehˍ ve hkʼaw nawˬ ve yehˬ lo kʼaw‸ kʼo‸-e loˬ. Yawˇ hui nyi ma maˇ cawˇ ve kanˉ hta‸ htawˇ taˇ te, teh‸ yawˇ hta‸ kʼoˆ piˇ ve yoˬ.
8Oˇ htaˇ Daˍviˆ lehˬ, Ngaˬ aˬ hto‸ ma te ya‸ kuiˬ cawˬ le. Jawˇmawˇ-oˬ, ngaˬ nawˬ geh gaˬ la ve teˇ nyi hta‸ te leh ya‸ nyi hkʼa gaˬ, nawˬ ngaˬ hta‸ venˇbaˆ taˬ kuiˬ teˇ ceuˬ ka‸ maˇ cawˬ. Ngaˬ ve jawˇmawˇ-oˬ, nawˬ ve canˇ paˍ teˇ hpaˍ hta‸ ca bawˆ tuˬ, aˬ hto‸ ma pa taw ngaˬ hta‸ maˇ kʼai tcuh laˇ ve le, teh‸ yawˇ hta‸ kʼoˆ piˇ ve yoˬ.
9Aˍhki ˆ kʼaw‸ yaw hkʼaw‸ leh kʼoˆ ve, Ngaˬ shiˍ chehˇ ve yoˬ. Nawˬ lehˬ Gʼuiˬsha ve mvuhˇ naw ma tcuh yaˇ teˇ gʼaˇ hkʼa shuˍ ka ti‸ yeˬ jaˇ ve hta‸ ngaˬ hui shiˍ taˍ ve yoˬ. Ya‸ hkʼaˇ, awˬ nu ve ma‸ poˍ lonˉ teˇ hpaˍ nawˬ hta‸ ma‸ bawˆ kuiˬ lo kʼai tcuh piˇ maˇ hpeh‸ teh‸ kʼoˆ ve yoˬ. 10Chi hta‸ pa taw Daˍviˆ-oˬ, shawˉ paw kʼo Sawˉlu‸ geh hkʼa hpaw tawˆ la leh ngaˬ geh ca chehˇ la taˍ ve nawˬ ve ma‸ yaˇ hkʼa peu-eˬ ve hta‸ shiˍ veu leh, teˇ na‸ tu kʼo‸-e loˬ, teh‸ Daˍviˆ hta‸ kʼoˆ piˇ ve yoˬ.
11Hkʼe te leh, shawˉ pawˍ mvuhˇ shawˉ teˇ na‸ Daˍviˆ lehˬ, yawˇ ve ma‸ yaˇ teˇ hpaˍ hta‸ shiˍ leh Hpiˇliˇtiˆ mvuhˇ lo kʼaw‸ kʼo‸-e ve yoˬ. Hpiˇliˇtiˆ ma‸ yaˇ teˇ hpaˍ lehˬ Yeˍzaˍreˍlaˆ venˇ lo kʼai ve yoˬ.
Currently Selected:
1 Saˍmo-eˍlaˆ li‸ 29: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.