Johani 20
20
Jeso Wabuka
(Matayo 28:1-8; Maako 16:1-8; Luka 24:1-12)
1Cifwumo fwumo mu buzuba butaanzhi bwa nsunda kaacishiya anshi, Maliya Magadalena wakaya ku cuumbwe, inzho wakabona ati ibwe lyakushiwa amulyango wa cuumbwe kalitewo. 2Wakapiluka wakalukanka kuya kwa Saimoni Pita ukwa wezo shiciiya ngwaakaakufwini Jeso, wabambila ati, “Bamukusha Mwami mu cuumbwe, tatukwizhi nkubamutola!”
3Ubobo Pita u wezo shiciiya bakaya ku cuumbwe. 4Boonse kabaya bulukanka pele wezo shiciiya uumwi wakamushiya Pita, wakataanguna kushika ku cuumbwe. 5Naakashika wakasondela, wakabona shisani shililundene, pele wiina naakanjila mu cuumbwe. 6Saimoni Pita, wakaakumucilile munshi, naakashika, wakenjila mu cuumbwe. Wakabona shisani shililundene. 7Pele kasani kakaakwaanjilwe ku mutwi wa Jeso, kalo kakahunjilwe ambali ice. 8Ngoonaawo aze shiciiya wakataanguna kushika ku cuumbwe naakanjila. Wakabona u kushoma. 9Pele kabatana kwaateelelesha Malembe aamba ati Jeso ulakabuka ku bafwu.
Jeso Walibonya kwa Maliya Magadalena
10Ba shiciiya bakabweela kumaanda abo. 11Pele Maliya wakashaala ulizhimine ansengwe acuumbwe ulalila. Inzho naakaakulila, wakoonga wasondela mu cuumbwe 12wakabona baanjelo bobile balisamine shisani shituba balishite awo akaakulele mubili waka Jeso, umwi ku mutwi umwi kumatende.
13Bakamubuzha ati, “Anu ulilaanzhi mukaintu?”
Wakaingula ati, “Bamutola Mwami wangu nshikwizhi nkubamubika.” 14Amane wakacebuka kumanuma wabona Jeso ulizhimine pele wiina naakamuzhiba.
15Jeso wakamubuzha ati, “Mukaintu, no ulilaanzhi? Nguni nguukapula?” Mukuzunga ati ngumukamwini muunda, Maliya wakaamba ati, “Mwami, naa ndiwe uwamukusha, nshimwina nkuwamubika nkamubweze.”
16Jeso wakaamba ati, “Maliya!” Maliya wakacinduluka wamulangilila waamba muci Alamaiki ati, “Laboni” calo caamba ati, “Mwiiyi.”
17Jeso wakaamba ati, “Utankwati kaambo nshina kupiluka kwa Taata. Koya bulyo ku bakwesu ukabaambile ati, ‘Ndaya kwa Taata uuli ngu uswenu. Leza wangu, amwe ngu Leza wenu.’ ”
18Maliya Magadalena wakaya ku bashiciiya kutola mulumbe wezu wakuti, “Ndamubona Mwami!” Amane wakabashimwina shoonse nshaakamulailila.
Jeso Walibonya ku Bashiciiya
(Matayo 28:16-20; Maako 16:14-18; Luka 24:36-49)
19Kumangolezha mu buzuba bobo, buzuba butaanzhi bwa nsunda, ba shiciiya nibakaakubungene, shitendele kashiingilwe kutiya ba Juda, Jeso wakeza wazhima akati kabo waamba ati, “Luumuno alube amwe!” 20Amane kwaamba bobo wakabatondezha matashi aakwe uciteku. Ba shiciiya bakasapwa nibakamubona Mwami. 21Jeso wakaamba ulimwi ati, “Luumuno alube amwe! Umbona mbwaakantuma Taata ndamutuma amwe.” 22Amane wakabazozela waamba ati, “Amutambule Moza Usalala. 23#Mat 16:19; 18:18Kuti mwabalekelela kufwumbwa muntu shibi shilalekelelwa, pele kuti mwiina kushilekelela tashilekelelwa.”
Jeso u Tomasi
24Inzho umwi wa ba shiciiya bali ikumi ubatwesha bobile, Tomasi uutewa ati wamaanga katewo ciindi Jeso naakeza. 25Ubobo ba shiciiya bakamushimwina ati, “Twamubona Mwami!”
Pele Tomasi wakaamba ati, “Ume nshishomi cita nkeebone mikofwu ya nembe ukunjizha minwe yangu aciteku.”
26Kwiite insunda yomwi ba shiciiya bakaakuliyalilile muŋanda, ciindi ceco aze Tomasi kalimo. Shitendele kashiingilwe pele Jeso wakeza wazhima akati kabo waamba ati, “Luumuno alube amwe!” 27Amane wakamwaambila Tomasi ati, “Bika momu munwe wako, ulimwi tandabika itashi lyako aciteku cangu. Leka kuzuluzha, shoma.”
28Tomasi wakaamba ati, “Mwami wangu ulimwi u Leza wangu!”
29Amane Jeso wakamwaambila ati, “Sa washoma kaambo wambona? Balilonjelwe coolwe babo batana kumbona pele balashoma.”
Muzeezo Webuka lya Johani
30Jeso wakacita shitondezho shinji shinji amenso a ba shiciiya bakwe azo aatalembelwe mwibuka leli. 31Pele alo aza akalembwa kwaamba mushome ati Jeso ngu Kilisito, Mwanaa Leza ulimwi mukumushoma muyane bumi mwizhina lyakwe.
Currently Selected:
Johani 20: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.