Johani 19
19
Jeso Wabetekwa
1Ngoonaawo Pilato wakalailila ati Jeso aumwe tulusu. 2Bashikalumamba bakapanga mushini wameya, bakamusamika ku mutwi, bamane bakamusamika icanshi lya cilambo ca bwami ca shicisu. 3Kabaya kwakwe kumusaalizha ati, “Wabonwa Mwami waba Juda!” Ukumuuma inkumbazhi. 4Pilato wakahwa ansengwe ulimwi waambila ba Juda ati, “Ndamuleta ansengwe kwaamba muzhibe ati wina mulandu muntu wezu!” 5Ubobo Jeso bakamukusha ansengwe kasamine mushini wameya icanshi lya cilambo ca shicisu. Inzho Pilato wakabeta ati, “Nguwezu mulombwana!”
6Bapaizhi bakando u balindilizhi ba ŋanda ya Leza nibakamubona Jeso, bakapozomoka ati, “Naakankaminwe a ciciinkano! Naakankaminwe a ciciinkano!” Pilato wakaamba ati, “Amumutole mukamukankamine nubeni, nkaambo ume ndiina kumuyanina mulandu.” 7Ba Juda bakamwita ati, “Tulikwete mulawo uututondezha ati wezu muntu ulyeelele kufwa, kaambo ulalyaamba ati Mwanakwe Leza.”
8Pilato naakateelela mazwi aza, wakatiya cini cini. 9Ubobo wakanjila ulimwi mwibetekelo wamubuzha Jeso ati, “Anu uhwa kwi?” Jeso wiina nakaingula. 10Inzho Pilato wakamwaambila Jeso ati, “Sa tuzanda kunshimwina? Sa twinzhi ati ndikwete insana shakukwangulula u shakukukankanina?” 11Jeso wakamwiingula ati, “Niwaakwiina insana kuti niwatakapewa kuhwa kwizeulu insana shakubeteka pe. Nikuba bobo wezo wakantuma kwako ulikwete cibi cikando.”
12Pilato naakateelela bobo kazanda kumwangulula, pele bakando baba Juda bakapozomoka ati, “Kuti na umwaangulule muntu wezu ati, tuli mulongwaakwe muleli mukando waku Loma. Kufwumbwa muntu ulipa kami kami ati ngushinkondonina Kaisala, mweendelezhi mukando waku Loma.” 13Pilato naakateelela mazwi aza, wakamukusha Jeso ansengwe, ukumukalika a cuuna cakubetekela, abusena butewa ati, Lubanza lwa Mabwe, muci Alamaiki balaamba ati Gabata. 14Inzho kabuli buzuba bwakulibambila Ipobwe lya Kwiitilila, ciindi ceshikati. Pilato wakaambila ba Juda ati, “Nguwezu Mwami wenu!”
15Balo bakapozomoka, “Tatumuzanda, tatumuzanda! Naakankaminwe a ciciinkano!” Pilato wakabeta ati, “Sa ndakonzha kukankamina Mwami wenu?” Bapaizhi bakando bakaamba ati, “Twiina unji mwami kunze lya muleli mukando waku Loma.” 16Ngoonaawo wakabapa mu matashi abo kwaamba ati bakamukankamine.
Ubobo bakamukwata bamutola kuya kumukankamina.
Jeso Wakankaminwa
(Matayo 27:32-44; Maako 15:21-32; Luka 23:26-43)
17Wakabweza mwini ciciinkano cakwe wakaya kushika kubusena butewa ati, Kaanza muci Alamaiki ati Gologota. 18Koko bakamukankamina antoomwi u balombwana bobile, umwi kuluya lumwi uumwi kuluya lumwi, Jeso kali akati kabo. 19Pilato wakalemba cizhibyo caamba ati, “Jeso waku Nanzaleta, Mwami waba Juda,” calo cakabikwa ezeulu aciciinkano cakwe Jeso. 20Bantu banji banji bakacibala nkaambo bobo busena kabuli afwaafwi u munzhi ulimwi kacilembelwe muci Alamaiki, umuci Latini umuci Giliki. 21Bakando babapaizhi bakamwita Pilato ati, “Utalembi ati Mwami waba Juda pele lemba ati, ‘Kaamba ati ndi Mwami waba Juda.’ ”
22Pilato wakaingula ati, “Ncindalemba ndalemba.”
23Bashikalumamba nibakamana kumukankamina Jeso bakashaapaula shisani shakwe mu shipanzha shone kwaamba boonse bazululie. Ulimwi bakabweza cikobelo cakwe cakaakwiina mubundo kacili comwi bulyo kuhwa kwizeulu mpaka anshi. 24#Inte 22:18Bakaamba ati, “Ceci tutacizapula atucuumine bulyo cisolo kwaamba tubone uukacitola.” Ceci cakacitwa kuzuzucizha Malembe aamba ati,
“Bakashaabana shisani shangu akati kabo beni bamane bacuumina cisolo cikobelo cangu.” Nciceci ncibakacita bashikalumamba.
25Kumbali kuciciinkano caka Jeso kakuzhimine baina Jeso, u munina baina, u Maliya muka Kulopasi antoomwi u Maliya Magadalena. 26Jeso wakamubona baina u shiciiya ngwaakaakufwini balizhimine amane wamwaambila baina ati, “Mukaintu, nguwezo mwanako.” 27Amane wakaambila shiciiya ati, “Nguwezo banoko.” Kuhwaawo, wezo shiciiya wakamubweza baina Jeso kuya kumulela.
Kufwa kwa Jeso
(Matayo 27:45-56; Maako 15:33-41; Luka 23:44-49)
28 #
Inte 69:21; 22:15 Inzho Jeso naakabona ati shoonse shintu shazulila ulimwi ukuzuzukizha cishinshime, wakaamba ati, “Ndafwa inyota.”
29Bakaleta impawo yakaakuzwile waini ulula, bamane bapanga inshisa yakasamu ka hisopu beetoba bamupa, 30amane kusola waini ulula wezo, Jeso wakaamba ati, “Kwamana.”
Ku mazwi aza wakoofwulika mutwi amane wafwa.
Jeso Bamuyasa ku Citeku
31Ukaambo kakuti kabuli buzuba bwa mucisanu bwakulibambila, ulimwi Ba Juda kabatazanda kwaamba ati mibili ikuli ashiciinkano mu buzuba bwa Sabata. Ubobo bakando baba Juda bakamukumbila Pilato kwaamba babo bakaakuli ashiciinkano bakombaulwe maulu bakushiwe ashiciinkano. 32Ubobo bashikalumamba bakaya babakombaula maulu a mutaanzhi, bamane baya kuli uumwi wa babo bakakukankamininwe u Jeso. 33Pele nibakashika kwa Jeso bakayana ati wafwa kale ubobo bayina nibakaakombaula maulu aakwe. 34Pele umwi wabashikalumamba wakabweza isumo wamuyasa mu citeku, awo ngoonaawo kwakapoomoka meenzhi u bulowa. 35Muntu wakacibona ceci wakapa bumboni, ulimwi bobu bumboni bulishinizhe kwaamba ati amwe mushome. Ulimwi ulizhi ati ncaamba ncalushinizho. 36#Kul 12:46; Mye 9:12; Inte 34:20Sheshi shintu shakacitwa kuzuzucizha Malembe aamba ati, kwiina cifwuwa cakwe niciba comwi cikaacolwa. 37#Zaka 12:10; Cizu 1:7Ulimwi kuli Malembe aamba ati, balakamulanga wezo ngubakayasa.
Kuzhikwa kwa Jeso
(Matayo 27:57-61; Maako 15:42-47; Luka 23:50-56)
38Kuhwaawo Jozefu waku Alimataya wakakumbila mubili waka Jeso kwa Pilato kwaamba oobweze. Wezo Jozefu aze kali shiciiya waka Jeso pele ukaambo kakutiya ba Juda kazubaila. Bamuhuminye bulyo wakoobweza. 39#Joh 3:1, 2Nikodimasi wezo wakaakuswaile Jeso mashiku, wakeza waletelezha utununcilizho tuhwele mila u aloyi tulema makilo ali makumi otatwe. 40Baba balombwana bobile bakoobweza mubili waka Jeso ukuuhungaila mwisani lya telelini ukumunanika tununcilizho toto umbona mbuli tunshiyanshiya twakuzhikwa twaci Juda. 41Koko nkubakamukankaminina Jeso kakuli muunda. Momo mu muunda kamuli cuumbwe ciina wakaakuzhikilwe mo. 42Ubobo ukaambo kakuti kabuli buzuba bwakaakutewa ati bwaca mulaba mu Sabata, ulimwi cuumbwe mbucakaakuli afwaafwi bakamuzhika Jeso momo mu cuumbwe.
Currently Selected:
Johani 19: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.