2 Pita 2
2
Ba Maayi Babeshi
1Pele abo bashinshimi babeshi bakalibonya akati ka bantu, umbona mbukukaaba ba maayi babeshi akati kenu. Balakakanka kufwifwilisha mizeezo itazaci injiisho shakuzonauna, ulimwi balakamukaka Mwami wabo wakabanununa. Inzho balakaliletela beni kuzonaunwa. 2Nikuba bobo, banji banji balakacilila busofwaazhi bwabo. Ulimwi ukaambo ka shintu nshibacita bantu banji banji balakakanka kusampaula inzhila ya lushinizho. 3Mu kuzanda kuhuba balakasebezha mazwi a kubumba alucengo. Pele cisubulo cabo ncibambe kale, ulimwi ako kuzonaunwa kwabo kulabalindila.
4Nkaambo Leza wiina naakabalekelela baanjelo bakabisha, pele wakabawaala kubusena bukala bafwu ku mushinze ushiya mbi, nkubaanjilwe inceetani kulindila lubeta. 5#Mata 6:1—7:24Ulimwi Leza wiina naakabalekelela bakale kale, wakafwutula bulyo Nowa wakaakukambauka makani abululami, kubicilizha ubamwi bali ciloba, ciindi naakatuma muyoba wezambangulwe ku bantu batakamutiya Leza. 6#Mata 19:24Leza wakabeteka minzhi ya Sodomu u Gomola. Wakeetenta umulilo mpaka kwakashaala bulyo itwe, wakeecita kwaamba cibe citondezho ku bantu babo batatiyi Leza. 7#Mata 19:1-16Pele wakafwutula Loti, walo mululami wakakwata isukusho umbweende bwabashimucita shibi mu mamfwunze abo akubula mulawo. 8Nkaambo muntu wezo ululeme nakaakukala akati kabo, mazuba oonse wakaakupenga mu monzo wakwe mulondoshi nkaambo ka milimo yabo mibiyabi njakaakubona u kuteelela. 9Inzho Mwami Leza ulizhi mbwaafwutula bantu bakwe bamukomba mbaahuna kuhwa kumasunko, ulimwi ulizhi mbwakaabeteka bataluleme kwaamba bakasubulwe mu buzuba bwa lubeta. 10Kwaamba ashinizhe, ulakapa cisubulo babo beenda mu shisushi shabo shabuntu kubicilizha u babo basampaula bwami shilengwa shabulemu bwa Leza. 11Nibakaba baanjelo ubabaala insana u bukando ku shilenje shoonse, tabaleti mulandu wakusampaula babo balemekwa kumbele lya Leza. 12Bantu baba bali ukoya banyama bayina maanu, bakalengwa ati bakukwatwa ukuyaiwa. Balasampaula shintu nshibatezhi. Balalwisha bamwi bantu u kutukana matushi ku shintu nshibatezhi. Balakayayiwa ukoya banyama ba mwisokwe. 13Umbona mbubakapenzha bantu bamwi, abo balakapenzhewa. Nkaambo balabotelwa inzhila shabo shalucengo, balasapwa mukulya u kunwa munzhila shisesemya lumwi lubala. 14Menso abo lyoonse ngamamambe taaleka kubisha. Baloonjelezha batana kushima mu lushomo. Myonzo yabo ilizhibile kuweza lubono. Mbashinganye kwa Leza. 15#Mye 22:4-35Beeshiya inzhila iluleme, bamane batola inzhila yaka Balamu mwanakwe Beyo, wakaakuzandisha impindu mukucita shibiyabi. 16Imbongolo yakwe yakamukazha ukaambo kakulubizha kwakwe. Imbongolo munyama utaamba, yakaamba izwi lyabuntu, kumulesha busondoshi mbwakaakumukwete mushinshimi wezu.
17Baba ba maayi babeshi bali ukoya tulonga twiina meenzhi, ukoya ingubi iya butonkwa ikunku. Leza wakababambila busena bwa mushinze ushiya mbi. 18Balakanana mazwi akulyeensheensha, a buntu bwabo bwamamfwunze, baloonjelezha beenzhinokwabo bazanda kufwutuka kuhwa ku shibi sheshi kwaamba balubizhe ulimwi. 19Balabashomezha lwaanguluko nikuba ati balo beni mbazhice ba shintu shibiyabi shizonauna bumi. Nkaambo muntu ulaba muzhice waceco ncazanda. 20Nkaambo kuti bantu bahunwa kuhwa ku busofwaazhi bwa anshi mukuzhiba Mwami wesu, Mufwutuli wesu Jeso Kilisito, pele kwamana awo bapiluka ulimwi bazundwa ku busofwaazhi, meni meni ngakuti baba bantu balakabiya kubaala mbubakaakubele akutaanguna. 21Nicaakuli cibotu kwaamba nibatakeezhiba bulyo inzhila ya bululami, kubaala kwaamba ati bataangune kwiizhiba bamana ku mamanino bakuhwe ku Mulawo Usalala, Leza ngwaakabapa. 22#Tush 26:11Nibacita bobo, balatondezha ati kashimpi kaka kalishinizhe kaamba ati, “Mubwa ulapilucila kucilushu cakwe” ulimwi “Ingulube insanzhe ilabweela ukwaalabana muntimba.”
Currently Selected:
2 Pita 2: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.