1 Bakolinto 3
3
Usha Kutateelezhanya mu Mbungano
1Inzho ume nubakwesu, ncintakonzha kumwaambila ukoya bantu ba Moza Usalala, pele ndakamwaambila ukoya bantu bamubili bacili bana bashoonto mwa Kilisito. 2#Bahi 5:12, 13Ndakamusanina mukupa kutali cilyo cizumu. Nkaambo kamutalibambile kulya cilyo cizumu, uninzho tamulibambile. 3Nkaambo mucili bantu baku mubili, akati kenu kuli munyono u kuzwangana. Ceci ncicitondezha ati mucili mu buntu, ulimwi mulacilila u kucita shabuntu. Sa tacitondezha ati mucili bantu ba mubili, ulimwi mulapona muzhila ya buntu? 4#1 Bako 1:12Nkaambo bamwi balaamba ati, “Uswe tulacilila Paulu,” bamwi ati, “Uswe tulacilila Apolosi,” sa tamuli ukoya bantu bulyo?
5Nikuba bobo, anu Apolosi nguni? No Paulu aze nguni? Inta toonse tuli batwanga ba Leza ubakamuleta ku lushomo. Umwi uumwi wesu ulasebeza mulimo ngwaakapewa u Mwami. 6#Inc 18:4-11; Inc 18:24-28Ume ndakashanga, Apolosi wakatuntulila, pele upa ati shimene ngu Leza. 7Amubone, uushanga naaba shikutuntulila, kwiina umbwaabele, cita bulyo Leza uushipa kukomena. 8Wezo uushanga u wezo uutuntulila, boonse balikozhene bulyo, ulimwi umwi uumwi ulakatambula bulumbu bwakwe bumweelele kuhwa kwa Leza. 9Nikuba bobo tuli bashimilimonina Leza, tulasebeza antoomwi, umwe muli muunda wa Leza, ulimwi muli mazake a Leza.
10Kwiita mu luse ndwaakampa Leza, ndakazaka intalisho ukoya muzashi muuza, pele uuzaka antalisho yezho ngunji. Inzho muzashi umwi uumwi, acenjele mbuli mbwaayelele kuzaka. 11Nkaambo kwiina uukonzha kuzaka intalisho iinji kubaala yezhi yakabikwa kale. Intalisho yezhi ngu Jeso Kilisito. 12Antalisho yezhi, muntu ulakonzha kuzaka ulubulo lwa goludi, u siliva, naaba mabwe meebeshi, nikuba u masamu, bwizu naaba mabu. 13Mulimo wa muntu woonse ulakabonwa, nkaambo mu buzuba bwa lubeta shilakatondezhewa. Buzuba bobo bulakashika u mulilo, ubobo mulilo ulakazubulula milimo ya muntu umwi uumwi mbwiibele. 14Kuti shesho muntu nshaakazaka antalisho tashipiile, muzashi wezo ulakatambula bulumbu. 15Pele kuti naa mulilo watenta buzake, muzashi wezu ulakazhimininwa shintu shoonse, nikuba bobo ulakafwutulwa, pele ukoya welya muntu wazokolwa mu mulilo. 16#1 Bako 6:19; 2 Bako 6:16Sa tamwizhi ati umwe muli iŋanda ya Leza, ukuti Moza wa Leza uli muli umwe? 17Kufwumbwa wezo uzonauna iŋanda ya Leza, aze Leza ulakamuzonauna. Nkaambo iŋanda ya Leza ilasalala, ubobo umwe ndimwe iŋanda ya Leza.
18Mutalicengi nubeni. Kuti na umwi akati kenu kalitelaisha ati musongo mu ciindi ceno mu kwaamba shintu shaluundu, ulyeelele kulicita ukoya muntu mulimbushi, kwaamba abe musongo mwini mwini. 19#Jobo 5:13Kayi busongo bwaku mibili, mbulimbushi kwa Leza. Nkaambo kulilembelwe ati, “Leza ulabakwasha basongo umbumpelenje bwabo.” 20#Inte 94:11Ulimwi Malembe alaamba ati, “Mwami ulizhi ati, matelaishi abo ngabulyo.” 21Ubobo kutabi muntu ulikankaizha ku bantu nina, nkaambo shintu shoonse nshenu. 22Naaba Paulu na Apolosi na Pita niiba inshi yezhi u bumi u lufwu u shesho shiliko ushiciza kumbele, nikuba kuti shoonse nshenu, 23umwe muli bakwe Kilisito, aze Kilisito ngwaka Leza.
Currently Selected:
1 Bakolinto 3: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.