1 Bakolinto 2
2
Makani a Kilisito Wakakankaminwa
1Ubobo nubakwesu indakeza kwenu, ndiina kwiza kumukambaukila makani maseseke a lushinizho azo Leza ngaakatuzubulwila mu mazwi a buuza akulitondezha busongo. 2Nkaambo ndakalisalila kutazhiba cintu niciba comwi akati kenu, cita bulyo Jeso Kilisito wezo wakankaminwa a ciciinkano. 3#Inc 18:9Ubobo ndakeza kwenu, mubulengushi umubukandu u kuzhangama cini cini. 4Mu kwaamba kwangu umu kukambauka kwangu, ndiina kusebezha mazwi aakweenzelezha, pele ndakasola kusandula ukuleta bantu, munzhila yakutondezha insana sha Moza Usalala, 5ndakacita bobo kwaamba lushomo lwenu lutazhimi a busongo bwa muntu, pele munsana sha Leza.
Busongo Buhwa ku Moza Usalala
6Pele akati kenu umwe numwakashima tulasebezha mazwi a busongo, nikuba kuti busongo bobu tabuli bwa bantu naa bwabaleli baanshi ano, babulelo bumana. 7Pele busongo mbutwaamba mbusongo bwa Leza bwa maseseke akwe. Bobo Leza mbwakaambilizha katana kulenga inshi, busongo bwakuleta bulemu kulyuuswe. 8Kwiina naaba womwi wa baleli ba anshi ano ubwizhi busongo bobu, nkaambo kuti nibakaakubwizhi, nibatakamukankamina aciciinkano Mwami wa bulemu. 9#Aiz 64:4Pele umbona mbukulembelwe ati,
“Shesho muntu nshaatakabona naa kuteelela,
shesho muntu nshaatakatelaika,
inshisho Leza nshaakabambila babo bamufwini.”
10Pele uswe, Leza wakatuzubululila sheshi kwiita mu Moza Usalala. Nkaambo Moza Usalala ulalingula shintu shoonse naaba maseseke a Leza. 11Sa kuli muntu uuzhi matelaishi a muntunina? Kwiina, cita bulyo moza wa muntu uuli mukati mwakwe. Umbona bobo kwiina muntu ukonzha kuzhiba shintu sha Leza kunze lya Moza wa Leza. 12Uswe twiina nitwakatambula moza wa anshi ano, pele twakatambula Moza uhwa kwa Leza, kwaamba ati atuzhibye shipo Leza nshaatupa mu luse lwakwe. 13Tulakambauka sheshi kutali u makani na mazwi ayiishiwa u busongo bwa buntu, pele bulyo u mazwi ayiishiwa u Moza wa Leza, ubobo tulapandulula shintu sha Moza wa Leza kuli babo bakwete Moza wa Leza.
14Inzho babo batali bamu Moza wa Leza, tabatambuli shintu sha Moza wa Leza, nkaambo bobu mbulimbushi nkubabele, ulimwi tabakonzha kushizhiba nkaambo sheshi shilazhibwa bulyo u Moza Usalala. 15Bantu bamu Moza, balakonzha kubeteka shintu shoonse, pele balo kwiina ukonzha kubabeteka. 16#Aiz 40:13 Cili ukoya mbwaamba Malembe ati,
“Anu nguni uzhi mizeezo ya Mwami?
No nguni ukonzha ku mulailila?”
Inzho uswe tulikwete mizeezo ya Kilisito.
Currently Selected:
1 Bakolinto 2: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.