TITUS 2
2
TITUS 2
1Titus, mɔɔ be, dɔgsumɔhi hinwɔ hi fɔk Bɛt dɔgl gaat bɔ gbɔnɔ rɔbtɔnɔ giya. 2Mɔ raa ɗɛntɛ wɔ a bɔhi yɔ̧ bum gi daarlɛlɛ; hi woo hinyɔ rii giya; hi hɔns zulya̧ bɛttɔnɔ, hi fɔb Bɛt dɔgl gbɔnɔ rɔbtɔnɔ hi ɗɔbsigi hi hato hi hinmɔŋki. 3Mɔ raa naadnɔwaat wɔ hɛw hi ɛmb ɛmbilya̧ rɔbtɔnɔ an dood gaatɛ a Bɛt muutdu. Bɔhi boo mɛl a dood zulha, bɔhi gi bum gbaarɛ; goksihi dood zaadɛ hinyɔ gi rɔbo.
4Goksihi nɛɛdsɛrɛ wɔ hin an gi ha̧a̧hi a walya̧ ge hi waatya̧ hi, 5hi wa̧a̧ zulya̧ rɔbtɔnɔ, bɔhi mɔk mansdɔglɛ, an hi woo woosya̧ a raadu rɔbtɔnɔ an waatsiŋdɛ rɔbɛ, hi laks walya̧ tɔnɛ, an bɔ dood zaadɛ hi boo ya̧a̧ha̧a̧l a Bɛt dɔgl muulɛ. 6Mɔ ɓats walɛsɛrɛ wɔ kpoosɛ an hi hɔns zulya̧ rɔbtɔnɔ.
7Mɔɔ hɛw, woom hinrɔb gii kpɔd an walɛsɛrɛ wɔ gɔ hi gbɛn ɛmbil mɔ hi fɔbɔ. Gɔ mɔ gisihi hingoko, mɔ goksihi hi gbɔnɔ rɔbtɔnɔ, dɔgl mɔ gi es kpoosɛ. 8Dɔgsumɔhi dɔgl gaat bɔ giya an bɔ doo za gi kpɛ̧ɛ̧l dɔglɔ, an bɔ dood wɔ ha̧a̧hi mɛlbook wɛ zulha hi zɛm hin-a̧a̧b a mɔ dɔgl bɔ gedu. Gɔ gi anbɔ seem gi wa̧a̧hi.
9Dɔgsum gbaarɛ wɔ hinɛ an hi tiis zulya̧ a ɗɛntɛya̧ dɔŋdi, hi woosihi hinyɔ gi sɛw rɔbtɔnɔ. Bɔhi faa dɔglya̧. 10Bɔhi loo hinya̧ za luurɛ; yɔ anbɔ, woohi hinrɔbo an baaya̧ hi ɗɛɛ kpoosya̧ gbaak a hi. Gɔ gi anbɔ, hinyɔ hi wook sɛw gi wɛɛn Bɛt Za̧a̧sigya wɛ hingokɔ bɔ hingbɔɔl yɔ dood sɛw hi gbɛnɔ hi mɛɛ a bɛɛrɔ. 11Yɛrɛ Bɛt zuun rɔbtigɔ gaattɔnɔ a dood muutdu an hi sɛw hi za̧a̧. 12Wɛɛ rɔbtigɔ bɔ gisɛ goko an wɛ ɔɔ waabil wɛ ha̧a̧l wɔ hi ɗɔkum ha̧a̧l wɔ waaldu, wɛ wɛɛ wɛ hɔns zul wɛ wɛ fɔ Bɛt hi gbɔnɔ, a waabil wɛ yɔ ɓɔryɔ gedu a waal yɛrɛ gedu.
13Yɛwɛ oo hinrɔb yɔ wɛ gbaak mɔkil wɛ hage hi hato: gɛ ɔ̧tyɔ gɔ wɛ gbɛn Yeesu Kristu yɔ gi Bɛt wɛ hi Za̧a̧sigya wɛ gbɔɔlɛ, gi midz gedu a gi gbɔlums du. 14Gaa zulɔ wɔr a wɛ kalɛ an gi ha̧s hinha̧a̧l tɛŋkɔ a wɛ muulɛ, an gi gaasɛ a gi muutdu, an wɛ wɛɛ dood ɔnɛ, an wɛ wɛɛ wɛ waak hinrɔb wook hi hato. 15Mɔ dɔks dood wɔ dɔgl yɛrɛ mɔ gaahi tɛŋko, ɓatsu-mɔhi kpoosɛ, boomɔhi hi tɛŋk yɔ Bɛt gaamɔ. Bɔmɔ ɔɔ doo za gi kpɛ̧ɛ̧lum nɛ zaŋ.
Currently Selected:
TITUS 2: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.