TITUS 1
1
TITUS Ɗɛɛrwol yɔ Pol bi̧i̧s Titus TITUS 1
1Mii Pol mii bi̧i̧ ɗɛɛrwol yɛrɛ. Mi gi Bɛt woosɔyayɔ hi Yeesu Kristu tɔmsɔya. Bɛt gii yaazimi an mi dɔks dood wɔ sɛ̧ɛ̧hi dɔglɛ an hi ɗɔbs Yeesu hi wɛɛ hi mɛɛ rɔbo. Gid hi mɛɛ rɔb anbɔ, hi mɛɛ fɔk yɔ gi an hi fɔb Bɛt hi gbɔnɔ. 2-3Za̧a̧nyɔ mɛɛ hinyɔ gi rɔbo, gbaa mɔkilɔ a Bɛt gi gaabe za̧a̧tig faa. Bɛtyɔ gɔ gɔ̧ɔ̧ya̧a̧ gɛ zaŋ da raa amntɔnɔ a biitirnaandu a bé gaa dood za̧a̧tig faa bɔ. Yɛrɛ ɔ̧tyɔ Bɛt dɛ̧ɛ̧ an gi zuun dɔglɔ bɔ gedu riiri ma. Bɛt raami an mi dɔks dood dɔglɔ. Bɛt yɔ gi za̧a̧sigya wɛnɛ gii yaazimi, wɛɛ gaami dɔglɔ an mi kaŋkɔ.
4Mi yaak ɗɛɛrwol yɛrɛ a Titus yɔ gisim waa mi rɔb a Bɛt gbɔnɔ duge anyɔ wɛ ɗɔbsig Yeesu lɛlgbunu. An Baa wɛ Bɛto hi Yeesu Kristu Za̧a̧sigya wɛ hi gààmɔ gɛmsili hi boolumi. 5Mi da mi ɔzum a hɛbt bɔ mɛm rɔgge nuŋgɔ a Kereta an mɔ gɛms hinyɔ zɛ̧ɛ̧rɔ. Mɔ́ gbaa ɗɛntɛ Bɛtwoos kaŋkig-yaadɛ a Yeesu fɔkyaadɛ tees du a waal lɛlyɔ gi ge sɛw. Mɔ woo anyɔ mi da mi raasumɔ. 6Mɔ her walɛ wɔ hi taan hin-a̧a̧bi, wɔ hi gin nis gbunu, wɔ waatya̧ hi ɗɔbsig Yeesu hi tɛŋko; bɔ waat wɔ hi gin waabil ha̧a̧lɛ an dood sɛw hi boo dɔglya̧; bɔhi gi waat zulɓaatilyaadɛ.
7Anyɔ gi Bɛtwoos kaŋkigya, gig an Bɛtwoos zulya taan hin-a̧a̧bi. Bɔgi pɛɛ zulɛ, bɔgi gi doo kpoosnɔɔtigya, bɔgi gaa zulɔ bum du, bɔgi gi doo gabsi, bɔgi gi rɔɔs wɔɔlikya. 8Yɔ anbɔ, gig rɔ̀bɛzekya rɔbo, gig dood rɔbɛ saami, gig zulhɔnikya, doo hinwookya riiti, doo gaati a Bɛt muutdu, doo zulwa̧a̧kya. 9Gig dɔgl-gbaakya rɔb a kpoos du bɛttɔnɔ anyɔ hi goksige an gi ɗɛɛs dood Dɔgl Rɔb gaat bɔ gokɔ an hi wa̧a̧ kpoos du be; an gi wɛɛ gi ɗɛɛs dood dɔgl-faakyaadɛ a̧a̧bya̧ zuunukɔ.
10Dood Yahuduyaadɛ zulɓaatilya kittɔnɔ hi giro, hi bookya̧a̧ tɔs hi wɛɛ hi gi dood maatig hɛw. Doodya̧ hi kit hi daarlɛl a Yahuduya wɔ hi raak a gi an Yeesu fɔkyaadɛ ɔ̧ɔ̧ hi naabɔ an hi wɛɛ Yahuduyaadɛ hi tees du. 11Zugum ya̧a̧ya̧ an bɔhi goks dood hinyɔ rii an hi gog gɛ. Yɔ anbɔ hi ha̧tirgo dood raat zaadɛ du sɛw mɔkilya̧ hi hingok wɔ hi rii gɛ. Hi gɔk anbɔ an hi dagn ya̧a̧gɔ̧ɔ̧n rɔɔsɛ. 12Doo za gi nɛ a Keretaya wɔ hi teesdu hɛw, za̧a̧nyɔ hi mɔkig nɛ a gi bɛtya̧ ya̧a̧kɛŋkya rɔbo da raa a Keretaya wɔ hi gi mɛlyaadɛ, hi gi an namhɛtum ha̧a̧lɛ, hi wɛɛ hi gi dood namrɛdɛ, hi mɔkig lees gii kpɔd.
13Wal bɔrɔ dɔg dɔgl bɔrɔ rɔbo. Yɔ anbɔ, dɔgsimɔhi hin hi naati an hi ɗɔbs Bɛt hi gbɔnɔ, 14an bɔhi lag Yahuduya wɔ bidya̧ tɔs wɔ hi fɔkilgo. Wɛɛ bɔhi wa̧a̧ dood zaadɛ wɔ hi in rɔb dɔglya̧ kpoos du. 15Zɛnɛ wɔ kpoosya̧ gi gaattɔnɔ a Bɛt muutdu, hin sɛw gaasihigaasɔ. Zɛnɛ ɓi̧i̧limya wɔ hi ɗɔbs Bɛt gɛ be, hin sɛw kɔmsihi an ɓi̧i̧limyɔ. Yɔ anbɔ, mɔkilya̧ hi kpoosya̧ er gɛ zaŋ, hi ɓi̧i̧l sɛw. 16Hi raa gaattɔnɔ a hi mɛɛ Bɛto, wɛɛ hinyɔ hi wook sɛw zuun a hi mɛɛ Bɛt gɛ be. Yɔ anbɔ hi gi dood bɔbtilyɔ, hi wɛɛ hi gi ɓatsig Bɛt zulɛ, wɛɛ hi ɗɛ̄ɛ̄ an hi woo hinza rɔb gbun mɔɔt gɛ be.
Currently Selected:
TITUS 1: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.