HINWƆ HI MITS YOHANA 1
1
HINWƆ HI MITS YOHANA Hinwɔ Yeesu Kristu zuns Yohana HINWƆ HI MITS YOHANA 1
1Ɗɛɛrwol yɛrɛ gi raak dɔgl wɔ hi yaat nɛko an hi tuur nɔɔk dɔglɔ giya. Bɛt mits Yeesu Kristu hinɔ an gi zuns woosya ɔ̧ɔ̧ wɔ. Yeesu yaaz walsɛrɔ a woosyaɔ Yohana ge an gi raasig hinɔ gi mɛɛ. 2Yohana kɛm Bɛt dɔglɔ hi hinyɔ Yeesu Kristu raa, gbɛn hinyɔ Yeesu zunsig sɛw, wɛɛ boo dɔglɔ an dood hi kɛmɔ. 3Hat gi a za̧a̧nyɔ zaŋgin ɗɛɛrwol yɛrɛ ge hi za̧a̧nyɔ kɛm dɔgl wɛrɛ hi bi̧i̧ a Bɛtya̧a̧kɛŋkya ɗɛɛrwol yɛrɛ gedu gi wɛɛ gi fɔb hinwɔ hi bi̧i̧. Ɔ̧twɔ hi dɛ̧ɛ̧s nɛ hin wɔrɔ an gɔ hi zaa du sɛ̧ɛ̧bɔ, ya̧a̧nɛ.
4-5Mii Yohana, mi bi̧i̧s Yeesu fɔkya ɔksil lɛl nɔɔn-er wɔ hi gi a Aaziya hɛbt du ɗɛɛrwol yɛrɛ. Bɛto, Za̧a̧nyɔ giro, Za̧a̧nyɔ da gi nɛko, Za̧a̧nyɔ gɔ gi zaa, hi Bɛt Mɔkil nɔɔn-er wɔ hi gi a Bɛt waar ums ɗɔɔtillɛl bɔ gi muutdu ge, hi Yeesu Kristu yɔ ya̧a̧luur hinɔ taa a ge, yɔ gi Za̧a̧nyɔ ɗund a wɔrkɛ tees du sɛw doosi, Za̧a̧nyɔ gi waar ɛ wɔ Waar ya̧ a waal du, hi sɛw hi gaan gɛmsili hi boolumi. Aanbɔ! Kristu yɔ ha̧a̧g wɛ muulɛ gubr ga̧a̧mɔ ha̧sin hinha̧a̧l wɛ tursin zul wɛ aakil du, 6wɛɛ wɛɛnɛ Bɛtɔ hi Baatɔ maak-wookyaadɛ ɔ̧ɔ̧ a gi wáát du. Gbɔlumsɛ hi waar umsɛ hi gi ge wɛlɛ hi wɛlɛ. Aanbɔ!
7Yɛrɛ gi zaak hi kuusɛ. Dood sɛw hí gbɛnige. Dood wɔ hi baanig goo hɛw hi gbɛnige, wɛɛ dood dɔ̧ɔ̧t hɛbtdi sɛw hi kaa a gi dɔŋgo. Hɔɔ, gigi labɔ. Aanbɔ!
8Waar Bɛto Tɛŋkya, Za̧a̧nyɔ giro, Za̧a̧nyɔ da gi nɛko, Za̧a̧nyɔ gɔ gi zaa,
dɔgɔ :
a bee doosi hi kuudi.
9Mii yɛ̧ɛ̧ nɛ Yohana, wi ɔks hi nɛɛ a ya̧a̧rhant du hi a Bɛt wáát du, hi a Yeesu hinmɔŋkɔ bɔ gedu. Hi tuusim a mi hɛbt du hi dɔŋsim a hɛbt bɔ mɛm rɔg ge nuŋgɔ a Patmɔs a Bɛt dɔglɔ dɔŋgo hi Yeesu dɔglɔ book dɔŋgo. 10A Waar Yeesu ɗimaasɔ ɔ̧ti Bɛt Mɔkilɔ zaa zɛmr kol mi, mi lag ya̧a̧ za an pɔ̧rɔ a mi kuudu, hi raa hinɔ:
11a bi̧i̧m hinyɔ mɔ gbɛnk a ɗɛɛrwol du mɔ yaa a fɔkbeyaadɛ ɔksilya̧ lɛl nɔɔn-er wɔ hi: a Efesu, a Samirna, a Pɛrgam, a Tiyatira, a Sardis, a Filadɛlfi hi a Lawdikiya.
12Mi zɛmrɔ mi see an mi mɛɛ ya̧a̧yɔ gim boozugo. Yɔ mi zɛmr anbɔ mi gbɛn laa-gbaaklɛl hi wɔmn hɛɛlmɔto nɔɔn-erɛ. 13A laa-gbaaklɛl nɔɔn-er wɔ hi teesɔ du, za̧a̧n za giro riitin hi doo, heg gbandil zi̧i̧ muulɛ wɛɛ mal hi̧i̧lwɛɛl yɔ hi gɔn hɛɛlmɔto a hɔŋg ha. 14Zulɔ hi susugɔ buu an tamsɛɛs buu, buukɔ bɔ daar bugd hɛw; lɔlɔ wɔ hi kak du an laazebti.
15Dɔɔɔ wɔ hi riitin an tushob yɔ hi yaag laa du gi wɛɛ gi gaak du haŋŋ. Ya̧a̧boonɔ riitin an mɛm gi tuuk a zɛɛnɔɔdɛ kit du gi zɔk a hɛɛlkpar hɔɔt muulɛ. 16Gi wa̧a̧k sɛwaat nɔɔn-er gi naanrɔbo. Daŋbɛsim yɔ ya̧a̧gbarɔ lɔm lɛl eerɛ gi tuuzig gi ya̧a̧ du, muutɔ gaa an ɔ̧ti a kudɔɔl du. 17Yɔ mi gbɛnig anbɔ mi mat gi dɔɔ dɔŋdi an wɔrko. Gii wɛɛ gbaa naanrɔbɔ mi muulɛ raami:
a bɔ hoob gi ha̧a̧mɔ, bee gi doosi hi kuudi. 18Bee gi Za̧a̧n za̧a̧til bɔ. Be da be wɔɔrɔ, yɛrɛ be wɛɛ be gi za̧a̧tili ma faa. Be wa̧a̧k wɔrk lukgbɔnɔ gboorinsya hi wɔrkɛ ɗɔɔtillɛl bɔ gbɔnɔ gboorinsya be naan du. 19Yɛrɛ bi̧i̧m hinwɔ mɔ gbɛn nɛko hi hinyɔ giro hi hinyɔ gɔ gi zaa kuudu sɛw a ɗɛɛrwol du. 20An sɛwaat nɔɔn-er wɔ mɔ gbɛn a be naanrɔb hi laa-gbaaklɛl nɔɔn-er wɔ hi wɔmn hɛɛlmɔt dɔglya̧ dubt yɔ dood hi mɛɛ gɛ: sɛwaat nɔɔn-er wɔ hii gi fɔkbeyaadɛ wɔ ɔksilya̧ lɛlya̧ nɔɔn-er wɔ Bɛt walɛsɛrɛ ya̧. Laa-gbaaklɛl wɔ nɔɔn-er be, hii gi fɔkbe-yaadɛ wɔ ɔksilya̧ lɛl nɔɔn-er wɔ be.
Currently Selected:
HINWƆ HI MITS YOHANA 1: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.