YAHUDA 1
1
YAHUDA Ɗɛɛrwol yɔ Yahuda bi̧i̧s Yeesufɔkya wɔ a lɛlyɔ hi gi ge sɛw
1Mii Yahuda, Yeesu Kristu woosɔya hi Yakuba yɛ̧ɛ̧tɔ. Mi bi̧i̧sig dood wɔ Bɛt elihi, wɔ hi waak a Baa wɛ Bɛt hat du, wɔ hi gbaahi Yeesu Kristu ɔ̧nɛ hii ɗɛɛrwol yɛrɛ. 2An ya̧a̧rmɛɛki, boolumi hi hato hi kitsinɛ! 3Sa̧a̧m mi rɔbɛ wɛ, anyɔ ha̧a̧m nɛ gbɔɔltɔnɔ an mi bi̧i̧sin ɗɛɛrwol mi boosin za̧a̧tig yɔ wɛ gin lɛlgbun dɔglɔ, mi sèè bɛr an mi bi̧i̧sin hinza dɔ̧ɔ̧mi mi ɓaasin muulɛ an nɛ wa̧a̧ ɗɔbsig yɔ Bɛt gaa doodɔ naan du dɔɔ gbun gaati hi tɛŋko a hin ɓaatil yɔ gi gedu.
4Ya̧a̧nɛ dood zaadɛ wɔ hoobha̧a̧hi Bɛt gɛ, hi tal nɛ teesdu hi kɛ̧ɛ̧tigi, hi bi̧i̧ dɔgl-gbaak bɔ dɔglɔ a hi zulha da̧a̧da̧ da amntɔnɔ. Hi gi dood ha̧a̧lɛ, hi zɛmrik Bɛt wɛ gɛmsilɔ gi wɛɛk zɛlk gbɔnɔ, hi wɛɛ hi faak Ɗɛnt wɛ gbun bɔ Waar wɛ Yeesu Kristu. 5Yɛrɛ ha̧a̧m an mi dɔgsin nɛ mɛksɔ, nɛɛ dood wɔ hi raasin hin wɔrɔ dɔglɔ bɛttɔnɔ dɔɔ gbun gaati nɛ mɛɛ, a Waar Bɛt za̧a̧s Israhilaya wɔ yɔ tudzihi a Misra hɛbt du, wɛɛ kuudu gbɔm kpoos ɓaatilya wɔ hi ta̧a̧ ɗɔbsig gɛ.
6Wɛɛ Bɛt walɛsɛrɛ wɔ hā̧ā̧hi kɔŋk nɛ a gbɔlumsya̧ bɔ lɛlɔ gedu gɛ hi wɛɛ hi ɔɔ ɗɔɔtillɛlya̧, Bɛt gbaahi, wɔ̀hi hi ba̧a̧ntus hi kɔŋk faa wɛlɛ hi wɛlɛ a lɛlwil wɛɛdisɛ an hi oo ɔ̧t gbɔɔl bɔ gɔ hi gbaa dɔgl gedu zaakɔ. 7Mɔkin nɛ mɛɛ Sodɔma hi Gɔmɔra dɔglya̧ hi waal gbɔlɛ wɔ gɔ̧ɔ̧hi di. Dood wɔ hi waak gedu hi gɔ an Bɛt walɛsɛrɛ wɔrɔ be. Anyɔ hi gaa zulya̧ a mans du hi a ɗɔkum du a dood rɔ̀bɛ muulɛ, hi yɔ̧kya̧a̧r a laa yɔ gɔ gi waa faa gedu. Yɔ anbɔ, hi wɛɛs dood waal du sɛw gɛrs hinmɛksingoya, dood hi mɛɛn gii a dɔgl-gbaak giro.
8Nɛ yɔ gi anbɔ, hingokya ya̧a̧gɔ̧ɔ̧nya wɛrɛ hi fɔk hinyɔ yorumya̧ raasihi, hi ɓi̧i̧lik muulya̧ anbɔ be, hi see mɔkil tɛŋkya wɔ bɛtha an hintɔs, hi niik mɔkil wɔ hi gin gbɔlumsɛ. 9Yɛrɛ Bɛt walɛsɛrɛ wɔ gbɔɔlya̧ mɔɔt bɔ Misɛl yɔ gbaatin hi loorɛha̧a̧l bɔ hi watin dɔgl a Muusa wɔrkɔ bɔ muulɔge an hi mɛɛ a hi teesdu za̧a̧nyɔ gɔ gi loo Muusa wɔrkɔ, Bɛtwalsɛr bɔ mɔ̄kɔ̄ an gi niinig dɔgl-gbaak niitya gɛ, raag hin gbun kpɔd: a an Waar Bɛt gi biglumɔ.
10Hii ya̧nɛ, hi book ya̧a̧ha̧a̧l a hinyɔ hi mɛɛ gɛ geha. Hi fɔk ɗɔkumya̧ wɔ an namb hɛtimi, wɛɛ ɗɔkumya̧ wɔrɔ anbɔ hii gihi ha̧tirgo. 11Ya̧a̧rhant gisihi! Hi fɔk Kaynu gbɔnɔ ɔ̧ɔ̧nɛ, hi bis muulya̧ a Baalam mɛl gbɔnɔ bɔ gedu an hi dag tus an gii be, hi wɛɛ hi ɓaas zulya̧ an Koora yɔ ɓaas be. Hí wag an gii yɔ wag be.
12Hii gi ɓi̧i̧lik yɛ̧ɛ̧dums lees nɛ gɔ nɛ letingo hi hii lɛlgbunu. Gɔ hi ɗɔɔtig hi nɛɛ lɛlgbunu hoobhā̧ā̧hi hinza gɛ; hi kaŋkig zul ya̧a̧n bɛttɔnɔ kpɔd. Hi gi an kuus wɔ zɛk gɔ gihi ninko, wɛɛ hi kamz bɛl gɛ be; hi gi tɛ̧ɛ̧ ga̧a̧kum wɔ hi taan huml gɛ, hi wɔr dɔɔ eerɛ hi durihi,
13hi gi mɛmɗukil wɔ mɛmbal gbɔɔl du, hi tuusig dukumduurya̧ wɔ hi fu̧u̧zig a hi luutum du; hi gi sɛwaat lɛɛlikyaadɛ, lɛlwil tii gihi ook faa a lɛlwil wɛɛdisɛ. 14Ɛ̧nɔg yɔ gi doo nɔɔn-eesum bɔ mɔɔkya̧ fɔbtin yɔ waal ki̧ya gi baar a Àdamu ge kɛm dɔgl a Bɛt ya̧a̧ du dɔgɔ a dood wɔrɔ hi zulha hɛw, raa:
a seenɛ, Waar Yeesu gi zaa hi doodɔ gaatɛ wɔ, ɓɛrkya gɛ, 15an gi gbaas dood sɛw dɔglɛ, wɛɛ an gi mat dood wɔ ha̧a̧hi Bɛt gɛ hi dɔglɛ a woos ha̧a̧l yɔ hi woo hi zulɓaasig yɛ̧ltɔnɔ a Bɛt gbaŋgi geha sɛw, hi dɔgl ɓaatil wɔ dood hinha̧a̧lya wɔ ha̧a̧hi Bɛt dɔglɔ gɛ hi boo nɛ a gi zulha hage sɛw.
16Doodya̧ hii gi dɔntingo, hii gi kaalik hinyɔ riisihi gɛ sɛw, hi ɛmbik an ɗɔkum yɔ hi kpoos du gisihi goko, hi zulpɛɛko, hi book hin gbɔlɛ hi tɛŋko, hi seek dood muutdu a hinyɔ hi dak gi dɔŋgo.
17Yɛrɛ nɛya, sa̧a̧m mi rɔbɛ wɛ, mɔkin nɛ mɛɛ hinwɔ Waar wɛ Yeesu Kristu tɔmsɔya wɔ hi da hi dɔg nɛ doosɛ. 18Gɔ hi gisin raako a ɔ̧t yɔ̧ɔ̧sum bɔ gedu, dood hinkpɛ̧ɛ̧likya hi giro, hi ɛmb anyɔ ɗɔkumya̧ ha̧a̧l bɔ kpoos du yɔ kɛms Bɛt tɔn gɛ gisihi gbɔnɔ goko,
19Dood wɛrɛ hii gi gbɔnɔ gɛ̧ksigyaadɛ a dood teesdu, hii gi waaldu-yaadɛ, hi taan Bɛt Mɔkilɔ. 20Nɛnɛ, sa̧a̧m mi rɔbɛ wɛ, gaatinnɛ tɛŋk nɛ er rɔbtɔnɔ a ɗɔbsig nɛ gaat yɔ daarlɛl hage, waan Bɛtzɔ̧k hi Mɔkilɔ, 21waan a Bɛt hat du nɛ oonik ɔ̧tyɔ Waar wɛ Yeesu Kristu gɔ gi mɛɛsɛ ya̧a̧rɛ gi gaawɛ za̧a̧tig faa gedu.
22Zɛmrsin dood wɔ hi faak Bɛt mɔkilya̧ an hi wɛɛ hi ɗɔbsɔ; 23ha̧sin dood zaadɛ a laa du nɛ za̧a̧sihi; wɛɛ a dood zaadɛ be, mɛɛsinɛhi ya̧a̧r yɔ ɔks hi hoobo, inin muulya̧ bɔ ɓi̧i̧l hɛw. 24Bɛt ɗɛɛ an gi oonɛ a hinyɔ gɔ gi matin gedu sɛw, gi wɛɛ gi ka̧n a gi muutdu a gi gbɔlums du, nɛ́ taan hin-a̧a̧bi, nɛ́ gin hat gbɔɔltɔnɔ. 25Gii gi Bɛt gi gbunu, za̧a̧sigya wɛ a Yeesu Kristu Waar wɛ dɔŋgo. Gbɔlumsɛ, waar umsɛ, ɗɛɛti hi tɛŋko, hi gi a ge yɛɛl yɔ waal ki̧y nɛ ket gɛ tuur ɓɔryɔ, wɛlɛ hi wɛlɛ! Aanbɔ!
Currently Selected:
YAHUDA 1: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.