IBRANIŊKO 2
2
IBRANIŊKO 2
1Yɔ anbɔ, yɛwɛ wa̧a̧ Dɔgl Rɔb yɛrɛ wɛ kɛm hi kpoos gbun gi daarlɛlɛ, muulɔge gi daarɔ, an bɔwɛ hɛɛ gbɔnɔ wɛ hɛml hi hin wɔrɔ. 2Ya̧a̧nɛ, dɔglyɔ Bɛt walɛsɛrɛ wɔ hi dɔgɔ zuun tɛŋkɔ, wɛɛ dɔgl gɔ mat nɛ za̧a̧nyɔ ɗa̧a̧ Bɛtmaakdɔgl za gbun dɔɔdu gi lāg gɛ sɛw. 3Nɛ yɔ anbɔ, gid wɛɛ yɔ wɛ kɛm za̧a̧tig gbɔɔl yɔ daarlɛl dɔglɔ, wɛ wā̧ā̧ gɛ, wɛ ɔɔ ditɔs, gi an wɛ wir dɔgl-gbaak bɔ ri ma nɔ? Waar Yeesu yɛɛl dɔg nɛ dɔglɔ gɔ kete, wɛɛ dood wɔ hi kɛm nɛ hi wɛɛ hi boosɛ dɔglɔ wɛ mɛɛn a gi rɔbo.
4Wɛɛ Bɛt zuun dɔglya̧ hɛw hi gɛrs hinzuunikyaadɛ, hi gɛrs tɛŋk-yaadɛ, hi gɛrs zaadɛ sɔmsɔm hi Mɔkilɔ gaasɔ yɔ gaa anyɔ ha̧a̧g giya. 5Ya̧a̧nɛ Bɛt gāā walɛsɛrɛ ɔ̧ɔ̧ waar ums a waal yɔ gɔ gi zaa wɛ dɔk dɔglɔ a zulɔge gɛ. 6Yɛrɛ doo za raa dɔglɔ
a lɛlza a Baa Bɛto, nɔ gi doo an gɔ mɔ mɔkige? Nɔ gi doo an mɔ kaŋkige? 7Mɔ tiisige a walɛsɛrɛ mɔ wɔ hi wɛɛdis am kaasi, mɔ hegsig ɗɔbsili hi gbɔlumsɛ an waar umskalɛ. 8Mɔ gbaa hin sɛw a gi dɔɔ dɔŋdi.
Yɔ anbɔ ɔ̄ɔ̄ hinza yɔ taa a gi naan du gɛ gɛ. Hɔnɛ tuur ɓɔryɔ wɛ gbɛ̄ndir a hi gbaa hin sɛw a gi dɔɔ dɔŋdi kɛn gɛ. 9Yɛrɛ wɛ gbɛnik Yeesu , za̧a̧nyɔ hi tiisig a Bɛt walɛsɛrɛ wɔ hi wɛɛdis gi am kaasi, wɛ gbɛnig heg ɗɔbsili hi gbɔlums a wɔrk yɔ ha̧a̧ya̧a̧rɔ gi dɔŋgo. Anyɔ Bɛt ha̧a̧g nɛ dood gɛmsugo, ta̧a̧ an Yeesu gi kɛm wɔrkya̧a̧rhantɔ a dood wɔ hi dɔŋg sɛw.
10Ya̧a̧nɛ, Bɛt gii gi hinwɔ kim sɛw zulɔya, gi gig nɛ ha̧a̧k an gi kam walɛwaat kittɔnɔ gi tuurinihi a gbɔlums du, rii an gi loo za̧a̧tigya̧ gbɔnɔdorkya bɔ taan hin-a̧a̧bi gi ha̧a̧nig ya̧a̧rɛ. Gii be, ya̧a̧rɔ bɔ yɔ̧ anbɔ, gaasig da̧a̧da̧. 11Yɔ anbɔ, Yeesu doogaasigya bɔ a Bɛt muutdu hi dood wɔ gaasihi sɛw baaya̧ gbunu. Ya̧a̧nɛ seem gi ha̧a̧ge an gi elihi a hi yɛ̧ɛ̧dɛ been gɛ, 12anyɔ dɔgɔ:
a Baa Bɛto, bé dɔks yɛ̧ɛ̧ɗɛ be wɔ nuŋg mɔ, be ɛɛhin be baanum a dood mɔ wɔ mɔksigya̧ bɔ gedu.
13Wɛɛ dɔg ɓɛ
a bé gbaa kpoos be a Bɛt ge.
Wɛɛ dɔg ɓɛ
a be gi gɛrɛ, hi waat wɔ Bɛt gaabe.
14Yɔ anbɔ, anyɔ waat wɔ hi gi muulɛ hi ga̧a̧mɛ, gii Yeesu hi zulɔ hɛw wɛɛ anbɔ, an gi wɔr gi ha̧tir Saydanu tɛŋkɔ a wɔrk zulha, 15gi wɛɛ gi za̧a̧s dood wɔ hoob gihi nɛ ha̧a̧k wɔrk hi gi an gbaarɛ a waabilya̧ yɔ hi waak gedu sɛw. 16Hi rɔb ɔ̧nɛ, Yeesu zāās Bɛt walɛsɛrɛ wɔ hii ɗaak gɛ, zaas Abraham waat ɔ̧ɔ̧n ɗaako.
17Yɔ anbɔ rii an hi wɛɛnig an yɛ̧ɛ̧dɛ ɔ̧ɔ̧ wɔ a hinyɔ gi gedu sɛw an gi wɛɛ Bɛtmaak-wookya gbɔɔl mɔɔt ya̧a̧rmɛɛkya yɔ gɔ woo hinyɔ raa sɛw a Bɛt woos du, an gi gaa zulɔ a Bɛt ge an hinha̧a̧l naandɛmsɛ a doodɔ wɔ hi dɔŋgo. 18Ya̧a̧nɛ gii hi zulɔ hi ha̧a̧nigya̧a̧r hi maatige, ɗɛɛ an gi ɗaas dood wɔ Saydanu gihi maatig be.
Currently Selected:
IBRANIŊKO 2: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.