GALATIYA 3
3
GALATIYA 3
1Nɛɛ Galatiya wɛ! Nɛ yoo ya? Doo za da mɛɛsin hin ya ri? Nɛ mi dɔgsin nɛ Yeesu Kristu dookɔ bɔ a dɔ̧ɔ̧r muul dɔglɔ gaattɔnɔ ma mi? 2Ha̧a̧mi an mi warm hin gbunu: anyɔ nɛ dag Bɛt Mɔkilɔ a kpoos du, nɛ dagig a Bɛtmaakdɔgl nɛ fɔk bɔ gi dɔŋg yà, zaabe a Bɛtdɔgl yɔ nɛ kɛm nɛ ɗɔbsig gi dɔŋg ya? Ri?
3Nɛ ri nɛ kɛ̄ŋ gɛ, zul nɛ taar ya? Ri? Anyɔ nɛ da nɛ yɛɛI Bɛt gbɔnɔ fɔk hi Bɛt Mɔkilɔ tɛŋkɔ, yɛrɛ ha̧a̧n an nɛ tuur bɛtha hi tɛŋk nɛɛn ya? 4Hinyɔ tursin sɛw rāāsin hinza nɛ kpoos du gɛ ya ri? Mi gbɛn mɔkil mi raasin hinza. 5Nɛ mɔk rɛ, Bɛt yɔ gin Mɔkilɔ gaak gi wɛɛ gi gɛrs wook a nɛ teesdu, gi wook hinɔ a maakɔ dɔglyɔ nɛ gig fɔk dɔŋg ya, zaabe a Bɛt dɔglyɔ nɛ kɛmɔ nɛ ɗɔbsig dɔŋg ya ri? 6Mɔkin Abraham dɔglɔ.
Yɔ Abraham da ɗɔbs Bɛt gii Bɛt gi sɔ̧ɔ̧g an doo riiti a gi muutdu.
7Yɔ anbɔ, mɛɛn a zɛnɛ wɔ hi ɗɔbs Bɛt gii hi gi Àbraham waato. 8Bɛt ɗɛɛrwol da raa nɛ gaati a Bɛt gi sɔ̧ɔ̧ dood wɔ hi taa Yahuduya gɛ an dood riitɛ a ɗɔbsigya̧ bɔ gi dɔŋgo. Ya̧a̧nɛ wɛ zaŋg a Bɛt raas nɛ Abraham Dɔgl Rɔb bɔ da amntɔnɔ a bé rɔbs dood dɔ̧ɔ̧t sɛw a mɔ dɔ̧ɔ̧t du.
9Anyɔ Abraham ɗɔbs Bɛto, Bɛt rɔbsig gɔ be. Bɛt gi rɔbsig dood wɔ hi gig ɗɔbsig sɛw anyɔ da rɔbs nɛ Abraham be. 10Dood wɔ hi mɔkig a be riis Bɛt a maakdɔglɔ fɔk bɔ gi dɔŋgo, hi gi dood bootyaadɛ sɛw. Yɔ anbɔ, hi bi̧i̧ a Bɛt ɗɛɛrwol du a za̧a̧ni wā̧ā̧ hinyɔ hi bi̧i̧ sɛw a maakdɔgl ɗɛɛrwol du
a gi kpoos du gɛ, gi wɛɛ gi wāā wook gɛ, gi bootyayɔ.
11Yɛrɛ wɛ mɛɛ a Bɛt gɔ sɔ̧̄ɔ̧̄ doo za an doo riiti a gi muut du a maakdɔglɔ yɔ gi fɔk gi dɔŋg gɛ, ya̧a̧nɛ, dɔglɔ gi raa
a Bɛtɗɔbsigya gii gi riis Bɛto, gi za̧a̧.
12Wɛɛ Bɛtmaakdɔglɔ be, rāā ɗɔbsig dɔgl gɛ, raa
a za̧a̧nyɔ gi fɔk hinyɔ dɔgl wɔ hi raa ro gi za̧a̧.
13Bɛt ɗɛɛrwolɔ wɛɛ raa a ri ya? Raa a Bɛt bootɔ gi a za̧a̧nyɔ hi wiig a tɛ̧ɛ̧ muul gi zulha sɛw. Yɛrɛ Kristu yɔ wɔr a dɔ̧ɔ̧r muulɛ wɛɛsɛ an doo bootya a Bɛt muutdu a wɛ kalɛ,
wɛɛ tuus zul wɛ a maakdɔglɔ bɔ bootɔ gedu.
14Yeesu Kristu woo anbɔ an rɔbs yɔ Bɛt gaa Abraham gi záas dood dɔ̧ɔ̧t dɔɔmɛ wɔ hi ɔks hi Yeesu Kristu hi zulha sɛw, an wɛ sɛw wɛ dag Bɛt Mɔkilɔ yɔ Bɛt raa a gi gaawɛ anyɔ wɛ ɗɔbsige.
15Yɛ̧ɛ̧dɛ mi wɛ, yɛrɛ ha̧a̧m an mi wadsin hinyɔ mi raasin nɛ bɛttɔnɔ, mi wadsin hi hinyɔ wɛ gbɛn ɔ̧t nuŋgo. Hinyɔ riitin an dood gɔ hi wooko an hi wɔb ya̧a̧ya̧ a hinza ha. Nɛ gɔ hi tɔb seto an hi wɔb ya̧a̧ ma mi? Settɔk bɔ gɔ da̧a̧ anbɔ doo za ɗɛ̄ɛ̄ an gi wɛɛn ya̧a̧ kuudu, zaabe gi gòks hinza ha ma gɛ. 16Yɛrɛ hinwɔ Bɛt da rāā Abraham a bé gààge, rāa̧̍ a bé gaag hi dɔ̧ɔ̧t ɔ̧ɔ̧nɛ. Bɛt rāā Abraham a bé gaag hi dɔ̧ɔ̧t kit gɛ, rāa̧̍ a bé gaag hi dɔ̧ɔ̧t ɔnɛ bɔ, raakɔ a bé gaa Kristu giya.
17Hinyɔ ha̧a̧m raak gɛrɛ: Bɛt da wɔb ya̧a̧ɔ hi Abraham, hi ɔks ya̧a̧ya̧. Kuudu wɛl tɛmɛrɛ nasɔ hi dumbili taarɛ, Bɛt wɛɛ gaa maakɔdɔglɛ. Maakdɔgl bɔ wɛɛn kɔlk bɔ Bɛt da wɔb nɛ hi Abraham hintɔsi, wɛɛ ya̧ns Bɛt hinyɔ da raa nɛ a bé gaa ya? Lab gɛ! 18Nɛ à rɔbs bɔ Bɛt gbaasɛ gi nɛ erk a maakɔdɔgl bɔ fɔkɔ hage, yɔ taa nɛ erk a hinyɔ Bɛt raa a bé gaawɛ ha ma. Yɔ anbɔ Bɛt gbaas Abraham rɔbsɔ a hinyɔ raa a bé woosum gedu.
19Yɔ anbɔ, hi gaa Bɛtmaakdɔglɔ an gi ɗaa nɔ? Bɛt ɔks maakdɔglɔ hi ya̧a̧wɔkdɔglɔ an gi zuns dood hi mɛɛn hinyɔ gɛ̧ɛ̧y hi hinyɔ Bɛt ha̧a̧ge. Woosɔ kɔm hɔ a gɔ hi mɔɔ Àbraham dɔ̧ɔ̧tɔ bɔ Bɛt raa nɛ a gi rɔbsig kete, ɓɔr gi ɔɔ wooyyuko. Bɛt da gaa dood maakɗɔglɛ a walɛsɛrɛ ɔ̧ɔ̧ naan du, hii be hi gaa Muusa yɔ gi tɔmsya a Bɛt teesdu hi doodɛ. 20Tɔmsya gɔ wōō hin hi doo gbun gɛ. Bɛt ɔnɛ, yɔ da raa Abraham a bé rɔbsumɔ, da woo hin gi gbunu. Dɔglɔ taadu hi tɔmsya.
21Yɛrɛ Bɛtmaakdɔglɔ zɛmr rɔbs bɔ Bɛt raa a bé gaa dood dɔ̧ɔ̧t sɛw zɛmr ya? Lab nɛ gɛ zaŋ! À Bɛt gaa nɛ maakɔdɔgl za yɔ ɗɛɛ an gi gaa dood za̧a̧tigi, doo yɔ ɗɛɛ nɛ an gi fɔb maakdɔgl bɔ, wɛɛ Bɛt yɔ sɔ̧ɔ̧g nɛ an doo riityɔ. 22Yɛrɛ Bɛt ɗɛɛrwol raa a hi mat dood waal du sɛw a hinha̧a̧l du hi gbaahi luknɔ du, an dood wɔ hi ɗɔbsig Yeesu Kristu hii hi dag ma gaas bɔ Bɛt raa nɛ a bé gaa wɔ hi ɗɔbsibe.
23Yɔ ɔ̧t bɔ an gɔ wɛ ɗɔbs Yeesu Kristu gedu riidir gɛ, Bɛtmaakdɔglɔ bɔ wa̧a̧wɛ an luknɔyaadɛ, giwɛ ook a luknɔ du gi tuur an ɗɔbsig bɔ dɔglɔ gi mid kete. 24Yɔ anbɔ Bɛtmaakdɔgl bɔ gisɛ doo-ɛ̧ɛ̧nikya wɛɛnɛ, tuur a ɔ̧tyɔ Kristu zaa gedu an Bɛt gi wɛɛnɛ dood riitɛ gi muutdu a ɔ̧tɔge a wɛ ɗɔbsig dɔŋgo. 25Yɛrɛyɔ wɛ gi ɗɔbsig Kristu, Bɛt maakdɔglɔ bɔ da̧a̧da̧ ma, wɛ taa a doo-ɛ̧ɛ̧nikya bɔ gi naan du ma.
26Nɛ sɛw nɛ gi Bɛt waato anyɔ nɛ ɗɔbs Yeesu Kristu, nɛ ɔksig hi giya. 27Nɛ dag Bɛtmɛm nɛ sɛw nɛ ɔks hi Kristu, nɛ heg Kristu an dimnaan yɔ nɛ hek muulɛ. 28Yɔ anbɔ nɛ sɛw nɛ gi muul gbunu anyɔ nɛ ɔks hi Yeesu Kristu yɔ gɔ gɛ̧ɛ̧ dood gɛ, gɛ̧ɛ̧ Yahuduyaadɛ hi wɔ hi taa Yahuduyaadɛ gɛ, zaabe gɛ̧ɛ̧ namɔ hi doo gɛ, gɛ̧ɛ̧ walɛ hi nɛɛd gɛ. 29Anyɔ nɛ gi Kristu dood ɔnɛ nɛ gi Abraham dɔ̧ɔ̧t ɔɔnɛ, wɛɛ Bɛt gaazin rɔbs bɔ da raa nɛ a bé gaa Abraham dɔ̧ɔ̧t be.
Currently Selected:
GALATIYA 3: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.