GALATIYA 2
2
GALATIYA 2
1Wɛɛ kuudu wɛl koobl daa nasɔ mi wɛɛ mi dɔɔ a Urusalima hi Barnabas, mi kam Titus du hɛw. 2Yɔ Bɛt raasim an mi rek a hɔ gii mi rekɔ. Yɔ mi dagtin hi dood gbɔlɛ Yeesu fɔkya wɔ ɔ̧ɔ̧kya̧, mi wadsihi Dɔgl Rɔb yɔ mi da mi dɔk nɛ a dood wɔ hi taa Yahuduya gɛ hi teesdu. Yɔ anbɔ, ha̧a̧m an bɔ̄ woos yɔ mi da mi woo nɛko, zaabe yɔ mi gi wooko gi wɛɛ hintɔs. 3Hɔnɛ Titus yɔ gi hi miya, taa Yahuduya, gi Yonaniŋkoyayɔ, wɛɛ doo za fɛ̧ɛ̧ge an gi nabɔ gi wɛɛ an Yahuduya hɛw gɛ.
4Yeesu fɔkya ya̧a̧gɔ̧ɔ̧nyaadɛ hi guz wi teesdu hi kɛ̧ɛ̧tig an hi sɔ̧ɔ̧ zul wɛ yɔ wɛ dag aakil du a ɔksig wɛ bɔ gedu hi Yeesu Kristu, ha̧a̧hi an hi nab Titus an kuudu hi wɛɛnɛ Yahuduya maak gbaarɛdɛ. 5Wii be wi tā̧ā̧ dɔglya̧ gɛ nɛ zaŋ. Ha̧a̧wi an wi oos rɔb yɔ fu̧u̧z a Dɔgl Rɔb bɔ gedu bɛttɔnɔ giya. 6Yɔ anbɔ dood wɔ hi gihi seek an dood gbɔlɛ be - dɔgl mi taadu hi gbɔlumsya̧ bɔrɔ. Bɛt gɔ gɛ̧ɛ̧ dood gɛ be - mba dood wɔ hi gihi seek an dood gbɔlɛyɔ hí gōksim hinza gɛ.
7Yɔ taa nɛ anbɔ gɛ si̧, Yakuba, hi Piyɛr hi Yohana hi gbɛn a Bɛt gaam woosɛ an mi dɔg dɔglɔ a dood wɔ hi taa Yahuduyaadɛ gɛ hi teesdu anyɔ gaa Piyɛr a Yahuduya wɔ hi teesdu be. 8Bɛt yɔ gaa Piyɛr tɛŋk an gi wɛɛ tɔmsɔya a Yahuduya wɔ hi tees du, wɛɛ gaa mii tɛŋk an mi wɛɛ tɔmsɔya a dood wɔ hi taa Yahuduya gɛ hi teesdu be.
9Yɔ Yakuba hi Piyɛr hi Yohana, wɔ hi sɔ̧ɔ̧hi an dood gbɔlɛ nɛ zaŋ, hi gbɛn gɛmsil yɔ Bɛt gaami anyɔ gaam woos bɔ, hi wɛɛ hi gaatin hatnaan gɔ hi Barnabas hi miya an hi zuun a wi sɛw wi wootin woosɛ. Wi wɛɛ wi wɔ̀ kɔlk wi a Barnabas hi miya wi woo a dood wɔ hi taa Yahuduya gɛ hi teesdu, hii be hi woo a Yahuduya wɔ hi teesdu be. 10Hi ɛrim hin gbun kpɔd a bɔwɛ zɛns ya̧a̧rya wɔ a Urusalima ɗaaki. Mi woo hinɔ gii hi tɛŋko. 11Yɔ Piyɛr zaa a Aŋtakiya, mi dɔ̧ɔ̧lige a Yeesu fɔkya wɔ hi lɔlgbar sɛw a hin-a̧a̧b yɔ woo gi dɔŋgo.
12Gɔ da ginɛ hinletingo hi dood wɔ hi taa Yahuduya gɛ. Kuudu be, dood zaadɛ hi fu̧u̧z nɛ a Yakuba doodɔ hi, hi tuurɔ. Hɔnɛyɔ Piyɛr hoobha̧a̧g dood wɔ gɔ hi raak a gi an Yeesu fɔkya wɔ hi taa Yahuduya gɛ hi naabɔ, yɔ wɔrɔ hi bɛɛ tuuruko, Piyɛr hɛml gɔ hi dood wɔ hi taa Yahuduya gɛ, ɔɔ hinlek gɔ hi hiya. 13Yeesu fɔkya Yahuduya zaadɛ wɔ hi woo mɛlwoosɔ an giya, tuur an Barnabas hɛw gi fɔ mɛlya̧ woos bɔ.
14Yɔ mi gbɛn hi hɛɛk Dɔgl Rɔb bɔ rɔbɔ bɔ anbɔ, mi raa Piyɛr a dood lɔlgbar sɛw a mɔɔ yɔ mɔ gi Yahuduya, mɔ waak hɛdi an dood wɔ hi taa Yahu-duya hi waako, mɔ́ fɔ̄ Yahuduya maakdɔgl gɛ, ri gi ha̧a̧m an mɔ fɛ̧ɛ̧ dood dɔɔmɛ wɔ hi waa an Yahuduyaadɛ nɔ?
15Wii Yeesu fɔkya wɔ wi mɔɔy Yahuduyaadɛ zaŋ, wi taa dood rɔ̀bɛ wɔ hi fɔ̄ Bɛtmaakdɔgl gɛ. 16Yɛrɛ wi mɛɛ a Bɛt gɔ sɔ̧̄ɔ̧̄ za̧a̧nza an doo riiti a maakdɔgl yɔ gi fɔk gi dɔŋg gɛ, gɔ sɔ̧ɔ̧g an doo riiti anyɔ gi ɗɔbsig Yeesu Kristu. Wii hɛw, wi ɗɔbs Yeesu Kristu an wi riis Bɛto a Kristu ɗɔbsigɔ bɔ gi dɔŋgo, taa a maakdɔgl fɔk dɔŋgo. Yɛrɛ taa an doo za gi riis Bɛt a maakdɔgl fɔk dɔŋg ma.
17Yɔ anbɔ, gid wii Yahuduya wɔ wi tɛk an wi riis Bɛt anyɔ wi ɔksig hi Yeesu Kristu be, wi wɛɛ dood wɔ gɔ hi elihi a hi dood hinha̧a̧l wookyaadɛyɔ anyɔ wi taa Bɛt maakɔdɔgl fɔko. Nɛ yɔ anbɔ gi ma an Kristu wɛɛnɛ hinha̧a̧lwookya ya? ɛ̧-ɛ̧! Lab gɛ nɛ zaŋ! 18Yɛrɛ doo gi raa Bɛtmaakdɔglɔ wɔ a taa an hi fɔbɔ, kuudu gi wɛɛ gi raa a gi an hi fɔbɔ, nɛ zuun gaattɔnɔ a gi wook hin-a̧a̧bi ma mi? 19Yɛrɛ mi gi an wɔrko a Bɛtmaakdɔgl dɔŋgo, Bɛt-maakdɔgl bɔ gii gbɔmi, mi za̧a̧ ma a Bɛt zulɛ. Hi da hi doomi a dɔ̧ɔ̧r muulɛ hi Kristu elo,
20mii taa za̧a̧til ma, Kristu giigi za̧a̧til a mi muul du. Waabil mi kuud yɛrɛ mi waak a mi muul du, mi waak hi ɗɔbsig mi a Bɛt waawal yɔ ha̧a̧ge a mi muulɛ gi wɛɛ gi gàà zulɔ gi wɔr a mi kalɛ. 21Mi taa Bɛt gɛmsilɔ yɔ za̧a̧s dood bisugo. À Bɛt sɔ̧ɔ̧wɛ an dood riitɛ a maakdɔglɔ fɔk dɔŋgo, Kristu yɔ wɔr nɛ ditɔs.
Currently Selected:
GALATIYA 2: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.