1 KƆRƐŊGTU 16
16
1 KƆRƐŊGTU 16
1An hinyɔ gi seek an hi mɔkts Bɛt doodɔ wɔ a Urusalima tusɛ, nɛɛ hɛw, woonɛ anyɔ mi da mi raas Yeesu fɔkya wɔ hi mɔksig lɛl sɔmsɔm a Galatiya dɔglɔ. 2A dimaas nuŋg sɛw, bɔbe gbaag tus yɔ dag kaasi anyɔ ɗɛɛ rɔbtɔnɔ lɛlɔ sɔm a nɛ lɛlɛ, an bɔnɛ oon tus mɔksig dɔgl zaak mi. 3Gɔ mi zaa, mi yaan dood wɔ nɛ herihi nɛ ta̧a̧ dɔglya̧ hi ɗɛɛrwoli an hi kam gaas nɛ bɔ a Urusalima. 4Hinɔ gi rii an mi rek hi zul mi, hi retin hi mii hɛw.
5Mi daak a Makeduniya an mi zɛ̧br Yeesu fɔkya wɔ hɔ. Gɔ gi kuudu, mi zaak a nɛɛge. 6Kinsa mi am a nɛɛge hɔ, zaabe ga̧a̧k gi zɛ̧m hɔ hɛw an kuudu nɛ ɔɔm kaŋk a lɛlyɔ gɔ mi rek ge. 7Ya̧a̧nɛ, hā̧a̧m an mi daa nɔɔha mi seen gɛ; Waar Yeesu gi gaam gbɔnɔ, mi mɔkig an mi waa hi nɛɛ gi am kaasi. 8Yɛrɛ mi ɗɔɔt hɛdi a Efesu gi tuur a Paŋtekosta naab du kete. 9Ya̧a̧nɛ Bɛt gborsim gbɔnɔ gbɔɔl yɔ woos gɔ gi rek doos gedu hi tɛŋko. Ya̧a̧-kɛtil miya wɔ hi gis gɔ kittɔnɔ be.
10Timɔte gɔ gi tuurɔ, oonɛg du an bɔgi ɗɔɔt nɛ teesdu hi hoobo, gi wook Waar Yeesu woosɔ an miya, ya̧a̧nɛ. 11Bɔ doo gi seeg an hintɔs. Yaazinge rɔbtɔnɔ an gi zaa gi tuur a rniige, mi gig ooko hi yɛ̧ɛ̧dɛ mi Yeesu fɔkya wɔ. 12Gii yɛ̧ɛ̧wɛ Apolos be, mi zɔ̧g gbɔɔltɔnɔ an gi rek a nɛɛge hi yɛ̧ɛ̧dɛ Yeesu fɔkya zaadɛ wɔ. Yɛrɛ tā̧ā̧ an gi rek ɓɔri gɛ. Gɔ gi dag gbɔnɔ ro gi ɔɔ reko.
13Oonɛ waan ɗɔbsig hi kpoos nɛ gbunu, ɓaasin muul nɛ, dagin tɛŋko. 14An hinyɔ nɛ wook sɛw gi wooy hi Bɛt hat kpoosdu. 15Yɛ̧ɛ̧dɛ mi wɛ, mi wɛɛ mi gin dɔgl za gaak gɛrɛ ɓɛ. Nɛ mɛɛ a Estafanus raatɔ hii ɗɔbs Yeesu biitiri a Akaya. Hi gi woosig Bɛt doodɔ woosɛ hi kpoosya̧ sɛw. 16Nɛɛ hɛw, mi gin zɔ̧ko, kɛmsin dood wɔrɔ labɔ hi wɔ hi gi wooswootingo el tɔnɛ.
17Mi gi hat dak hi Estafanus, hi Fɔrtinatus hi Akayus zaakya̧ bɔ; hi gààmi hinyɔ nɛ ɗɛɛ gɛ anyɔ nɛ da nɛ zaa gɛ. 18Hi es mɔkil mi sob hi nɛnɛ hɛw. Mɛɛn ma dood wɔrɔ lab seekɔ du. 19Yeesu fɔkya wɔ hi mɔksig lɛl sɔmsɔm a Aaziya a hi boon du. Akilas hi nisɔ Piriskila hi Yeesu fɔkya wɔ hi mɔksig a hi raa du hi boom du gbɔɔltɔnɔ a Yeesu nuŋg du.
20Yɛ̧ɛ̧dɛ Yeesu fɔkya wɔ sɛw hi boon du. Bootinnɛ bɛttɔnɔ hi yɛ̧ɛ̧dums hato. 21Mii Pol mi boonɛ. Mi bi̧i̧sin ɗɛɛrwol yɛrɛ hi naan miinɛ. 22Doo gi hā̧a̧g Waar Yeesu gɛ, boot yɛgi gɔge. ꞋꞋMaranata! ꞋꞋ Raakɔ a Waar i, zaamɔ! Aanbɔ. 23An Waar wɛ Yeesu gɛmsilɔ gi gi hi nɛya! 24Ha̧a̧tig mi gi hi nɛɛ sɛw a ɔksil wɛ bɔ gedu hi Yeesu Kristu. Aanbɔ!
Currently Selected:
1 KƆRƐŊGTU 16: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.