1 KƆRƐŊGTU 15
15
1 KƆRƐŊGTU 15
1Yɛ̧ɛ̧dɛ mi wɛ, mi gisin dɔk an nɛ mɛks Dɔgl Rɔb bɔ mi da mi dɔgsinɛ, yɔ nɛ ta̧a̧ Yeesu dɔgl bɔ hi kpoos nɛ, nɛ gig waak fɔki. 2Gid nɛ wa̧a̧ dɔglɔ kpoos ɗu anyɔ mi da mi dɔgsinɛ, dɔglɔ gii za̧a̧sinɛ. À lab gɛ yɔ nɛ ɗɔbs ya̧a̧rɛ.
3Mi baar mi gogsin hinyɔ mi dagɔ, mi ɔɔnin an hingok gbɔɔl yɔ daarlɛlɛ a Kristu wɔr a wɛ hinha̧a̧l dɔŋgo anyɔ Bɛt ɗɛɛrwolɔ dɔgɔ: 4a wɔrɔ hi i̧i̧ge wɛɛ rɛml ɗuk a ɔ̧t taasimɛ anyɔ Bɛt ɗɛɛrwolɔ dɔgɔ ; 5wɛɛ mits Piyɛr , kuudu wɛɛ mits fɔkɔya koobl daa eer wɔ.
6Kuudu mits yɛ̧ɛ̧dɛ zaadɛ fɔkɔ-yaadɛ tɛmɛrɛ nɔɔnɛ muutɔ, a ɔ̧t gbun bɔ gedu. Yɛ̧ɛ̧dɛ wɔrɔ zaadɛya̧ hi wɔr be, zaadɛya̧ kitɛ hi gi za̧a̧tili àgiyɔ te. 7Wɛɛ kuudu ɓɛ mits Yakuba, kuudu mits tɔmsya wɔ sɛw. 8A hi kuudu sɛwi, wɛɛ mits miya, yɔ mi gi an waa yɔ hi hodige. 9Mi yɛ̧b mi daar tɔmsya wɔ sɛw, anyɔ mi zɛks nɛ Yeesu fɔkya wɔ ɔksilya̧ yɔ gi Bɛt ɔ̧nɛ, mí rı̄ı̄ an hi elim a tɔmsya gɛ.
10Hi Bɛt gɛmsil ɔ̧ɔ̧n ro, mi gi hinyɔ mi giro, gɛmsilɔ bɔ gi a mi gbaŋgi taa hintɔs. Yɔ anbɔ mi woo Bɛt woosɔ mi daarihi sɛw. Mí wōō hi zul mi gɛ, Bɛt gɛmsilɔ yɔ gihi mii gii woo. 11Yɛrɛyɔ, gi gi miya, gi gi hiya, Dɔgl Rɔb bɔ wi gisin dɔk gɛrɛ, nɛ wɛɛ nɛ ɗɔbs dɔglɔ giibɔ. 12Yɛrɛyɔ an wi dɔgnik Bɛtdɔglɛ a Kristu rɛmlɔ a wɔrkɛ teesdu ɗuukɔ, ri dood zaadɛ a nɛ teesdu hi dɔk a wɔrkɛ rɛmtig taa nɔ? 13À wɔrkɛ rɛmtig taa nɛ gɛ, Kristu yɔ rɛml nɛ a wɔrk du gɛ ma.
14Wɛɛ à Kristu rɛml nɛ gɛ, Bɛtdɔgl wi dɔk bɔ yɔ ginɛ hintɔsi ma, ɗɔbsig nɛ bɔ hɛw yɔ gi hintɔsi be. 15À taa nɛ an Bɛt gi rɛms nɛ wɔrkɛ wɔ gɛ, yɔ anbɔ an doo hi see hi zɛm gedu a wi gi Bɛt dɔgldɔkya ya̧a̧gɔ̧ɔ̧nyaadɛ a Bɛt gbaŋgi anyɔ wi dɔg hindɔɔm hi nuŋgɔ a gii rɛms Kristu a wɔrk du, à da rɛmsig nɛ gɛ. 16Nɛ gi taa an wɔrkɛ hi rɛml gɛ, Kristu hɛw rɛml ma gɛ. 17Wɛɛ à Kristu rɛml gɛ, ɗɔbsig nɛ gi tɔsyɔ, nɛ wɛɛ nɛ gis a nɛ hinha̧a̧l du tɛ̧.
18Wɛɛ wɔ hi ɗɔbs nɛ Kristu hi wɔrɔ hi wag nɛ ya̧nɛ da̧a̧da̧. 19Gid mɔkil yɔ wɛ gbaak a Kristu ge gisɛ ɗaak a waabil wɛ yɛrɛ gedu kpɔdi, wɛ rii an hi mɛɛsɛ ya̧a̧r gi daar dood sɛw. 20Nɛ yɛrɛ ɔnɛ, Kristu rɛml ma a wɔrkɛ tees du, wɛɛ wɔ hi wɔr nɛ sɛw gbɔnɔya̧ dorkyayɔ. 21Ya̧a̧nɛ, anyɔ wɔrk dag tɛŋk a doo dɔŋgo, wɔrkɛ rɛmtig dag tɛŋk gɔ a doo dɔŋg be. 22Wɛɛ anyɔ dood sɛw hi wɔrk a ɔksigya̧ bɔ gedu hi Àdamu, dood sɛw hi wɛɛ hi rɛml gɔ ɔksigya̧ bɔ gedu hi Kristu be.
23Bɔ be gi rɛml a fɔbtingo ɔ̧ɔ̧ gedu. Kristu gii baarɔ, gɔgi wɛɛzig be doodɔ wɔ hi rɛml gɔ a zaakɔ bɔ gedu. 24Kuudu, waalda̧a̧k gɔ gi tuurɔ, Kristu gi bɛɛ waar ums wɔ sɛw, hi gbɔlums wɔ sɛw, hi tɛŋk gbɔlɛ wɔ sɛw ha̧tirgo, gi wɛns Bɛt yɔ gi Baaba wáátɔ bɔ naan du. 25Ya̧a̧nɛ gi an Kristu gi ɗɔɔt waar i gi tuur an Bɛt gi gbaa lɔlɔhɛ̧ɛ̧nikya wɔ a gi dɔɔ du. 26Lɔlhɛ̧ɛ̧nikya yɔ̧ɔ̧sum bɔ Bɛt gɔ gi ha̧tirge, gɛ wɔrko.
27Anyɔ Bɛt ɗɛɛrwolɔ raa a Bɛt gbaa hin sɛw a waaɔ dɔɔ du, wɛ mɛɛ a yɔ hi bi̧i̧ a hin sɛw hi tiis zulya̧ a Kristu dɔŋdi, hinɔ taa raak a Bɛt hi zulɔ gi tiis zulɔ a Kristu dɔŋdi. Ya̧a̧nɛ Bɛt gii tiis hin sɛw a Kristu dɔŋdi. 28Wɛɛ hin sɛw gɔ hi tiis zulya̧ a Kristu dɔŋdi, gɔ gi anbɔ Kristu hi zulɔ gi tiis zulɔ a Za̧a̧nyɔ gbaasig nɛ hin sɛw gi dɔŋdi an kuudu Bɛt gigi hin sɛw a hin sɛw du. 29À lab gɛ, wɔ hi ta̧a̧k Bɛtmɛm look a wɔrkɛ dɔŋgo, hi woo ri be? À wɔrkɛ wɔ hi taa nɛ rɛmlik zaŋ be, nɔ hi gi Bɛtmɛm look a hi dɔŋgo?
30An wiya, nɔ wi gi a nɔk du ɔ̧t nuŋgo? 31Yɛ̧ɛ̧dɛ mi wɛ, ɔ̧t nuŋg sɛw mi gi a wɔrk naan du, mi dɔg rɔbo anyɔ muul mi ɓaa a Waar wɛ Yeesu Kristu muulɛ a nɛ dɔŋgo. 32Yɔ mi gi nɛ a Efesu, mi gɔ gabs hi namb hɛtum ha̧a̧lɛ; à mi gɔ nɛ anyɔ doo ha̧a̧g rɛ, yɔ ginɛ an mi dag nɔ gbɔɔlɔ gedu? À taa nɛ an wɔrkɛ hi rɛml gɛ, nɛ yɔ anbɔ, anyɔ ya̧a̧daanik dɔgɔ: yɛwɛ le, wɛ yɔ̧ ma, yoosig wɛ wɔrkwɔr be!
33Bɔnɛ maat zul nɛ: sams hi doo ha̧a̧lɛ gɔ ha̧tir ya̧a̧ rɔb ha̧tiro. 34Rɛ̧n ha nɛ wa̧a̧ zul nɛ anyɔ rii. Ɔɔn hinha̧a̧l nɛ. Ya̧a̧nɛ mi gbɛn dood zaadɛ a nɛ teesdu hí mɛ̄ɛ̄ Bɛt gɛ nɛ zaŋ. Mi gi book an seem gi ha̧a̧nɛ.
35Yɔ anbɔ kinsa doo za gi warɔ: a wɔrkɛ hi rɛml ri nɔ? Hi wɛɛ hi wɛɛz hi nɔ muulɔ? 36Mɔɔ doo yoo! Mɔ mɛɛ gɛ ya? Dɔ̧ɔ̧t yɔ mɔ lug hɛbtdi à wɔr gɛ ɗɛɛ an gi pir ri? 37Wɛɛ hinyɔ mɔ lugɔ gi gaat tɔs, zaabe tot gaato, zaabe hinza gaato, ɔ̧nɛ rı̄ı̄tin hi hinyɔ gɔ pir gɛ. Gaat bɔ muulɔ sɔm, tɛ̧ɛ̧ bɔ muulɔ sɔm be, hí riitin nɛ gɛ zaŋ. 38Bɛt gaag muulɔ anyɔ ha̧a̧g ro. Hinlɛŋks yɔ gi sɛw Bɛt gaag muul ɔnɛ yɔ fɔg giya.
39Hinza̧a̧til namb yɔ gi sɛw hi taa gbun bɔ: doo nambɔ gi sɔm, namb nambɔ gi sɔm, nɔɔs nambɔ gi sɔm, dut nambɔ gi sɔm. 40Muul bɛtum giro, hɛbtum gi be; muul bɛtum gaatigɔ sɔm hi muul hɛbtum gaatigɔ. 41Ɔ̧t gaatigɔ sɔm, sɛɛ gbɔɔl bɔ buutigɔ sɔm, sɛwaat buutig ya̧nɛ sɔm, sɛɛwaa za buutigɔ sɔm hi sɛɛwaa za dɔɔm buutigɔ be.
42Wɔrkɛ rɛmtigya̧ gi gi anbɔ. Hi lug muulɔ bɔ hɛbtdi dokili wɛɛ taa rɛmlik dokili. 43Hi lug muul bɔ hi bɔ̧ɔ̧sɛ, gi wɛɛ gi rɛml hi gbɔlumsɛ; hi lug muul bɔ hɔntili, gi wɛɛ gi rɛml hi tɛŋk gbɔɔltɔnɔ.
44Hi lug muul nambya, gi rɛml muul mɔkilya; gid muul nambya giro, muul mɔkilya gigi hɛw. 45Ya̧a̧nɛ Bɛt ɗɛɛrwolɔ raa
a doo doos bɔ Adamu wɛɛ kol za̧a̧tilyɔ.
Adamu yɔ̧ɔ̧sumɔ bɔ raakɔ a Kristu gi Mɔkil yɔ gi gaak za̧a̧tig giya. 46Yɛrɛ hinyɔ gi Bɛt mɔkilya taa hin doosi, hinyɔ fu̧u̧z hɛbtdi gii gi zaa doosi, wɛɛ hin Bɛtmɔkilya bɔ gi zaa kuudu be. 47Doo biitir bɔ Bɛt ha̧dzig a hɛbtdi gi hɛbtumyɔ, doo eesum bɔ be gi bɛtumyɔ. 48Za̧a̧nyɔ ki̧y hi hɛbto, dood wɔ hɛbtdi hi gi lab be. Za̧a̧nyɔ fu̧u̧z a bɛtha, wɔ hi gi bɛtha hi gi lab be. 49Anyɔ wɛ riitin hi doo hɛbtum bɔ a waabil yɔ ɓɔryɔ duge, gbunɔ gii wɛ riitin hi doo bɛtum bɔ kuudu a waabil yɔ gi zaak gedu.
50Yɛ̧ɛ̧dɛ mi wɛ, mi raa a riya? Hinyɔ Bɛt kim hi yɔ̧kti hi ga̧a̧mɛ hi ɗɛ̄ɛ̄ an hi dag Bɛt wáát bɔ ya̧nɛ gɛ, wɛɛ hindokili taa an gi waa a hinyɔ taa dokil gɛ gedu. 51Laginɛ! Yɛrɛ mi gisin dɔk dɔgl za yaatilya: wɛ́ taa wɔrk wɛ sɛw, wɛ́ sɛw wɛ́ zɛmrɔ. 52Hinɔ gi tuur a pɔ̧r-ulk yɔ̧ɔ̧sum bɔ gedu nɔɔktɔnɔ, a lɔlgbɛɛk du. Bɛtwalsɛr gi bɛɛ pɔ̧r ulko, Bɛt gi rɛms wɔrkɛ wɔ hi dag muul za̧a̧tig faaya, wɛ́ wɛɛ wɛ́ zɛmr za̧a̧tili.
53Ya̧a̧nɛ muul dokil yɛrɛ gi an gi wɛɛ gi heg muul za̧a̧tig faaya bɔ; wɛɛ muul wɔrkil yɛrɛ be gi heg muul yɔ gɔ gi wɔr gɛ. 54Muul dokil bɔ gɔ gi heg muul za̧a̧tig faaya bɔ, wɛɛ muul wɔrkil bɔ gɔ gi heg muulyɔ gɔ gi wɔr gɛ, kuudu hinyɔ hi bi̧i̧ gi tuurɔ:
a wɔrk i̧i̧y ɗɛɛt buudu. 55Eh! wɔrko, ɗɛɛt mɔ gi ay? Eh! wɔrko, ros mɔ gi ay?
56Wɔrk rosɔ gɛ: hinha̧a̧lɛ, hinha̧a̧l tɛŋkɔ be gɛ: maakdɔglɛ. 57Yɛrɛ bant gi a Bɛt yɔ gi wɛ gaak ɗɛɛt a Waar wɛ Yeesu Kristu zul ge! 58Ya̧a̧nɛ yɛ̧ɛ̧dɛ mi rɔbɛ wɛ, waan hi kpoos nɛ gbunu, bɔnɛ namɔ, waasin Waar Yeesu woosɔwook hi tɛŋko anyɔ nɛ mɛɛ a woos nɛ taa an gi wɛɛ hintɔs anyɔ nɛ ɔks hi Waar Yeesu.
Currently Selected:
1 KƆRƐŊGTU 15: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.