OSEE 1
1
1Mɔ nɛ a̧a̧ zaŋ kalata’ɛ nɛ wen nɛ GASA WAN tɔ̧ɔ̧ ha̧ Osee bem ko Beeri, ŋgimbi wan ko Ozias, Yotam, Ahaz in Ezɛkias nɛ ɔɔ so wan Juda. Tɛ ŋgimbi'i, nɛ́ Jeroboam bem ko Jɔas a̧ ɔ wan Israɛl mɛ.#2 Wan 14.23—15.7; 15.32—16.20; 18.1—20.21; 2 Kal Ny 26.1—27.8; 28.1—32.33
Baa kóò ko wi-tɔ̧-wen oi nú Sɔ̧ Osee in kóó bem kɔ̧-a̧
2Ɛ̧ɛ̧ nɛ ku̧u̧naŋ tɔ̧ɔ̧ wen ko GASA WAN, ŋgimbi n'aa ee nɛ wen nú wi-tɔ̧-wen oi nú Sɔ̧ Osee wen tɔ̧a̧-a̧ ha̧ dukbíí kɔ̧-a̧:
«Mɛ̀ nɛ́ɛ̀ ba kó-dàlà#1.2 ko-dala: pɛrti dee dala’ɛ tɛ́ bò nɛ́ wan nɛ́ wa de só ɗafi nɛ̀ sɔ̧ Bal in wannu-okoo sɔ̧ Astarte; hegɔ o bem nɛ̀ Osee tɛ́ ko in koo'i beka kpa mɔɔ-oi hee o mgbak o bem ga na. nɛ kóò,
a̧ mɛ̀ kó be-dàlà in a̧;
ɛ̧ɛ̧ kinii nù'ɛ ea'm duk
hee mɔ'ɔ nɛ kó-dàlà e nɛ wíì kɔ‘i duk’ɛ ga.»
3Nɛ mɔ'ɔ n'aa nɛ̀ɛ́ ba Gɔmɛr, boko-bem ko Diblayim nɛ kóò, ɓɛɛ Gɔmɛr ba zaŋ ko nɛ̀ be-wiwii ha̧ a̧; 4ɓɛɛ GASA WAN tɔ̧ ha̧ Osee:
«Mɛ̀ á nin bem’ɛi nɛ Yizreɛl,
wen dekpaa mi tɛ kundi ari
ha̧ o bíí nutua ko Jɛhu
wen o bíí nɛ wa gbɛɛ so saaye Yizreɛl,
ɓɛɛ mi tɛ yai mɔɔ-wan ko Israɛl yinɛ mbɛt.#2 Wan 10.11
5Wese'i, mi tɛ gbin kusaa-goo ko Israɛl a nù
sɛn kɔ̧ ɗɔŋgɔ Yizreɛl.»
6Gɔmɛr baa zaŋ woyo, ko nɛ̀ be-okoo, ɓɛɛ GASA WAN tɔ̧ ha̧ Osee:
«Mɛ̀ á nin-a'e Pi̧i̧-Taŋ,#1.6 Pi̧i̧-Taŋ: nɛ̀ nú hébreu nɛ́ Lo-Ruhama.
wen mi beka usi kɔ̧ɔ̧mɔ
ha̧ nutua Israɛl ɓɔna,
kà bó nɛ̀ ee ɗaŋmɔ ha̧ wa na mbɛt.
7«Ɓɛɛ war nutua ko Juda, mi tɛ usi kɔ̧ɔ̧mɔ ha̧ wa; mi GASA WAN Sɔ̧ kɔ-wa tɛ kpasi wa; ɓɛɛ bó nɛ́ biro a̧‘m tɛ de nɛ kusaa-goo, gba-paa, nyaŋa, kóó o wan-nyaŋa kpasi nɛ wa na.»
8Pi̧i̧taŋ bɛ̧ɛ̧ bere, ɓɛɛ Gɔmɛr ba mbe zaŋ woyo ko nɛ̀ be-wiwii, 9ɓɛɛ GASA WAN tɔ̧ ha̧ Osee:
«Mɛ̀ á nin-a'e, Bɛ̧ɛ̧-pi̧-nù;#1.9 Bɛ̧ɛ̧-pi̧-nù: nú hébreu nɛ́ Lo-Ammi.
wen ɛnɛ bó nɛ́ dukbíí kɔ‘m ɓɔna,
ɓɛɛ mi bó nɛ́ Sɔ̧ k’ɛ́nɛ́ ɓɔna mbɛt.»
Currently Selected:
OSEE 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.