DANIƐL 12
12
Sɔŋkur ŋgimbi
1«Tɛ ŋgimbi'i, Michɛl gasa betom mɛ yiwese nɛ yor ɗoŋ dukbíí kɔ-mɛ tɛ tɛ. Mɔ‘i tɛ duk nɛ ŋgimbi gasa bɔnɛ, wen nɛ̀ tugun bíí duk nɛnɛ tɛnɛ‘i, wi tɛ zɔk pɛrti mɔ hegɔ nɛti na, ɓɛɛ o bíí kɔ-mɛ lɛŋ nɛ nin-wa yɔra zaŋ Kalata tɛ kpasi.#Mt 24.21; Mk 13.19; Tɔ̧ɔ̧ Hu̧ 7.14; 12.7 2O bíí nɛ dɔka-a nɛ ɔ nɛ ya ɗɔɔ nu tɛ tun: o ŋma tɛ tun kɔ‘i wen duka-kpasa kpoo nɛ kpoo, ɓɛɛ ko o ŋma nɛ́ wen foe in ziimɔ a̧ tɛ ba wa kpoo nɛ kpoo.#Es 26.19; Mt 25.46; Jn 5.29 3O wi nɛ yaa so nɛ wi-iŋ-mgbara-mɔ tɛ tok hee yiwese ga, ɓɛɛ o wi nɛ foo o giiwi á tɛ dee mɔ nɛ yuwar-a tɛ tok hee sɔra ga ɓɔnsɛnɛ.
4«War kɔ-mɛ Daniɛl, mɛ̀ é wen’ɛ kɔ̧ see-mɛ, ká mɛ tɔ̧ ha̧ ŋma bíí na in mɛ̀ látí nu kalata’ɛ nɛ de-a hɔ tɛ sɔŋkur ŋgimbi. O bíí nɛ dɔka-a tɛ tɔr kalata’ɛ, ɓɛɛ wa kpaa gasa iŋamɔ#12.4b o ŋma texte tɔ̧a: o giiwi tɛ́ sakali, ɓɛɛ iŋamɔ tɛ́ dɔk siti.#Tɔ̧ɔ̧ Hu̧ 22.10 sɛnɛ.
5«Kà‘m zɔk wo, o ŋma bíí yiitoo nɛ mɔ'ɔ nɛ yor ká̧ ŋgere’ɛ, ɓii-wi duka so nɛ kur yi, ɓii-aa nɛ kur pii tɛ‘m. 6Ɓii bíí tɔ̧ɔ̧ ha̧ wi nɛ pi̧i̧ nɛ yɛ́m-yɛ́m laa nɛ yora so see yì: ‹O kpoko mɔɔ nɔ'ɔ tɛ kaɗi mɛ gese ge?›
7«Ɓɛɛ mi zɔk wi-pi̧ yɛ́m-yɛ́m laa, nɛ yor so see yì fara nyɛi̧a er yiitoo lɛŋ si ŋgɔn, kan nɛ mɔ nɛ nin Wan nɛ duk ɓɔnsɛnɛ‘e: ‹Mɔɔ nɔ‘i tɛ de tɛ ŋma ŋgimbi, tɛ ŋma ŋgimbi yiitoo in tɛ ŋma reeta ŋgimbi#12.7 o ŋgimbi nɔ'ɔ usi nɛ́ pɛ taar nɛ̀ reeta.#Tɔ̧ɔ̧ Hu̧ 10.5; 12.14 hɔ wese nɛ ŋgai ko sa̧a̧ dukbíí tɛ kaɗi lɛŋ.›
8«Mi zia wen'i, ɓɛɛ mi iŋ mgbara-a na, sa'm ak mɔ: ‹Nyaa, mɔ‘i tɛ kaɗi hee ge?›
9«A̧ kifa nú ha̧‘m: ‹Ká mɛ ta mɔ na, Daniɛl; o wen nɔ‘i tɛ duk nɛ hu̧sa̧-a̧, in nɛ kpea-a hɔ sɔŋkur ŋgimbi. 10War-tɛ bíí nɛ dɔka-a tɛ sa̧, nɛ de-a. O wi-de-ɗaŋmɔ tɛ de kana nɛ́ ɗaŋmɔ, wa beka iŋ mgbara mɔ na, ɓɛɛ nɛ́ o wi-iŋ-mgbara-mɔ a̧ tɛ iŋ mgbara mɔ.#Tɔ̧ɔ̧ Hu̧ 22.11
11« ‹Tɛ ŋgimbi nɛ ɗafa-sɔ̧ wese lɛŋ tɛ kaɗi nɛnɛ in nɛ wa tɛ e nɛ ndiŋ mɔɔ-ɗaŋ-mɔ oi-aa, nɛ́ zɛ booro-nɛ-gɔmŋmaa-yiitoo-zua-ɓu-mɔɔrɔ-ɗoŋ-naar a̧ tɛ yak.#Dan 9.27; 11.31; Mt 24.15; Mk 13.14 12Desee nɛ́ ko o wi nɛ tɛ pɛm mɔ nɛ nɔɔ ŋgiɗi tɛ zɛ booro-nɛ-gɔmŋmaa-taar-nɛ-ɓu-taar-zua-mɔɔrɔ.
13« ‹Ɓɛɛ kɔ-mɛ, mɛ̀ yór nɛ nɔa-a hɔ sɔŋkur-aa. Mɛ tɛ kpa ɔma-tɛ, ɓɛɛ mɛ kura wen kpaa mɔɔ-oi-tom kɔ-mɛ tɛ sɔŋkur ŋgimbi.› »
Currently Selected:
DANIƐL 12: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.