OSEE 2
2
Demɔ nɛ tɛ hɔ
1Ɓɛɛ ŋma ŋgimbi, o be Israɛl tɛ dɔk
hee nyɛmɛ ɗɔɔ gba tɔp ga,
nɛ‘i beka we dɔka-a
kà bó nɛ̀ tɔra-a pi̧ nù na.
O bíí tɔ̧ɔ̧ so'e:
«Ɛnɛ bo nɛ dukbíí kɔ‘m na.»
Ɓɛɛ tɛ ŋgimbi'i, wa tɛ tɔ̧‘e:
«Ɛnɛ nɛ o bem ko kpasa Sɔ̧.»#Rɔm 9.26
2O be Juda in o be Israɛl
tɛ mɔi̧ duk kpɔk,
ɓɛɛ wa tɛ hok wan kɔ-wa,
wa tɛ dɔk gan zu nù‘i,
ɓɛɛ wese'i tɛ duk nɛ gasa wese sɛn Yizreɛl.
3Ɛ̀nɛ̀ sá o nya'nɛ́ in o boko-nya'nɛ́‘e:
«Dukbíí kɔ‘m» in «Yaa-dua-see-am.»#2.3 dukbíí kɔ‘m in Yaa-dua-see-am: nɛ̀ nú hébreu nɛ́ Ammi in Ruhama
Israɛl, kó-de-dàlà
4Ɛ̀nɛ̀ ɓá kita in nàà k’ɛ́nɛ́,
ɛ̀nɛ̀ ɓá wen in a̧,
wen kinii, a̧ bo nɛ kóò kɔ‘m ɓɔna,
mi bo nɛ wíì kɔ̧-a̧ ɓɔna mbɛt.
A̧ a̧ fo o mɔɔ-ɗafi-tɛ de dàlà yinɛ yí-a,
a̧ a̧ kai o mɔɔ nɔ‘i yinɛ sara ber-aa;
5kà bo hegɔ na, mi tɛ kpɔ̧i̧ mɔ tɛ-a yinɛ
pi̧ a̧ zan nɛ mgbii,
hee wese nɛ nàá kòó nɛ a̧ ga,
ɓɛɛ mi tɛ de ha̧ a̧ mɛ duk
hee ŋga-gbárà in ŋga nù ga,
ha̧ a̧ mɛ fe wɔ yi.
6Mi beka kɔ̧ o bem kɔ̧-a̧ na,
wen wa nɛ o be-dàlà.
7Nàà kɔ-wa kifa kɔ‘i
nɛ kó-de-mɔ nɛ mbɔdɔnu, fɛŋ nɛ tɛ,
wen a̧‘e, wi tɛ ma yi si ɗoŋ o dàlà kɔ‘i,
wen nɛ́ wa a̧ dai wi,
ha̧ nɛ laa-ulu in yɛm-yɛm laa ha'i,
ká bá nɛ̀ nɔ in dɔ̧ɔ̧ mbɛt.
8Wen zu mɔ‘i, mi tɛ ŋgasi yuwar kɔ̧-a̧ nɛ tɛnmɔ,
mi tɛ kpe yuwar kɔ̧-a̧ ndiyɛ-ndiyɛ
n'aa beka kpa fara mɛ gbo nɛnɛ yak na.
9Kóó a̧ ndaka so ɗoŋ o dàlà kɔ̧-a̧ yaknɛ,
a̧ beka kpa wa na.
A̧ tɛ kii wa dam fara lɛŋ takaɗi.
Ɓɛɛ nɛ́ ŋgimbi'i a̧ a̧ tɛ tɔ̧ nɛnɛ‘e nde,
wi tɛ si ɗoŋ tɛ kuti wii kɔ‘i,
wen duka-a kɔ‘i mɛ ti dee gan ɛ̧ɛ̧ kinii.
10Ɓɛɛ a̧ iŋ‘e mɛ nɛ mi GASA WAN
a̧ ha̧ so alkamaari in nyɔ̧ɔ̧ dɔ̧ɔ̧,
ká bá nɛ̀ nɔ ha̧ a̧ na;
nɛ kpɔk mi’ɛ a̧ ha̧ bu sede in lɔr
nɛ dɔka-a ha̧ a̧ n'aa dui nɛ o géé-sɔ̧
nɛ‘i sa'e Bal.
11Wen zu mɔ‘i, mi tɛ de ha̧ o alkamaari
in o waya-nyak-dɔ̧ɔ̧ mɛ de nɛ zɔŋa sɔɔ gee;
ɓɛɛ mi tɛ́ kpɔ̧i̧ laa-ulu in yɛm-yɛm laa kɔ‘m
n'aa kpe so nɛ tɛ-a yinɛ.
12Mi tɛ pi̧ búù zu a ti o dàlà kɔ̧-a̧,
ɓɛɛ ŋma wi-ɓar-a er-am yinɛ beka bo na.
13Mi tɛ ba o mɔ nɛ ha̧ tortɛ ha̧ a̧ lɛŋ yinɛ:
o gbaŋa, o yɔyɛ mbe-yi-zɛ,
o wese-ɔm-tɛ in o gasa wese-de-nyɛŋɛ kɔ̧-a̧ lɛŋ.
14Mi tɛ ɗaŋ o waya-nyak-dɔ̧ɔ̧
in o te mbɔra kɔ̧-a̧ a nù lɔkɔti-lɔkɔti,
wen n'aa tɔ̧ɔ̧ so'e nde,
mɔɔ-oi dàlà nɛ‘i kpaa so nɛ mɔɔ nɔ‘i.
Mi tɛ de ha̧ o fɔ nɔ‘i mɛ kifi duk nɛ zaŋbɛɛ
fara nɛ o saɗi tɛ nyɔŋ mɔ sɛnɛ.
15Mi tɛ usi bɔnɛ ha̧ a̧
wen zu ɗafa o géé-sɔ̧ n'aa ɗafa so
a nɛ o kana in wele tɛ,
ma nɛ yi si ɗoŋ o dàlà kɔ̧-a̧ e nɛ‘m duk'i.
Nɛ mi GASA WAN a̧ tɔ̧ wen'i.
Kɔ̧ɔ̧mɔ ko GASA WAN in dukbíí kɔ‘i
16Kóó nɛ oi mɔ n'aa dea'i, mi tɛ a wen tɛ a,
ɓɛɛ mi mgbɔɔ a yaknɛ si ŋga-gbárà mɛ, mɛ ga̧ see-aa.
17Sɛn hi̧i̧, mi tɛ́ ha̧ fɔ-nyak-dɔ̧ɔ̧ kɔ̧-a̧ siɗoŋ ha̧ a̧,
ɓɛɛ mi dee ha̧ ɗɔŋgɔ Akɔr#2.17 Akɔr: nɛ̀ nú hébreu usi nɛ́ bɔnɛ.
mɛ kifi nɛ fara e nɛ ta kɔ̧-a̧.
Ɓɛɛ ŋgimbi'i, a̧ tɛ kɔ̧ ɗɔɔ nú‘m
hee tɛ ŋgimbi zɔŋa kɔ̧-a̧
n'aa gboo so nɛnɛ nɛ nú Egiptɛ mɛ ga.#Jos 7.24-26
18Nɛ mi GASA WAN a̧ tɔ̧ wen’ɛ.
Wese'i, a̧ tɛ sa'm'e,
kpasa wíì kɔ̧-a̧;
a̧ beka sa'm'e Bal, wan kɔ̧-a̧, ɓɔna.
19Mi tɛ ba nin o géé-sɔ̧ Bal kɔ̧ nú-a yinɛ;
wi beka iŋ oi nin-wa ɓɔna.
20Ɓɛɛ tɛ ŋgimbi'i, mi tɛ de ha̧ dukbíí kɔ‘m
mɛ nɔ tɔk in o saɗi-zaŋbɛɛ
ká bá nɛ̀ o nɔ̧́í̧ gu nɛ o saɗi-gbur-zaŋ-nɛ-nu mbɛt;
mi tɛ gbin o mɔɔ-de-biro,
kusaa-goo gu nɛ o gba-paa yinɛ zu nù'ɛ,
ɓɛɛ mi tɛ de ha̧ o be-nù'ɛ mɛ ɔ ya nɛ fee-see.
21Mi tɛ ba mɛ nɛ kóò woyo;
mɛ tɛ duk kóò ko'm ɓɔnsɛnɛ.
Mbɔi-ɗoŋ-mɛ tɛ duk nɛ deemɔ nɛ yuwar-a,
deemɔ sa̧, kɔ̧ɔ̧mɔ in mɔka-see.
22Mi tɛ ba mɛ nyɛm nɛ ɗoŋ ha̧a̧nú kɔ‘m,
ɓɛɛ mɛ tɛ iŋ‘e, mi nɛ GASA WAN.
23Nɛ́ mi GASA WAN a̧ tɔ̧ wen’ɛ.
Wese'i, mi tɛ kifi nú ha̧ yiwese,
ɓɛɛ yiwese kifa kɔ‘i ha̧ nù,
24ɓɛɛ nù tɛ kifi nú ha̧ alkamaari
in o waya-nyak-dɔ̧ɔ̧ ká bá nɛ̀ o te-nɔ,
ɓɛɛ o mɔɔ nɔ‘i kifa nú ha̧ Yizreɛl.
25Mi tɛ de ha̧ o be Israɛl mɛ dɔk zu nù‘i;
mi tɛ kɔ̧ Pi̧i̧taŋ,
ɓɛɛ mi tɛ sa Bɛ̧ɛ̧-pi̧-nù‘e: «Dukbíí kɔ‘m»,
ɓɛɛ a̧ saa'm'e: «Sɔ̧ kɔ‘m.»#Rɔm 9.25; 1 Pi 2.10
Currently Selected:
OSEE 2: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.