BARUK 1
1
Ku̧u̧naŋ wen: Baruk in o gii-Juif Babilɔŋ
1-2Ɛ̧ɛ̧ nɛ́ kalata nɛ́ Baruk yɔra sɛn Babilɔŋ, tɛ mɔɔrɔ pɛ, in ɔɔ-zɛ mɔɔrɔ-ɗoŋ-yiitoo tɛ fio-zɛ, tɛ ŋgimbi nɛ o be-Kaldee baa so nɛ Jerusalɛm, ká dɔ nɛ a̧'ɛ. Baruk'i nɛ́ bem ko Nerias, be-koo Maasias, nɛ gboo nɛ tɛ Helkias, nɛ ɗoŋ Asadias in Sedesias. 3Baruk tɔra gba̧a̧-wen kalata'i ti Jekonias, wannu Juda, bem ko Joakim, in ti giiwi lɛŋ nɛ tɛa mɛ zii wen'i, 4nɛ zer o gasawi, o be-wan, in o kutiwi, kana nɛ yi bii lɛŋ, dika tɛ o obem gu nɛ o gasa bii, nɛ zer o bii lɛŋ nɛ ɔ so Babilɔŋ, ka̧ zaŋ nanayi Sud. 5Wa lɛŋ hi̧i̧ so nɛ kɔ̧a̧, zim nɛ yi, kɔfi nɛ Gasa Wan 6Nɛ mɔ'ɔ nɛ wa ndɛma mbɔi, nyɛm nɛ ɗoŋ kpaamɔ ko bii kpɔk kpɔk, 7ɓɛɛ tom yaknɛ si Jerusalɛm ha̧ Joakim wiɗafisɔ̧, bem ko Helkias, be-koo Salɔm, in ha̧ oi o wiɗafisɔ, gu nɛ o dukbii lɛŋ, nɛ a̧-a̧ so Jerusalɛm in a̧.
8Nɛti, tɛ ɔɔ-zɛ ɓu ko fiozɛ Siwan, Baruk kaia so o mɔ kɔ̧ Tua ko Gasa Wan, o mɔ nɛ wa zu̧u̧ so kɔ̧ Tua'i, pii nɛ ɗoŋ nu ko Juda; duka so nɛ o mɔ, nɛ wannu Juda, nin-a nɛ Sedesias, bem ko Josias, dee so nɛ bu-mbɔi, 9ɗoŋ nɛ Nabukɔdɔnɔzɔr, wannu Babilɔŋ, baa so nɛ Jekonias in o gasawi, o wi-iŋ-tom, o be-wan, ká bá nɛ dukbii lɛŋ, nɛ bara-biro, yaknɛ nɛ Jerusalɛm si Babilɔŋ.
10O bara-biro nɔ‘i toma ha̧ o be Jerusalɛm'e: «Ɛ́ɛ́ toma nɛ sede h’ɛ́nɛ́: ɛnɛ bá, ɛnɛ hi̧fi̧ nɛ o saɗi-ɗafi-sɔ̧, o ŋma wen dɔaa nɛ oi-aa, o ŋma wen bura war-tɛ, ɛnɛ hi̧fi̧ fuu-nyama mbɛt; ɛnɛ ha̧ o mɔ ha̧ Gasa Wan Sɔ̧ k’ɛ́ɛ́ zu taŋge ɗafi-A̧ 11Ɛnɛ kɔfi Sɔ̧ wen Nabukodonosɔr wannu Babilɔŋ, in wen bem kɔ̧-a̧ Baltazar, ha̧ zɛ dukaa kɔ-wa mɛ dɔk hee zɛ-dukaa ko yiwɛse zu nu ga. 12Hegɔ Gasa Wan tɛ ha̧ ŋgai h’ɛ́ɛ́, ɓɛɛ A̧ tɛ hu̧i̧ yí-yɛ, ɛɛ tɛ ya ɗɔɔ gi̧ɔ̧-tɛ Nabukodonosɔr, wannu Babilɔŋ, in ɗɔɔ gi̧ɔ̧-tɛ bem kɔ̧-a̧ Baltazar; ɛɛ tɛ de tom ha̧ wa nɛ dɔka zɛ, ɓɛɛ wa tɛ zɔk yɛ nɛ de yí. 13Ɛnɛ kɔfi Gasa Wan Sɔ̧ k’ɛ́ɛ́ wen zu-yɛ mbɛt, wen ɛɛ dea ɗaŋmɔ si tɛ Gasa Wan Sɔ̧ k’ɛ́ɛ́, ɓɛɛ hɔ sɔsɔɔ tu̧u̧see in nyimsea ko Gasa Wan tɛ yu zu-yɛ hɔ̧ɔ̧ na.»
14Ɓɛɛ ɛnɛ tɔ́r kalata n’ɛɛ́ tom h’ɛ́nɛ́ hɛ̧ɛ̧, wen ha̧ o bii mɛ gbar o ɗaŋmɔ kɔ‘i sɛn kɔ̧ Tua ko Gasa Wan, wese gbaŋá Tua-laa, kóó ŋma ŋgimbi nɛ nyɛma sɛnɛ.
Kɔfasɔ̧ ko o bara-biro
Gbárá ɗaŋmɔ
15Ɛ́nɛ́ tɛ tɔ̧:
«Dee mɔ nɛ yuwar-a nɛ́ mɔ ko Gasa Wan Sɔ̧ k’ɛ́ɛ́; ɓɛɛ k’ɛ́ɛ́, nɛ́ foe a a̧-a̧ yí-yɛ́, hee sɔsɔɔ‘i ga! foe wen o be-Juda in o bii Jerusalɛm, 16wen o wannu k’ɛ́ɛ́, o wi-duk-zu'yɛ, o wiɗafisɔ̧ k’ɛ́ɛ́, o witɔ̧wen oi nú Sɔ̧ in o zɔmdáà k’ɛ́ɛ́ lɛŋ. 17Wen ɛɛ dea ɗaŋmɔ si tɛ Gasa Wan, 18ɛ́ɛ́ mbo zu ha̧ A̧ na; ɛ́ɛ́ zii tigɛr Gasa Wan Sɔ̧ k’ɛ́ɛ́, nɛ tɔ̧a̧ h’ɛ́ɛ́ mɛ ba yuwar o heembea, n'Aa ee ti yɛ, na. 19Dika wese nɛ Gasa Wan gboa nɛ o zɔmdáà k’ɛ́ɛ́ yinɛ nú Egyptɛ, hɔ sɔsɔɔ, ɛ́ɛ́ kaɗi dee ŋgazu in Gasa Wan Sɔ̧ k’ɛ́ɛ́ na, ɓɛɛ ɛ́ɛ́ e see-yɛ́ mɛ zii mɔ n'Aa tɔ̧ h’ɛ́ɛ́ na. 20Hegɔ, hee mɔ n’ɛɛ́ zɔk sɔsɔɔ‘i ga, o bɔnɛ tika zu-yɛ́, in o ɗaŋ yoŋgo, nɛ Gasa Wan toka so a zu-yɛ́, nɛ nú Mɔise widetom kɔ̧-A̧, wese n'Aa kaia nɛ zɔmdáà k’ɛ́ɛ́ gbonɛ nɛ nu Egyptɛ, si ŋma nù, nɛ yibere in gɔrɔ fok sɛnɛ lata lata. 21A̧ toma so o witɔ̧wen oi nu-A̧ h’ɛ́ɛ́, ɓɛɛ ɛ́ɛ́ zii tigɛr Gasa Wan Sɔ̧ k’ɛ́ɛ́ tɛ wen nɛ wa tɔ̧a̧ h’ɛɛ‘i lɛŋ na. 22Ɓɛɛ kóó o nde ndak so nɛ doŋ ɗaŋ wɔmɔ mɛ kɔ̧ see-a, de nɛ tom ha̧ o geesɔ̧, de nɛ o mɔ nɛ de tɛ Gasa Wan Sɔ̧ k’ɛ́ɛ́ na.
Currently Selected:
BARUK 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.