BARUK 2
2
1Hegɔ Gasa Wan dee ha̧ wen n'Aa beé so a zu yɛ in o wigɔnkita nɛ ɔɔ so wan zu Israɛl, o wannu k’ɛ́ɛ́, o wi-ya-zu-yɛ, o be-Israɛl in o be-Juda lɛŋ, mɛ hɔ gba̧a̧. 2Pɛrti mɔ nɛ hɔɔ Jerusalɛm, nyɛm nɛ ɗoŋ heembea ko Mɔise’ɛ, tɛ hɔ zaŋnu hɛ̧ɛ̧ nɛti hɔ̧ɔ̧ na. 3Gana ŋgai, nyɛmna, ɓɛɛ ɛ́ɛ́ nyɔŋ so, ŋma nɛ murtɛ be-wiwii kɔ‘i ŋma nɛ murtɛ be-koo kɔ‘i. 4Gasa Wan ee wa ɗɔɔ ŋgai ko o be-nù nɛ zika yɛ, wen ha̧ wa mɛ zii tɛ dara, kifi nɛ geemɔ mgbara o zuduk, fara nɛ Gasa Wan pɛsa wa si sɛnɛ‘i, 5ha̧ wa mɛ gan gana o wi nɔ‘i bo na, nɛ́ o wi nɔ‘i a tɛ̀ɛ́ gan gana wa, wen n’ɛɛ́ dea ɗaŋmɔ si tɛ Gasa Wan Sɔ̧ k’ɛ́ɛ́, tɛ bɛ̧a wen nú-A̧.
6Dee mɔ nɛ yuwar-a nɛ́ ko Gasa Wan Sɔ̧ k’ɛ́ɛ́, ɓɛɛ k’ɛ́ɛ́ in o zɔmdáà k’ɛ́ɛ́, nɛ foe a a̧-a̧ zu-yɛ́, hee sɔsɔɔ‘i ga. 7Bɔnɛ o fom nɛ Gasa Wan bee a zu yɛ lɛŋ baa yɛ́. 8Ɓɛɛ ɛ́ɛ́ gɔm so er-yɛ ha̧ Gasa Wan, ha̧ A̧ mɛ de h’ɛ́ɛ́ mɛ zik ɗoŋ-yɛ ha̧ o ɗaŋ wɔmɔ kɔ̧ see-yɛ́ na. 9Hegɔ Gasa Wan yora zu o ŋgaŋamɔ nɔ‘i mɛ tik zu yɛ, wen mɔ lɛŋ nɛ Gasa Wan tɔ̧ɔ̧ h’ɛ́ɛ́ mɛ de duk nɛ wara. 10Mɔ kpɔk, ɛ́ɛ́ zii tigɛr-A ŋgimbi n'Aa tɔ̧ɔ̧ nɛnɛ‘e ɛɛ kasi o heembea n'Aa ee ti yɛ‘i na.
Aia-nú
11Ɓɛɛ kinii, Gasa Wan Sɔ̧ ko Israɛl, Ɛ́nɛ́ mgbɔɔ dukbii k’Ɛ́nɛ́ gbonɛ nɛ Egyptɛ, nɛ tɛ ŋgai mɛ er-Nɛ, nɛ tɛ o ŋga mɔɔ-usi-mɔ in o mɔɔkifi, nɛ tɛ ŋgai ɔm-Nɛ́ in kin-ɓaa-Nɛ́; Ɛ́nɛ́ dee ha̧ nin-Nɛ́ mɛ hu̧r, hee mɔ'ɔ n’ɛɛ́ zɔk sɔsɔɔ‘i ga. 12Gasa Wan Sɔ̧ k’ɛ́ɛ́, ɛ́ɛ́ dea ɗaŋmɔ, ɛ́ɛ́ iŋ‘Nɛ́ na, ɛ́ɛ́ demɔ nɛ yuwar-a na, ɛ́ɛ́ kasi heembea k’Ɛ́nɛ́ na. 13Ɛ́nɛ́ dé ha̧ tu̧u̧see k’Ɛ́nɛ́ mɛ ga zu-yɛ́, wen be oi ɛ́ɛ́ dɔk mgbara o bii, n’Ɛ́nɛ́ pɛsa ɛɛ si sɛnɛ‘i ɓɔ na. 14Gasa Wan, Ɛ́nɛ́ zíí kɔfamɔ in aia-nú k’ɛ́ɛ́. Ɛ́nɛ́ kpasi yɛ́ zu hu̧ra nin-‘Nɛ́, Ɛ́nɛ́ dé ha̧ o bii nɛ kaia so ɛ́ɛ́ yaknɛ nɛ bara mɛ zɔk yɛ́ nɛ ko, 15Hegó o bii zaŋnu lɛŋ tɛ iŋ‘e Ɛ́nɛ́ nɛ́ Gasa Wan Sɔ̧ k’ɛ́ɛ́, in Israɛl nɛ oi-aa lɛŋ nɛ́ o mgbak bii k’Ɛ́né. 16«Gasa Wan, Ɛ́nɛ́ kɛ̧i̧ mɔ tɛ́nɛ́ nɛ tɛ sa̧a̧ fara duk k’Ɛ́nɛ́ mɛ, ɓɛɛ Ɛ́nɛ́ tá mɔ wen ɛ́ɛ́; Ɛ́nɛ́ yéŋ zer-‘Nɛ́, Ɛ́nɛ́ zíí! 17Ɛ́nɛ́ hu̧i̧ yí-‘Nɛ́, Ɛ́nɛ́ zɔ́k! Bo nɛ o bii ye-ko-fio, o wi nɛ bo nɛ ɔmi ɓɔ na a̧ tɛ gasi'Nɛ́, zɔn nɛ deemɔ k’Ɛ́nɛ́ nɛ yuwar-a na, 18ɓɛɛ nɛ wi bɔnɛ ŋmana-see, wi nɛ zum nɛ zu nɛ́ nɛ nɔ in nɛ ziɓa lɛŋ, wi nɛ yí zik zik nduyɛɛ, in wi nɛ wɔ kas'a a̧ tɛ gasi'Nɛ́, zɔn nɛ deemɔ k’Ɛ́nɛ́ nɛ yuwar-a ɛ̧!
19Hegɔ, Gasa Wan Sɔ̧ k’ɛ́ɛ́, bo nɛ́ wen zu deemɔ nɛ yuwar-a ko o zɔmdáà in o wannu k’ɛ́ɛ́, ɛ́ɛ́ ai nɛ nu-yɛ ti'Nɛ́ na. 20Wen Ɛ́nɛ́ dea ha̧ tu̧u̧see in nyimsea k’Ɛ́nɛ́ mɛ tik zu-yɛ́, hee mɔ'ɔ n’Ɛnɛ tɔ̧ɔ̧ so nɛ nú o witɔ̧wen oi nú-‘Nɛ́ ga: wen'i nɛ́ mɔ'ɔ: 21«Gasa Wan tɔ̧a̧: Ɛ́nɛ́ gu nu si ɗɔɔ de nɛ tom ha̧ wannu Babilɔŋ, ɓɛɛ ɛ́nɛ́ tɛ duk sɛn nu n'Am ha̧a̧ so ha̧ o zɔmdáà k’ɛ́nɛ‘i. 22Ɓɛɛ, k’ ɛ̀nɛ̀ zíí wen nú Gasa Wan, nɛ tɔ̧ h’ɛ́nɛ́‘e ɛnɛ de tom ha̧ wannu Babilɔŋ na, 23Mi tɛ dor o hiɗimɔ desee in hɔ́ɔ́ zaŋgule, in gaia gima ko wii in kóó nɛ baa ŋmaa nɛ mbea, sɛn ye Juda lɛŋ in Jerusalɛm; nu'i nɛ oi-aa lɛŋ tɛ kifi bɛɛ-oi, bii bo sɛnɛ ɓɔ na.
24Ɛnɛ tɔ̧ɔ̧ so h’ɛ́ɛ́ mɛ de tom ha̧ wannu Babilɔŋ, ɓɛɛ ɛɛ zii nú-‘Nɛ́ na. Hegɔ, Ɛnɛ dea ha̧ wen n’ɛnɛ tɔ̧ɔ̧ so h’ɛ́ɛ́ nɛ nú o widetom k’Ɛ́nɛ́, o witɔ̧wen oi nú-‘Nɛ'ɛ mɛ hɔ gba̧a̧, nɛ heé: wa tɛ̀ɛ́ kai so gba̧a̧tɛ o wannu in o zɔmdáà k’ɛ́ɛ́ gbɔnɛ nɛ kɔ̧ pɛsi. 25Wi siŋa o gba̧a̧tɛ-wa a bú-wese in tɛ ŋga gɛ̧ɛ̧-zɛ; wa fea tɛ o ŋga bɔnɛ, tɛ kaɓa, gbapaa in ye bara. 26Ɓɛɛ Ɛnɛ ee Tua k’Ɛ́nɛ́ mɛ duk hee mɔ n’ɛɛ́ zɔk sɔsɔɔ‘i ga, wen zu ɗaŋ ko nutua ko Israɛl in nutua ko Juda.
27Zua'i mbɛt, Gasa Wan, Ɛnɛ dea mɔ in yɛɛ nɛ wara, in tɛ gasa deako, 28nyɛm nɛ ɗoŋ wen n’Ɛ́nɛ́ tɔ̧a̧ nɛ nú Mɔise widetom k’Ɛ́nɛ́, wese n’Ɛ́nɛ́ ha̧nɛ nú ha̧ a̧ mɛ yɔr heembea k’Ɛ́nɛ́, nɛ yi o be-Israɛl, tɔ̧ nɛnɛ‘e: 29K’ɛnɛ nɛ́ zia wen nu'M na, ɛnɛ iŋ‘e gba zɔm gii-ɛnɛ tululu tɛ pii ɗoŋ kifi sɛgbɛrɛ mgbara o dukbii n'Am tɛ pɛsi wa si sɛnɛ; 30wen mi iŋa nɛ dea'e wa beka zii nú‘M na, wen wa nɛ́ o wi-ŋgazu, ɓɛɛ wa tɛ ta mɔ nɛ tatɛ-wa sɛn nu nɛ wa tɛ kai wa nɛ bara si sɛnɛ‘i. 31Ɓɛɛ wa tɛ iŋ‘e Mi nɛ́ Gasa Wan Sɔ̧ kɔ-wa. Mi tɛ hu̧i̧ see-wa in zer-wa 32Wa tɛ zɔn Am sɛn nu bara kɔ-wa, ɓɛɛ tɛ-wa tɛ mbaŋ ɗoŋ nin-Am. 33Wa tɛ siŋ ŋgazu in ɗaŋ deemɔ kɔ-wa e duk, wen tɛ-wa tɛ mbaŋ ɗoŋ mɔ nɛ kpaa so o zɔmdáà kɔ wa, nɛ dee so ɗaŋmɔ in Gasa Wan’ɛ.
34Ɓɛɛ Mi tɛ kai wa pii nɛ ɗoŋ sɛn tɛ nù n'Am ha̧so nú‘M wen-aa ha̧ o zɔmdáà kɔ-wa Abraham, Isaak, in Jakɔb; wa tɛ ɔ wan zu a. Mi tɛ de ha̧ wa mɛ nyɛɓi, wa beka sir ɓɔna. 35Mi tɛ nɔ tɔk nɛ tɛ dùk kpoo nɛ kpoo in wa, wen ha̧‘M mɛ dùk nɛ Sɔ̧ kɔ-wa in ha̧ wa mɛ ya nɛ dukbii kɔ‘M. Mi beka ndak Israɛl dukbii kɔ‘M tɛ nù n'Am ha̧ha̧ wa ɓɔ na.
Currently Selected:
BARUK 2: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.