ZAKARII 14
14
Sɔŋkur biro in tɛa-a ko GASA WAN
1Wese ko GASA WAN a̧ tɛ‘i.
O be Jerusalɛm,
wese'i, o bíí tɛ kai mɔ k’ɛ́nɛ́,
mɛ kɛ̧ nɛ er ŋmaa nɛ gbaayí‘nɛ́.
2Mi tɛ de ha̧ o tugun bíí lɛŋ
mɛ mɔi̧ ŋmaa mɛ bi Jerusalɛm.
Wa tɛ ba ye, wa tɛ gbin o tua,
wa tɛ ɗaŋ o okoo,
wa tɛ kai reeta bíí yaknɛ nɛ bara-biro,
ɓɛɛ oi reeta-a tɛ ɓɔn saaye.
3GASA WAN tɛ kur in o dukbíí nɔ‘i
mɛ bi wa hee mɔ'ɔ n'aa de nɛnɛ ŋgimbi biro ga.
4Wese'i, naŋ-a tɛ i̧si̧ zu kaya Te-nɔ̧́
nɛ̀ dúk ká̧ Jerusalɛm nɛ war daŋa-wese,
ɓɛɛ kaya tɛ mbaŋ tan see-a
nɛ war daŋa-wese si yee-wese,
ɓɛɛ nɛ́ gba ɗɔŋgɔ a̧ tɛ duk oi-aa.
Kaya tɛ kɛ̧ tɛ nɛ ŋmaa,
reeta si war ká̧-zan-mɛ́-ŋgɔn,
reeta si war ká̧-zan-mɛ́-ɗɔɔ.
5Ɓɛɛ ɛnɛ tɛ ba gba ɗɔŋgɔ mgbara kaya'i
yu nɛ mɔ wen gboŋgo'i tɛ nɛ hegɔ hɔ Asal.
Ɛnɛ tɛ yu mɔ hee mɔ'ɔ n’ɛnɛ yuu so nɛnɛ
tɛ naka-nù ŋgimbi ko Ozias wannu Juda ga,
ɓɛɛ nɛ́ tɛ́ ŋgimbi'i a̧ GASA WAN Sɔ̧ kɔ‘m
tɛ́ tɛ̀ nɛnɛ in o betom kɔ‘i.
6Wese'i, sa̧a̧mɔ-wese in sa̧a̧mɔ-zɛ beka bo na,
gɛ̧ɛ̧ in ɓɔrɔ beka bo na mbɛt.
7Wese'i tɛ duk nɛ ŋma gasa wese,
nɛ́ GASA WAN kpɔk a̧ iŋa ɓɛɛ.
Wi beka iŋ kɛ̧ɛ̧ mgbara wese in zɛ na;
zɛ tɛ duk hee sa̧a̧mɔ ga kpoo nɛ kpoo.
8Wese'i, gba-for-yì duka-kpasa tɛ fok gbonɛ nɛ Jerusalɛm,
reeta-a tɛ nɛ sitɛ gba-tɔp mɛ si daŋa-wese,
ɓɛɛ ɓii-aa nɛɛ sitɛ wan mɛ si yee-wese,
mɛ ɓar mbɛt in mɛ bɛɛ mbɛt.#Ez 47.1; Jn 7.38; Tɔ̧ɔ̧ Hu̧ 22.1
9Ŋgimbi'i nɛ́ GASA WAN
a̧ tɛ ɔ wan zu nù lɛŋ;
nɛ́ a̧ kpɔk ɓɛɛ a̧ tɛ duk nɛ Sɔ̧;
ɓaa nin nɛ‘i tɛ gasi nɛ nin-a kpɔk ɓɛɛ.
10Nù ká̧ Jerusalɛm lɛŋ tɛ hir kifi bɔkɔ-nù,
ku̧u̧naŋ Gɛva hɔ nɛnɛ Rimɔŋ nɛ war ɗɔɔ.
Fara nɛ Jerusalɛm duk sɛnɛ‘i tɛ kusi
gan zu o oi dɔka fara nɛ yak zik a̧,
ɓɛɛ pɛsa ye tɛ ku̧naŋ sɛn nú garo ko Bɛnjamin
hɔ nɛnɛ nú garo mɛ mgbii-aa,
fara nɛ kuti nú garo duka so sɛnɛ nɛti,
ɓir nɛ fara-pɛm-mɔ ko Hananeɛl
hɔ nɛnɛ fara-vati-dɔ̧ɔ̧ ko wannu.
11Bíí tɛ ɔ hi̧i̧;
fom beka bo ɓɔna,
ɓɛɛ ŋma mɔɔ-fo Jerusalɛm beka bo na mbɛt.#Tɔ̧ɔ̧ Hu̧ 22.3
12Ɓɛɛ ŋgamɔ nɛ GASA WAN tɛ pi̧
zu o dukbíí nɛ baa so biro duk nɛ Jerusalɛm nɛ mɔ'ɔ:
wa tɛ mbɔr nɛ zu kpasa;
gbaayí-wa tɛ mbɔr kɔ̧-a̧ mɛ,
ɓɛɛ leɓe-wa mbɔra ɓɔn kɔ̧ nú-wa.
13Wese'i, GASA WAN tɛ pi̧ zɔm kíì tɛ-wa;
wa tɛ bi biro in o ŋmaa,
tok nɛ ŋmaa woyo.
14Juda mbɛt tɛ ye ɗoŋ Jerusalɛm mɛ bi nɛ biro.
Wa tɛ kai o kpaamɔ, o lɔr, o bu-mbɔi in o laa nɛ dɔka-a
ko o tugun bíí lɛŋ nɛ ya zik wa nɛ mɔɔ-oi-biro.
15Kpɔk ŋgamɔ‘i tɛ tik zu o nyaŋa,
o sunda, o ŋgeloba, o tuifuu
in o saɗi lɛŋ kɔ̧ gbagari ko o wisɛn kɔ-wa.
16Pɛ nɛ pɛ yaknɛ ɗoŋ ŋgimbi'i,
o oi bíí nɛ tɛ ɓɔn mgbara
o wan nɛ baa so biro dúk nɛ̀ Jerusalɛm
tɛ daŋ si Jerusalɛm mɛ gu nù ti GASA WAN,
Wannu nɛ a̧a̧ nɛ ŋgayamɔ lɛŋ,
in Wan nɛ dee Gbaŋa Tua-laa.#Lev 23.39-43
17Ɓɛɛ ko o dukbíí zaŋnu
nɛ beka daŋ si Jerusalɛm mɛ gu nù
ti GASA WAN nɛ a̧a̧ nɛ ŋgayamɔ lɛŋ na,
kórò beka hɔ a zu nù kɔ-wa na.
18Kà o be Egiptɛ nɛ́ daŋa si hi̧i̧
wen dee Gbaŋa Tua-laa'i na,
ŋgamɔ nɛ GASA WAN tɛ pi̧
zu dɔka tugun bíí nɔ‘i
nɛ beka daŋ wen dee gbaŋa'i na'i
tɛ tik zu wa mbɛt.
19Bɔnɛ nɛ tɛ tik zu Egiptɛ in zu dɔka tugun bíí lɛŋ
nɛ daŋ si Jerusalɛm wen dee Gbaŋa Tua-laa na, nɛ mɔ‘i.
20Wese'i, yɔramɔ'ɔ:
«Mɔ nɛ‘i ee nɛtɛ ha̧ GASA WAN,»
tɛ duk ɗoŋ o mana
nɛ‘i kun ger nyaŋa,
ɓɛɛ o nyɛk-gi-mɔ sɛn kɔ̧ Tua ko GASA WAN,
tɛ duk nɛ sa̧a̧-a̧ hee o yee-pi̧-gaŋmɔ
sɛn fara-ɗafi-sɔ̧ ga.
21O nyɛk-gi-mɔ wan mɛ Jerusalɛm in o wan mɛ Juda lɛŋ
tɛ duk nɛ ko GASA WAN nɛ a̧a̧ nɛ ŋgayamɔ lɛŋ,
ɓɛɛ kóó o ndé nɛ tɛ́ tɛ̀ mɛ ɗafi sɔ̧
tɛ ba o kpánà nɔ‘i mɛ gi nɛ mɔ.
Ŋma wi-ɗɔr-mɔ beka duk kɔ̧ Tua
ko GASA WAN nɛ a̧a̧ nɛ ŋgayamɔ lɛŋ wese'i na.
Currently Selected:
ZAKARII 14: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.