ZAKARII 13
13
1«Wese'i, kpút-kpút tɛ ŋmai̧ gbonɛ wen fɔra ɗaŋmɔ in ndiŋ yinɛ nutua ko David in tɛ o bíí Jerusalɛm.
Sɔ̧ tɛ fo o géé-sɔ̧ yinɛ
2«Nɛ́ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ, wese'i, mi tɛ ɗaŋ o géé-sɔ̧ yinɛ tɛ nù'ɛ nɛ‘i beka iŋ oi nin-wa ɓɔna, ɓɛɛ wi ndaka o wi nɛ tɔ̧‘e, wi nɛ́ wi-tɔ̧-wen oi nú Sɔ̧ yinɛ nɛ oi ndiŋ taamɔ kɔ-wa. 3Hegɔ, kà ŋma bíí nɛ tɔ̧ɔ̧ wen oi nú Sɔ̧ siti, ɓɛɛ mgbák dáà kɔ̧-a̧ in nàà kɔ̧-a̧ tɛ tɔ̧ ha̧ a̧: ‹Mɛ tɛ fe, wen nɛ́ ndela a̧ mɛ de nɛ̀ nin GASA WAN!› Ŋgimbi n'aa tɔ̧ nɛ wen oi nú Sɔ̧‘i, mgbák dáà kɔ̧-a̧ in nàà kɔ̧-a̧‘i tɛ tok a̧ gbɛ. 4Wese'i, foe tɛ de o wi-tɔ̧-wen oi nú Sɔ̧ kpɔk kpɔk tɛ wee ɗoŋ hɔɔ-zu kɔ-wa, ɓɛɛ wa beka pi̧ laa-buma-saɗi#13.4 laa-buma-saɗi: o wi-tɔ̧-wen oi nú Sɔ̧ pi̧ só nɛ́ laa nɛ‘i dee nɛ̀ buma-saɗi. mɛ ɔr nɛ bíí ɓɔna. 5Kóó o ndé tɛ tɔ̧: ‹Mí bó nɛ́ wi-tɔ̧-wen oi nú Sɔ̧ na, mí nɛ́ wi-wa-fɔ. Kɔ‘m, nɛ̀ bem mɛ, mi a̧a̧ nɛ̀ fɔ kɔ‘m.› 6Ɓɛɛ kà bíí ak a̧: ‹Da̧i̧'ɛ nɛ duk yí-see-mɛ'ɛ, nɛ da̧i̧ ge?› A̧ tɛ kifi nú: ‹Mi baa da̧i̧'ɛ sɛn kɔ̧ tua ko o sɛm kɔ‘m.› »
Nɔɔ-tɔk woyo
7Wen nɛ GASA WAN nɛ a̧a̧ nɛ ŋgayamɔ lɛŋ tɔ̧ nɛ mɔ'ɔ:
«Gba-paa, mɛ̀ násí wi-dai-mɔ-dai kɔ‘m,
mɛ̀ gɔ́m mgbák wi-gbak-am'i gbɛ,
ha̧ o sami pɛsi a taŋ,
ɓɛɛ er-am tɛ pii ɗoŋ kum o be-a mbɛt.»#Mt 26.31; Mk 14.27
8Nɛ́ GASA WAN a̧ tɔ̧ wen’ɛ. «Hegɔ bíí nù'ɛ lɛŋ tɛ kɛ̧, tɛ́ duk-aa taar; dùk ɛ̧ɛ̧ yiitoo’ɛ tɛ kum, ɓɛɛ ɛ̧ɛ̧ kpɔk’ɛ kpasa. 9O wan nɛ kpasa'i, mi tɛ pi̧ wa tɛ wee hee mɔ'ɔ nɛ‘i nɔ̧́í̧ nɛ bu-mbɔi ga, ɓɛɛ mi ee wa tɛ wee hee mɔ'ɔ nɛ‘i de nɛnɛ in lɔr mɛ sa̧'ɛ ga. Wa tɛ ai nú sitɛ‘m, ɓɛɛ mi zia kɔfamɔ kɔ-wa. Mi tɛ tɔ̧‘e: ‹Wa nɛ́ dukbíí kɔ‘m›, ɓɛɛ wa tɔ̧a̧‘e: ‹GASA WAN nɛ́ Sɔ̧ k’ɛɛ.› »
Currently Selected:
ZAKARII 13: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.