NEHEMII 2
2
Nehemii yaka si Jerusalɛm
1Tɛ zɛ Nisaŋ,#2.1 Nisan: zɛ́ Nisan nɛ́ mgbara o zɛ́ Sɔiwoo in Be-gbazɛ. ŋgimbi nɛ wannu Artazɛrzɛs dee pɛ ɓu-yiitoo tɛ wan kaɗi, hee mɔ'ɔ nɛ dɔ̧ɔ̧ duka so sɛn ti'm ga, mi baa dɔ̧ɔ̧‘i ha̧ ha̧ a̧. 2Hee mɔ'ɔ n'am kai so sɔnti'm ti a̧ nɛti ga na, a̧ aka'm: «Wen ge sa mɛ kai sɔnti-mɛ ge? Nɛ́ tɛ-mɛ'ɛ nyim nde? Nɛ́ ŋma mɔ náà, kóó nɛ́ see-mɛ a̧ ɗaŋ nde?»
Gasa kíì dea'm, 3ɓɛɛ mi tɔ̧ ha̧ a̧: «Wannu a̧ dúk ɓɔnsɛnɛ! Mi beka kai bɔɔ sɔnti'm na hee ge? Ye nɛ̀ o pɛsi ko o dáà kɔ‘m a̧a̧ sɛnɛ ɗaŋa; o kpar-nú garo ye'i bia wee lɛŋ.»#2 Wan 25.8-10; 2 Kal Ny 36.19; Jer 52.12-14
4Ɓɛɛ wannu ak am: «Nɛ́ ge a̧ mɛ kɔ̧ɔ̧ ge?»
Mi kɔfa Sɔ̧ mɛ yiwese nɛ kɔ̧ see-am, 5ɓɛɛ mi kifi nú: «Kà nɛ́ dee tɛ wannu, kà wannu nɛ́ kɔ̧ɔ̧ wi-de-tom kɔ‘i, ɓɛɛ a̧ a̧ tóm am si Juda, sɛn saaye nɛ o pɛsi ko o dáà kɔ‘m a̧a̧ sɛnɛ‘i, ha̧‘m mɛ mbo ye'i woyo.»
6Kóò ko wannu duk so katɛ a̧, ɓɛɛ wannu tɔ̧ ha̧‘m: «Zɛ nɔ̀ kɔ-mɛ‘i tɛ de gee? Mɛ tɛ pii ɗoŋ mɛ gese ge?» Wannu kpɛka mɛ ha̧ yuwar ha̧‘m, ɓɛɛ mi gɔn ŋgimbi n'am tɛ pii nɛ ɗoŋ ha̧ a̧.
7Mi tɔ̧ɔ̧ ha̧ wannu woyo: «Kà wannu nɛ́ zɔka'e ɔ dee, wannu a̧ há̧ o kalata ha̧‘m wen ha̧a̧-a̧ ha̧ o wi-duk-zu o zika-nù nɛ a̧a̧ nɛ kur Efrat nɛ war yee-wese ha̧ wa mɛ e yuwar ha̧‘m mɛ ɓir yak si nú Juda, 8in ŋma kalata ha̧ Asaf, wi-pɛm-kombo ko wannu, wen ha̧ a̧ mɛ ha̧ o te ha̧‘m wen ɗafa-a nɛ nú-ŋgárá mgbák ká̧ Tua ko Sɔ̧ in nú-garo ye, ká bá nɛ̀ nú tua n'am tɛ ɔ sɛnɛ mbɛt.» Ɓɛɛ wannu ha̧ o kalata nɔ‘i ha̧‘m wen nɛ Sɔ̧ kɔ‘m guu so er zu'm.
9Mi hɔɔ sɛn ti o wi-duk-zu o zika-nù mɛ kur Efrat nɛ war yee-wese, ɓɛɛ mi ha̧ o kalata ko wannu ha̧ wa. Wannu toma so o gasa wi-biro in o wi-daŋ-nyaŋa mɛ mgbɔ‘m nɛnɛ. 10Sanbalat be Hɔrɔŋ in Tobia be Amɔŋ wi-de-tom kɔ̧-a̧ zia nyɛrɛ mɔ‘i, ɓɛɛ wa kpa ɗaŋsee nyɛmna, tɛ zia-a'e, ŋma bíí tɛa wen ɗafa mɔ ha̧ o be Israɛl mɛ ya nɛ de-a.
11Mi hɔɔ Jerusalɛm, ɓɛɛ mi duk hi̧i̧ zɛ taar. 12Mi kura mɛ zɛ in o ŋma bíí, ɓɛɛ bó nɛ́ mi tɔ̧ɔ̧ so mɔ nɛ Sɔ̧ ee kɔ̧ see-am wen dea-a sɛn Jerusalɛm ha̧ ŋma bíí kpɔk na. Saɗi n'am baa nɛnɛ, kànà nɛ́ tuifuu kɔ‘m n'am daŋ ɓɛɛ. 13Mɛ zɛ, mi gboo nɛ̀ nú garo nɛ zɔk mɔ si kɔ̧ Gboŋgo, ɓɛɛ mi nɛɛ hɔ sɛn nú yì ko Ndiɓa in nú Garo-a-yɔsɛ. Sɛn hi̧i̧, mi duka zɔk nɛ o garo Jerusalɛm nɛ gbina in o kpar-nú-wa nɛ bia so wee lɛŋ nɛ sa̧a̧-a̧. 14Mi ɓira si nú garo zu-zer hɔ nɛnɛ ka gɔna-yì ko wannu, ɓɛɛ tuifuu n'am daŋ so'i kpa yuwar yaka-a na. 15Kpɔk zaŋ zɛ‘i, mi daŋa nɛ̀ kɔ̧ gboŋgo Sɛdrɔŋ zɔk nɛ o garo nɛnɛ, ɓɛɛ mi si ɗoŋ nɛ nú garo nɛ zɔk mɔ si kɔ̧ gboŋgo, ɓɛɛ mi pii ɗoŋ oi-am.
16O gasawi iŋ fara n'am nɛɛ sɛnɛ na, in mɔ n'am nɛɛ mɛ de na mbɛt. Ŋgimbi'i, mi tɛ tɔ̧ ŋma wen kpɔk ha̧ o be Juif na, kóó ha̧ o wi-ɗafi-sɔ̧, kóó ha̧ o dita-bíí, kóó ha̧ o gasawi, kóó ha̧ o wi-duk-zu tom na mbɛt. 17Ɓɛɛ mi tɔ̧ ha̧ wa: «Ɛ́nɛ́ zɔka bɔnɛ n’ɛɛ ya sɛnɛ'ɛ: Jerusalɛm gbina a nù lɛŋ, o kpar-nú-a bia wee mbɛt. Ɛ̀ɛ̀ nɛ́ɛ̀ mbó garo Jerusalɛm woyo, ba nɛ foe yinɛ zu yɛ.» 18Mi wee ɗoŋ guu er nɛ GASA WAN guu so zu'm, we nɛ ɗoŋ wen nɛ wannu tɔ̧ɔ̧ so ha̧‘m ha̧ wa mbɛt, ɓɛɛ wa tɔ̧: «Ɛ̀ɛ̀ de!» Hegɔ, wen dee tom'i, wa ɗafa mɔ wen dea-a.
19Nɛ̀ Sanbalat be Hɔrɔŋ, Tobia be Amɔŋ wi-de-tom kɔ̧-a̧ in Gesɛm be Arab zia nyɛrɛ mɔ‘i, wa mama yɛ, ba nɛ yɛ e tɛ geemɔ, tɔ̧ nɛnɛ‘e: «Nɛ́ ge ɛ́nɛ́ kɔ̧ɔ̧ mɛ de ge? Ɛ́nɛ́ kɔ̧ɔ̧ mɛ de nɛ́ ŋgazu in wannu nde?»
20Ɓɛɛ mi kifi nú ha̧ wa hee mɔ'ɔ ga: «Mɛ̀ nɛ́ Sɔ̧ mɛ yiwese a̧ tɛ de ha̧ tom k’ɛɛ mɛ hɔ gba̧a̧, ɛɛ wi-de-tom kɔ̧-a̧, ɛɛ tɛ de kànà. Ɓɛɛ k’ɛ́nɛ́, ɛ́nɛ́ bó nɛ̀ ŋma mɔ sɛnɛ na, kóó ŋma ŋgai zu ye'i na; tɛ-wi a̧ bí ɗoŋ‘nɛ́ tɛ mɔ ko Jerusalɛm!»
Currently Selected:
NEHEMII 2: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.