NEHEMII 1
1
1Ɛ̧ɛ̧ hɛ̧ɛ̧ nɛ́ wee ɗoŋ mɔ ko Nehemii, bem ko Hakalia.
Nehemii zia nyɛrɛmɔ zu Jerusalɛm
Tɛ kuti zɛ Kislɛu,#1.1 Kislɛw: zɛ́ Kislɛw nɛ́ mgbara o zɛ́ Ŋmaŋmaiŋma in Turi-turi. tɛ ɓu-yiitoo pɛ nɛ Artazɛrzɛs duka so nɛ́ wannu Pɛrsɛ, mi Nehemii duka so tɛ gasa ye-ŋgárá Suzɛ. 2Hanani, ŋma nya'm tɛɛ in o ŋma bíí nɛ Juda, ɓɛɛ mi ak mɔ wen oi o be Juif nɛ ɓɔna ɓɛɛ nɛ̀ sii ɗoŋ Jerusalɛm, in wen zu ye'i mbɛt. 3Wa tɔ̧ɔ̧ ha̧‘m: «O wi nɛ pia ɗoŋ nɛ tɛ bara pii nù kɔ-wa sɛn Palɛstin a̧a̧ ɗɔɔ bɔnɛ in foe. Garo Jerusalɛm ɔ ɗɛsɛ-ɗɛsɛ, ɓɛɛ o kpar-nú-a bia wee lɛŋ.»
Kɔfa-sɔ̧ ko Nehemii
4-5Ŋgimbi n'am zia wen'i, mi duka nù, mi hi̧a̧ kɔ̧a̧, ɓɛɛ mi zim mɔ hegɔɔ zɛ nɛ dɔka-a. Mi zima yì, ɓɛɛ mi ai nú ti Sɔ̧ nɛ a̧a̧ yiwese hee mɔ'ɔ ga: «Ho! GASA WAN Sɔ̧ nɛ a̧a̧ yiwese, Sɔ̧ nɛ ɔ gasa nɛ‘i yu’ɛ; ɛ́nɛ́ e nɔɔ-tɔk in yora ɗoŋ ha̧a̧nú k’ɛ́nɛ́ ha̧ o wi nɛ kɔ̧ɔ̧‘nɛ́ in nɛ kasi geŋa k’ɛ́nɛ́ duk na. 6Ɛ̀nɛ̀ yéŋ zer'nɛ́, ɛ̀nɛ̀ hú̧í̧ yí‘nɛ́, ɓɛɛ ɛ̀nɛ̀ zíí kɔfa-sɔ̧ ko wi-de-tom k’ɛ́nɛ́. Zɛ nɛ wese mi ai nɛ nú h’ɛ́nɛ́ wen zu o be Israɛl, o wi-de-tom k’ɛ́nɛ́. Mi gbar nɛ ɗaŋmɔ kɔ-wa nɛ wa dee in'nɛ̀ɛ́. Mi in o bíí nutua ko dáà kɔ‘m, ɛɛ dee ɗaŋmɔ. 7Nɛ mbetɛ, ɛɛ tu̧u̧ see'nɛ́, ɓɛɛ ɛɛ kasi o ha̧a̧nú, o geŋa in o yuwar duka-a k’ɛ́nɛ́ n’ɛnɛ ha̧a̧ so ha̧ wi-de-tom k’ɛ́nɛ́ Moisɛ na. 8Tɛ‘nɛ́ a̧ mbáŋ ɗoŋ wen nɛ Moisɛ wi-de-tom k’ɛ́nɛ́ tɔ̧ɔ̧ so nɛ ɗoŋ ha̧a̧nú k’ɛ́nɛ́ hee mɔ'ɔ ga’ɛ: ‹K’ɛ̀nɛ̀ dé ŋgazu, mi tɛ pɛsi'nɛ́ dam mgbara o dukbíí.#Lev 26.33 9Ɓɛɛ k’ɛ̀nɛ̀ píí ɗoŋ tɛ‘m, k’ɛ̀nɛ̀ kásí o geŋa kɔ‘m de nɛ tom, kóó wa kaia so'nɛ́ nɛ̀ bara hɔ ndaa-zan, mi tɛ mɔi̧‘nɛ pii ɗoŋ sɛn fara n'am hoka so ha̧ nin-am mɛ duk sɛnɛ.›#Wee-ɗoŋ-he 30.1-5
10«Wa nɛ́ o wi-de-tom k’ɛ́nɛ́ in dukbíí k’ɛ́nɛ́ n’ɛnɛ gɔna zu wa nɛ gasa ŋgai k’ɛ́nɛ́ in ŋgai mɛ te-er'nɛ́. 11Ho! GASA WAN, ɛ̀nɛ̀ yéŋ zer'nɛ́ tɛ kɔfa-sɔ̧ kɔ‘m wi-de-tom k’ɛ́nɛ́ in tɛ kɔfa-sɔ̧ ko o wi-de-tom k’ɛ́nɛ́ nɛ a̧a̧ nɛ desee wen tu̧u̧ tɛ‘nɛ́. Ɛ̀nɛ̀ kpɛ́k ha̧ deemɔ ko wi-de-tom k’ɛ́nɛ́ mɛ hɔ gba̧a̧ sɔsɔɔ in ɛ̀nɛ̀ dé ha̧ sɔnti-a mɛ de sɛn ti wannu.»
Mi duka so nɛ́ wi-ha̧-dɔ̧ɔ̧ ko wannu.
Currently Selected:
NEHEMII 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.