O AIA-NÚ 3
3
Bɔnɛ in mɔɔ-e-nɛ ta
1Mi nɛ wi nɛ zɔka
bɔnɛ nyasi ko GASA WAN.
2A̧ baa'm pi̧ ti tum ha̧‘m mɛ nɛ nɔ sɛnɛ,
nɛ̀ bó nɛ́ tɛ sa̧a̧mɔ na.
3Kànà nɛ mi ɛ̀n'am ɓɛɛ,
a̧ GASA WAN nukuri ɓɔnsɛnɛ.
4A̧ sɛkɛra'm ɓɛɛ mi ɔ̧k ba gba̧a̧,
ɓɛɛ a̧ gbin o gba̧a̧-tɛ‘m mbɛt.
5A̧ ɔna'm;
a̧ zika'm e see-a nɛ bɔnɛ in tu̧u̧-see.
6A̧ pi̧i̧ am ti tum
hee o gba̧a̧-fio nɛ̀ ɔ́ kɔ̧́ kɔ̧̀ pɛ nɛ pɛ'ɛ ga.
7A̧ dee garo zik am kpa nu ŋmaa, wen ká‘m tɛ̀ɛ́ yar;
a̧ saŋa'm sútúk pi̧ nu nɛ ŋga nyak-boi.
8Nɛ oi hiɗimɔ in sara kɔ‘m,
kɔ̧-a̧ nɛ zɔka mɔ yak zu aia-nú kɔ‘m.
9A̧ kpee yuwar kɔ‘m nɛ o zɔm gasa ta,
ɓɛɛ yuwar kɔ‘m ɗaŋ lɛŋ.
10A̧ pɛm am hee ŋga saɗi-nyɔŋ-wi#3.10 ŋga saɗi-nyɔŋ-wi: texte tɔ̧ɔ̧ nɛ́ ours. ga,
hee dila nɛ hu̧si ɗoŋ mɔ mɛ ba saɗi’ɛ ga.
11A̧ dee ha̧‘m mɛ yɔ yuwar kɔ‘m;
a̧ pi̧a'm tɛ bɔnɛ kpul, ɓɛɛ e'm ɓɔn hi̧i̧.
12A̧ ŋgaŋa kusaa-goo kɔ̧-a̧,
ɓɛɛ kpe'm e nu mɛ pi̧.
13A̧ pi̧a'm tɛ guntir
nɛ góò kɔ̧ ɓaro kɔ̧-a̧ lɛŋ.
14Mi kifa wi-bɔkɔ ti dukbíí kɔ‘m;
wese lɛŋ kɔ-wa kànà nɛ́ zɛkɛɗa'm mam nɛnɛ.
15GASA WAN ha̧a̧ nɛ ɗaŋ paŋ wa̧a̧-te ha̧‘m nyɔŋ
in paŋ mɔ kpírírí ha̧‘m mɛ nɔ.
16A̧ dee ha̧‘m mɛ ŋger ŋga ta,
ɓɛɛ a̧ pi̧‘m tɛ bùk.
17GASA WAN, ɛnɛ baa ga̧a̧mɔ yinɛ nyɛi̧ nɛ‘m;
mi iŋ oi bɔtɛ ɓɔna.
18Ɓɛɛ sa'm tɔ̧:
«Ɓɛɛ kɔ‘m a̧ kaɗa'i,
ŋma mɔ ha̧‘m mɛ e ta nɛ GASA WAN bo ɓɔna nde?»
19Tɛ‘nɛ́ a̧ mbaŋ ɗoŋ bɔnɛ in yambala-a kɔ‘m.
Mɔ‘i nɛ paŋ mɔ in ma̧a̧da̧!
20Taamɔ kɔ‘m duk ɓɔn tɛ bɔnɛ nɔ‘i,
ɓɛɛ see-am yeli kànà yeli lɛŋ.
21Oi mɔ n'am tɛ ta wen kpaa nɔɔ-ŋgiɗi nɛ mɔ'ɔ:
22Dee demɔ ko GASA WAN in bíí kaɗi na,
kɔ̧ɔ̧mɔ kɔ̧-a̧ sitɛ bíí mbɛt kaɗi na ɓɔnsɛnɛ.
23A̧ de demɔ in yɛɛ dam ɗoŋ wese lɛŋ.
GASA WAN, yuwar deemɔ k’ɛ́nɛ́ in bíí nɛ kpasamɔ ɓɔnsɛnɛ!
24«GASA WAN nɛ war mɔ kɔ‘m;
nɛ mɔ‘i ɓɛɛ sa'm e ta nɛ a̧.»
25GASA WAN nɛ gba de-wi wen wi nɛ kii a̧,
in nɛ e see tɛ-a.
26Duka-a nɛ̀ oi nú pɛm nɛ GASA WAN
mɛ kpasi wi ɔ dee.
27Yambaya munyal nɛ̀ bem tɛnɛ
nɛ gba demɔ nyɛmna.
28Kà GASA WAN úsí bɔnɛ há̧ bíí,
ɓɛɛ wi’ɛi a̧ duk ɛ̀nɛ̀-wí nɛ̀ oi-nú keɗeŋ.
29A̧ a̧ ɔ nu zu fuunu,
ŋmafara Sɔ̧ tɛ gbak a̧!
30A̧ a̧ e ká̧ yí-a ha̧ wi-mbɛr-aa,
a̧ a̧ nɔ ŋgiɗi tɛ da̧ra̧ ko bíí mbɛt.
31Wen GASA WAN siŋ bíí pi̧ nu
hegɔ ɓɔn ndo-ndo-ndo na;
32kà nɛ́ bòò nɛ́ see-aa a̧ nyima, a̧ tɛ de ko nɛ ɗoŋ,
wen kɔ̧ɔ̧mɔ kɔ̧-a̧ ɔ gasa nyɛmna.
33Wen bó nɛ́ a̧ kpa desee tɛ usa bɔnɛ
ɗaŋ nɛ see bíí sɔɔ gee na!
34Ŋgimbi kaia o bara-biro nu kɔ-wa,
i̧si̧ nɛ wa nɛ naŋ,
35ŋgimbi deemɔ in o bíí nɛ yuwar-a na
ti Wan nɛ duk ŋgɔn mɛ,
36ŋgimbi ɓira wen e nú bíí ti kita,
bó nɛ́ GASA WAN a̧ zɔk'i na?
37Nɛ o'o nyɛma tɔ̧ɔ̧ wen ɓɛɛ mɔ dea o,
kà bó nɛ́ Sɔ̧'ɔ̧ tɔ̧ɔ̧ wen ha̧ mɔ‘i mɛ de na o?
38Bó nɛ́ kpɔk nú Wan nɛ duk ŋgɔn mɛ
a̧ mɔɔ-ɗaŋsee in mɔɔ-desee gbo nɛnɛ na?
39Bíí nɛ duk kpasa ai nú wen ge?
Bó nɛ́ zu ɗaŋmɔ n'aa de'i a̧ a̧ duk kànà kpasa'i na?
40Ɛ̀ɛ̀ kíí mɔ tɛ yuwar deemɔ k’ɛ́ɛ́, ɛ̀ɛ̀ tá mɔ zu-a,
ɓɛɛ ɛ̀ɛ̀ píí ɗoŋ tɛ GASA WAN.
41Ɛ̀ɛ̀ nyɛi̧ er yɛ in ɛ̀ɛ̀ há̧ see yɛ
ha̧ GASA WAN nɛ duk yiwese mɛ.
42K’ɛ́ɛ́, ɛ́ɛ́ dee ŋgazu, ɛ́ɛ́ mbo zu h’ɛ́nɛ́ na,
ɓɛɛ nɛ̀ war k’ɛ́nɛ́, ɛ̀nɛ̀ e ɗaŋmɔ k’ɛ́ɛ́ h’ɛ́ɛ́ na!
43Ŋga nyimsea baa'nɛ, ɓɛɛ ɛ́nɛ́ kúr, ndak nɛ yɛ,
kum nɛ yɛ, ko de'nɛ́ h’ɛ́ɛ́ na mbɛt.
44Ɛ́nɛ́ kpee yí‘nɛ́ nɛ tura-zan,
wen ká kɔfa-sɔ̧ k’ɛɛ tɛɛ hɔ tɛ‘nɛ́.
45Ɛ́nɛ́ dee h’ɛ́ɛ́ mɛ duk hee fara-a-yɔsɛ
in mɔɔ-i̧si̧ nɛ naŋ ko o dukbíí ga.
46O wisɛn k’ɛɛ lɛŋ
dɔk nɛ wen a zu yɛ.
47War mɔ k’ɛɛ nɛ bele in ɗuka kɔ̧,
ká bá nɛ̀ zɔka bɔnɛ in tika-a.
48Yí‘m mbaŋ nɛ miikɔ̧a
wen tika-a ko dukbíí kɔ‘m.
49Yí‘m pii nɛ miikɔ̧a vamgba-vamgba gee;
yí‘m beka zɔm na wen bɔnɛ,
50hɔ ŋgimbi nɛ GASA WAN tɛ oŋgi
mɛ zɔk mɔ nɛ yiwese mɛ tɛnɛ.
51Dita-see mɔ nɛ tika
zu o zɔŋa ye kɔ‘m,#3.51 o zɔŋa ye kɔ‘m: usi nɛ́ o be ye nɛ̀ yàá zik Jerusalɛm. gana'm.
52O wi-sɛn-am gee ndaka'm
hee mi nɛ nɔ̧́í̧ ga;
53wa pi̧i̧ am kɔ̧́ kɔ̧ ha̧‘m mɛ fe,
ɓɛɛ wa kpe nú‘m nɛ ta;
54yì ha̧a̧ yak zu'm,
ɓɛɛ mi e nú‘m tɛ hiɗimɔ‘e: «Tɛ‘m yɔa!»
55Nɛ̀ kɔ̧̀ ɗúká kɔ̧̀ mɛ̀,
mi saa nin'nɛ́, GASA WAN,
56ɓɛɛ ɛ́nɛ́ zíí hiɗimɔ kɔ‘m.
K’ɛ́nɛ́ kpe zer'nɛ́ tɛ gɔfamɔ in aia-nú kɔ‘m na!
57Wese n'am sa nɛ ɛnɛ‘i, ɛnɛ ɗɔla pii ti,
ɓɛɛ ɛ́nɛ́ tɔ̧́, «Ká kíì de mɛ na!»
58GASA WAN, ɛnɛ ɗafa yuwar wen kɔ‘m,
ɛnɛ kpasa'm.
59GASA WAN, bo nɛ ɛnɛ zɔka gɔɔmɔ nɛ wa de in am'i na?
Ɛ̀nɛ̀ gɔ́n kita zu'm nɛ yuwar-a.
60Ɛnɛ zɔka wan o ŋgamɔ
in o ɓira wen-ndela nɛ wa ɓira e nú‘m gɔ!
61GASA WAN, ɛnɛ zia gɔna da̧ra̧ nɛ wa gɔna e tɛ‘m'i,
in ɓira wen kɔ-wa e nú‘m mbɛt'i.
62O wi-sɛn-am fu̧i̧ nɛ wen
e nɛ ɗɔra tɛ‘m ɓɔnsɛnɛ.
63Ɛ̀nɛ̀ zɔ́k wa: kóó wa yor nɛ ŋgɔn,
kóó wa ya nɛ nu, nin-am kifa nɛ gima-bìì kɔ-wa.
64GASA WAN,
ɛ́nɛ́ tɛ́ de ha̧ mɔɔ-oi-tom kɔ-wa mɛ tik zu wa.
65Ɛ́nɛ́ tɛ́ ŋgai see-wa,
ɓɛɛ ɛ́nɛ́ tɛ tok ɗaŋ yoŋgo a zu wa.
66Ŋga nyimsea k’ɛ́nɛ́ tɛ ndak ɗoŋ wa,
ɓɛɛ ɛnɛ tɛ kum wa zu nu’ɛ yinɛ!
Currently Selected:
O AIA-NÚ 3: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.