O AIA-NÚ 2
2
Usa bɔnɛ ko Gasa Wan ha̧ Jerusalɛm
1Ho! See GASA WAN ɗaŋa,
ɓɛɛ pi̧ tum zu Siɔŋ nɛ duka so
hee gba de be-zɔŋa ga.
A̧ siŋa gasamɔ ko Israɛl pi̧ nu nɛ yiwese mɛ!
Wese nɛ see-aa tu̧u̧ nɛnɛ‘i,
tɛ-a mbaŋ ɗoŋ Tua kɔ̧-a̧#2.1 tua kɔ̧-a̧: texte tɔ̧ɔ̧ nɛ́ mɔɔ-e-ɗɔɔ naŋ-a nɛ̀ usi nɛ́ Kaya Siɔŋ; kóó Tua ko Sɔ̧ nɛ̀ duka hi̧i̧. ɓɔna.
2GASA WAN ɗaŋa o ye ko Jakob lɛŋ, ko de a̧ na;
tɛ ŋga nyimsea nɛ dea-a,
a̧ gbina o ŋgárá nu Juda lɛŋ.
A̧ ɗaŋa nutua wan kɔ-wa,
ɓɛɛ pi̧ búù zu nu'i in zu o gasawi tɛ nu'i lɛŋ.
3Tɛ ŋga nyimsea nɛ dea-a,
a̧ gbina ŋgai ko Israɛl yinɛ;
a̧ ye ɗoŋ wa ŋgimbi hɔa-a
ko o wisɛn kɔ-wa na;
a̧ pi̧i̧ wee zu nu ko Jakob,
ɓɛɛ dɔ mɔ lɛŋ a nu gbuɗuk.
4A̧ ŋgaŋa kusaa kɔ̧-a̧ hee wisɛn ga,
ɓɛɛ er-a mɛ wiiko duk ɓɔn tɛ goo.
Hee wisɛn ga a̧ kuma o mɔ lɛŋ
nɛ‘i zɔk so hee gba demɔ ga.
A̧ dee ha̧ wee-nyimsea kɔ̧-a̧
mɛ tik zu tua-laa ko Siɔŋ.#2.4 tua-laa ko Siɔŋ: ŋmafara mɔ'ɔ usi nɛ́ Tua ko Sɔ̧ sɛn Jerusalɛm.
5GASA WAN ɗaŋa Israɛl,
hee a̧ nɛ wisɛn kɔ-wa ga,
gbin nɛ o tua-wan in o ŋgárá kɔ-wa lɛŋ a nu;
mɔ‘i dee ha̧ aia-nú in gɔfamɔ ko o be Juda
mɛ gasi gan kuti-a.
6GASA WAN ɗaŋa fɔ in gbaksak kɔ‘i;
a̧ ɗaŋa fara-kpa-ŋmaa in a̧,
a̧ dee ha̧ o wese-yɔyɛ in o wese-ɔm-tɛ
mɛ hɔ nduti sɛn Siɔŋ;
ŋga nyimsea kɔ̧-a̧ tika zu wannu
gu nɛ o wi-ɗafi-sɔ̧ mbɛt.
7GASA WAN fɛŋa fara-ɗaf'a,
tua kɔ̧-a̧ kifa nɛ mɔɔ-nyɛr sɛn tɛ-a;
a̧ dee ha̧ o wisɛn mɛ gbin o ŋgárá-pɛm-ye a nu,
ɓɛɛ kànà nɛ́ gayamɔ ŋgúr-ŋgúr kɔ̧ Tua ko Sɔ̧,
hee mɛ nɛ wese gbaŋa ga!
8GASA WAN kɔ̧ɔ̧ kànà mɛ to ŋgárá Siɔŋ a nù puturu;
a̧ tɛ gbin mɔ a nu lɛŋ sɛka a̧ ɗaia er-a.
Ŋgárá in o ŋga fara ye'i gbina a zu ŋmaa,
ɓɛɛ nɛ hi̧a̧-fio a̧ baa fara'i.
9O kpar-nú-garo lɛŋ ya ɗɔɔ gbina ŋgeŋ,
o mɔɔ-mana-a gbina a nu lɛŋ mbɛt.
Wannu in o be-wan kɔ‘i lɛŋ
yee kɔ̧ er o bíí nɛ iŋ Sɔ̧ na;
Heembea bo ɓɔna.
GASA WAN hɔ zu ha̧ o wi-tɔ̧-wen oi nú-wi ɓɔna mbɛt.
10O gasawi Siɔŋ ya kànà nɛ̀ mgbák mbɔɗɔnu
nɛ̀ oi nú-wa.
Wa aa bùk zu wa,#2.10 bùk: texte tɔ̧ɔ̧ nɛ́ fuunu.
pi̧ nɛ laa bufu.
O be-zɔŋa Jerusalɛm yá nɛ́ yáá-à zumɛɛ,
zum nɛ zu si mbɔɗɔnu.
11Yí‘m pii nɛ mi̧i̧kɔ̧a̧ rɔtɛ-rɔtɛ,
tɛ‘m lɛŋ nak nak;
ŋgai gboo tɛ‘m lɛŋ,
wen zu tika-a ko dukbíí kɔ‘m;
o be-zɔɗi in o geɗek bem tik nɛ ŋgata nɛ bee-gara nɛnɛ.
12O bem nɔ‘i duka ak nɛ nàà kɔ-wa:
«Nyɔŋmɔ in o mɔɔ-nɔ a̧a̧ bɔɔ dee?»
Wa hɔ̧fa̧ tik nu nɛ bee-gara nɛnɛ
hee o wi-biro nɛ sap-da̧i̧ ba ga,
fe nɛnɛ yí-ŋguɗi nàà kɔ-wa.
13Jerusalɛm, mɛ́ nɛ̀ duka so hee gba de be-zɔŋa ga’ɛ,
nɛ́ ge a̧‘m tɛ tɔ̧ ha̧ mɛ ge?
Nɛ́ ge a̧‘m tɛ we nɛ́ mɛ ge?
Siɔŋ, mɛ́ nɛ̀ duka so nɛ gba demɔ'ɛ,
mi tɛ we nɛ ɗoŋ ge ha̧ mɛ nɛ tɛ ga̧ see-mɛ ge,
wen tika-a kɔ-mɛ‘i nɛ ŋgiri-mɔ hee zɔm gba-tɔp ga,
ɓɛɛ wi nɛ tɛ kpasi mɛ nɛ o?
14O wi-tɔ̧-wen oi nu Sɔ̧ kɔ-mɛ tɔ̧ so kpasawen ha̧ mɛ na,
gba̧a̧-mɔ bo so tɛ wen kɔ-wa na.
Kà wa a̧ usa so yɔɔ-kaya kɔ-mɛ ha̧ mɛ,
bó nɛ́ mɛ́ tɛ̀ɛ́ ye so tɛ mɔɔ-bara na.
Wen nɛ wa duka so tɔ̧ ha̧ mɛ
nɛ gee ya-zu-wen gee.
15O wi-ɓir-war mbɛr nɛ er zu Jerusalɛm,
mii nɛ zu dɔm nɛ fɔ̧i̧, zɛkɛɗi nɛ kɔ‘i, tɔ̧ nɛnɛ‘e:
«Ye nɛ wa tɔ̧ so nɛnɛ‘e,
de-a nɛ́ ari,
nɛ duka so nɛ mɔɔ-tortɛ ko bíí lɛŋ'ɛ,
nɛ mɔ'ɔ hegɔ'ɛ!»
16O wisɛn kɔ-mɛ lɛŋ tɔ̧ nɛ wen si zu mɛ;
wa sɔr nɛ mɔ nyɔŋ nɛ goko tɔ̧ nɛnɛ‘e:
«Ɛ́ɛ́ dee mɔ ba nú-a!
Wese n’ɛɛ pɛma so'i, nɛ mɔ'ɔ nɛ hɔa'i;
wese'i nɛ mɔ'ɔ n’ɛɛ zɔk nɛ yí-ɛɛ'ɛ!»
17GASA WAN dee mɔ n'aa taa so mɛ de;
wen n'aa tɔ̧ɔ̧ so ɓeemɛ‘i hɔɔ gba̧a̧.
A̧ ɗaŋa mɔ, ko de a̧ na;
a̧ dee ha̧ o wisɛn kɔ-mɛ mɛ kpa desee
tɛ mɔ nɛ tika zu mɛ‘i,
a̧ baa ŋgai kɔ-wa e ŋgɔn.
18 Siɔŋ, mɛ̀ híɗí mɔ sitɛ GASA WAN,
mɛ̀ áí nú ha̧ a̧.
Yí-mɛ a̧ mbaŋ zɛ nɛ wese
nɛ mi̧i̧kɔ̧a̧ hee be-zer ga;
in ká yí-mɛ zɔm nɛ mi̧i̧kɔ̧a̧ na mbɛt!
19Mɛ́ ɗuka-zɛ in mɛ́ si gɔna ndaa-zan,
mɛ kúr, mɛ̀ gbá nú-mɛ tɛ kɔ̧a̧.
Mɛ̀ hú̧í̧ see-mɛ ha̧ GASA WAN,
hee nana-yì ga nɛ pɛsa-a ɗayuu.
Mɛ̀ nyɛ́í̧ er-mɛ sitɛ a̧,
ha̧ o bem kɔ-mɛ nɛ fe wɔ
nɛ mgbara kira nɛnɛ‘i mɛ kpasi.
20Ɛ̀nɛ̀ zɔk, GASA WAN,
nɛ́ ò ɛ̀nɛ̀ usa pɛrti bɔnɛ'ɛ ha̧ a̧ kaɗi o?
N’ɛ̀nɛ̀ duk nɛnɛ‘i,
ɛ́nɛ́ zɔka ŋma fara nɛ nàá-wan-bem
gii bem kɔ‘i nɛ tɛ-wi nyɔŋ,
bem n'aa duka bɔŋgɔli dai nɛnɛ'ɛ kaɗi nde?
O bíí kaia o wi-ɗafi-sɔ̧ in o wi-tɔ̧-wen oi nu Sɔ̧
tɛ́ɛ̀ gɔn kɔ̧ tua-wor-sɔ̧ kaɗi nde?
21O be-zɔɗi in o gbɛ́rɛ́ yá nɛ̀ ká̧ yuwar ŋgoɗoso-ŋgoɗoso;
wa gɔma o be-ŋgaiwi in o be-zɔŋa
gbɛ a nu nɛ gba-paa lɛŋ.
Tɛ ŋga nyimsea k’ɛ́nɛ́, ɛnɛ kuma wa,
ɛ́nɛ́ gbɛ̀ɛ́ wa a nu, gee ko de'nɛ́ na.
22Ɛ́nɛ́ saa o mɔɔ-kíì tɛnɛ pii zu'm,
hee gara gbaŋa ga.
Ŋma gee bíí kpɔk nɛ yuu mɔ,
kóó nɛ kpasa wese ŋga nyimsea k’ɛ́nɛ́‘i, bo na.
O wisɛn kɔ‘m kuma o bem n'am koa dai nɛnɛ.
Currently Selected:
O AIA-NÚ 2: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.