TOM 2
2
Tɛa-a ko Sa̧a̧ Ɔmi
1Wese gbaŋa Pantekot, wa mɔi̧a ŋmaa lɛŋ duk kpɔk fara.#Lev 23.15-21; Wee-ɗoŋ-he 16.9-11 2Kà wa tɛ zii wó, ɓɛɛ ŋma zɔm mɔ tuɓa nɛ̀ yiwese mɛ nɔ̧́í nɛnɛ piinɛ hee wan-wee ga, dun kɔ̧́ tua nɛ̀ wa ya sɛnɛ‘i. 3Ɓɛɛ wa zɔk ŋma mɔ hee leɓe-wee ga, nɛ̀ gɔna duk zu-wa kpɔk kpɔk. 4Wa lɛŋ duna nɛ̀ Sa̧a̧ Ɔmi, ɓɛɛ wa ku̧ naŋ tɔ̧ɔ̧ o gɔni-nú nɛtɛ nɛtɛ hee mɔ'ɔ nɛ̀ Sa̧a̧ Ɔmi usa ha̧ wa mɛ tɔ̧ ga.
5Ŋgimbi'i, o Juif nɛ̀ yu Sɔ̧ nɛ̀ tɛ̀ɛ̀ so nɛ̀ tɛ o tugun bíí nɛtɛ nɛtɛ zaŋnu yaa so Jerusalɛm. 6O giiwi nɛ̀ zia giti mɔ‘i, mɔi̧a nɛnɛ, ɓɛɛ wa sakali lɛŋ, wen kóó o ndé zia wa fara tɔ̧ɔ̧ wen nɛ̀ mgbák nú kɔ‘i. 7Kíì dee wa, ɗɛɗɛ-wa gɔna mbɛt, ɓɛɛ wa tɔ̧: «O wi nɔ'ɔ nɛ̀ tɔ̧ wen’ɛ bó nɛ́ o be Galilee lɛŋ na? 8Dee héé ge s’ɛɛ zii bɔɔ wa fara tɔ̧ wen nɛ̀ mgbák nú k’ɛɛ kpɔk kpɔk’ɛ ge? 9Wen sɛn mgbara yɛ'ɛ, o be Part a̧a̧ sɛnɛ, in o be Mɛd, in o be Elam, o bíí nú Mesopotamii, o be Judee, in o be Kapados, o be Pɔnt, o bíí nú Azii; 10o be Frigii in o be Pamfilii, o bíí Egiptɛ, in o be Sirɛn nú Libii, ká bá nɛ̀ o gɛnɛ nɛ̀ tɛ̀ɛ́ nɛ̀ Rɔm mbɛt; 11o Juif in o wi-ndak-pata yuwar-ɗafa-sɔ̧ ko o Juif, o be Krɛt in o Arab mbɛt. Ɓɛɛ ɛ́ɛ́ lɛŋ zii nɛ́ wen gasamɔ nɛ̀ Sɔ̧ dea, nɛ̀ wa tɔ̧ nɛ̀ mgbák nú k’ɛɛ.» 12Wa sakala lɛŋ duk yelem, ɓɛɛ wa tɔ̧ sitɛ o ŋmaa: «Ɛ̧ɛ̧ mɔ'ɔ nɛ́ gba ge?» 13O ŋma zɛkɛɗa kɔ‘i wa'e ndé: «Nɛ́ dɔ̧ɔ̧ a̧ gbɛ wa.»
14Nɛ́ mɔ'ɔ nɛ̀ Pierre kura yor ŋgɔn in o betom ɓu-zua-kpɔk, ɓɛɛ tɔ̧ wen ha̧ o giiwi nɛ̀ hee-ger'e ndé: «Ɛ́nɛ́ o be Judee in o bíí Jerusalɛm lɛŋ, ɛ̀nɛ̀ yéŋ zer'nɛ́, ha̧‘m tɔ̧ gba̧a̧ mɔ nɛ̀ de’ɛ h’ɛ́nɛ́ zii. 15Bó nɛ́ dɔ̧ɔ̧ a̧ gbɛ o wi nɔ'ɔ hee ɛ́nɛ́ ta ga na, wen wese daŋa ɗoŋ-aa tɛ nyɛi̧ hɔ̧ɔ̧ na. 16Ɓɛɛ mɛ̀ nɛ́ wen nɛ̀ wi-tɔ̧-wen oi nú Sɔ̧ Jɔɛl tɔ̧ɔ̧ so a̧ hɔɔ gba̧a̧:
17‹Wen Sɔ̧ tɔ̧ɔ̧ so'e:
Mɔ nɛ̀ tɛ hɔ sɔŋkur ŋgimbi nɛ́ mɔ'ɔ:
Mi tɛ́ ha̧ Ɔmi kɔ‘m ha̧ o bíí lɛŋ.
O bem k’ɛ́nɛ́ mɛ be-wiwii-a in o be-okoo-a,
tɛ́ ya nɛ́ o wi-tɔ̧-wen oi nú Sɔ̧.
Mi tɛ́ hɔ zu ha̧ o be-ŋgaiwi k’ɛ́nɛ́,
ɓɛɛ o gbɛ́rɛ́ k’ɛ́nɛ́ tɛ ɔ zu.#Jɔɛl 3.1-5
18Ŋgimbi'i, mi tɛ́ ha̧ Ɔmi kɔ‘m
ha̧ o wiwii in o kó-de-tom kɔ‘m,
ɓɛɛ wa tɛ tɔ̧ wen oi nú Sɔ̧.
19Mi tɛ́ de o mɔɔ-gɔn-ɗɛɗɛ yiwese mɛ,
in o mɔɔ-usi-mɔ zaŋnu’ɛ.
Bíí tɛ́ zɔk tɔk, wee, in tura-zi-wee.
20Wese tɛ́ ba tum, ɓɛɛ zɛ kifa tɔk,
nɛti sɛka wese ko Gasa Wan hɔa.
Mɛ̀ nɛ́ gasa wese nɛ̀ ɔ gasa,#2.20 nɛ̀ ɔ́ gásá: texte tɔ̧ɔ̧ nɛ́ gásámɔ̀.
21ɓɛɛ kóó o ndé nɛ tɛ́ sa nin GASA WAN tɛ kpasi.›
22«Ɛ́nɛ́ o be Israɛl, ɛ̀nɛ̀ zíí wen’ɛ! Nɛ́ Sɔ̧'ɔ̧ toma Jesu be Nazarɛt tɛnɛ h’ɛ́nɛ́, ɓɛɛ de o mɔɔ-gɔn-ɗɛɗɛ-wi, o mɔɔ-kifi in o mɔɔ-usi-mɔ mbɛt mgbara'nɛ́ nɛ̀ er-a, wen h’ɛ́nɛ́ mɛ iŋ a̧. Ɛ́nɛ́ iŋa mɔ‘i nɛ̀ tɛ‘nɛ́ hegɔ mbɛt. 23Nɛ́ wi’ɛi ɛ́nɛ́ gbɛa, wen ɛ́nɛ́ ea a̧ er o wi-ɗaŋ ha̧ wa mɛ mgboi a̧ zu te-diŋa nyɛm nɛ̀ ɗoŋ mɔ nɛ̀ Sɔ̧ iŋa in mɔ n'aa ɗafa nɛti.#Mt 27.35; Mk 15.24; Lk 23.33; Jn 19.18 24Nɛ́ mɔ'ɔ nɛ̀ Sɔ̧ kpasa a̧, gbo nɛ̀ a̧ tɛ bɔnɛ-fio yinɛ, wen ŋgai ko fio nyɛm mɛ dor a̧ ɓɔn kɔ̧́-fio na.#Mt 28.5-6; Mk 16.6; Lk 24.5 25David tɔ̧ɔ̧ so wen wen-aa'e ndé:
‹Mi zɔk Gasa Wan ti'm ɓɔnsɛnɛ.
A̧ duk nɛ̀ war wii-er-am,
wen ká tɛ‘m tɛɛ nak.#Gima 16.8-11
26Hegɔ mi duk nɛ̀ desee
bíí nɛ̀ gima nɛ̀ tortɛ;
ɓɛɛ kiitɛ‘m tɛ́ duk nɛ̀ de-a
e nɛ̀ ta nɛ̀ ɛ́nɛ́,
27wen ɛ́nɛ́ beka e
ha̧‘m mɛ ɓɔn ye ko o fio na.
Ɛ́nɛ́ beka e ha̧ sa̧a̧-bíí k’ɛ́nɛ́
mɛ mbɔr na mbɛt.
28Ɛ́nɛ́ usa yuwar duka-kpasa ha̧‘m.
Ɓɛɛ ɛ́nɛ́ tɛ́ de ha̧‘m mɛ duk in'nɛ̀ɛ́,
ha̧‘m mɛ kpa desee.›
29«O nya'm, ha̧‘m tɔ̧ wen’ɛ h’ɛ́nɛ́ nɛ̀ sa̧a̧-a̧, ɛ̀nɛ̀ zìì: zɔmdáa k’ɛɛ David fea, ɓɛɛ wa gun a̧, pɛsi kɔ̧-a̧ a̧a̧ mgbara yɛ hɔ sɔsɔɔ‘i. 30A̧ duka so nɛ́ wi-tɔ̧-wen oi nú Sɔ̧, ɓɛɛ a̧ iŋ‘e Sɔ̧ ha̧a̧ nú ha'i nɛ̀ kanamɔ‘e ndé, wi tɛ de ha̧ kpɔk mgbara o bezaŋ-aa mɛ duk zu damti oi-aa.#Gima 132.11; 2 Sam 7.12-13 31David iŋa so kura-ŋgɔn ko Mɛsii tɛ fio nɛti ɓeemɛ; nɛ́ mɔ‘i ɓɛɛ sa a̧ tɔ̧ nɛ̀ wen'e ndé: A̧ e a̧ ɓɔn fara ko o fio na, in kiitɛ-a mbɔr na mbɛt. 32Wi’ɛi nɛ́ Jesu nɛ̀ Sɔ̧ kpasa tɛ fio; ɛ́ɛ́ lɛŋ nɛ́ o wi-sedaako-a. 33Sɔ̧ baa a̧ si ŋgɔn nɛ̀ wii-er, ɓɛɛ Dáà ha̧ Sa̧a̧ Ɔmi ha̧ a̧ nyɛm nɛ̀ ɗoŋ ha̧a̧nú kɔ‘i; nɛ́ mɔ'ɔ n'aa ha̧a̧ Sa̧a̧ Ɔmi'i h’ɛ́ɛ́ mbɛt. Mɛ̀ nɛ́ mɔ‘i ɛ̀nɛ̀ zɔk in n’ɛ̀nɛ̀ zii kinii’ɛ. 34David nɛ̀ tɛ-wi daŋ si yiwese na, ɓɛɛ nɛ́ mɔ'ɔ n'aa tɔ̧a̧‘e ndé:
‹Gasa Wan tɔ̧ɔ̧ ha̧ Gasa Wan kɔ‘m,
mɛ̀ dúk nɛ̀ war wii-er-am,#Gima 110.1
35hɔ ŋgimbi n'am tɛ de
ha̧ mɛ mɛ kpa ŋgai zu o wisɛn kɔ-mɛ.›
36«Ɓɛɛ ɛ́nɛ́, dukbíí Israɛl lɛŋ a̧ íŋ nɛ̀ sa̧a̧-a̧‘e ndé, mɛ̀ nɛ́ Jesu n’ɛnɛ mgboia zu te-diŋa a̧ Sɔ̧ ee nɛ̀ Gasa Wan in Mɛsii mbɛt.»
37See-wa ŋmana tɛ wen'i, ɓɛɛ wa tɔ̧ ha̧ Pierre in o betom: «O nya-ɛɛ, ɛ̀ɛ̀ dé hee ge?» 38Pierre kifa nú: «Ɛ̀nɛ̀ kpáí duka-a k’ɛ́nɛ́, ha̧ wa zui'nɛ́ kpɔk kpɔk nɛ̀ nin Jesu Krist, ha̧ Sɔ̧'ɔ̧ é ɗaŋmɔ k’ɛ́nɛ́ h’ɛ́nɛ́, ɓɛɛ a̧ tɛ ha̧ Sa̧a̧ Ɔmi h’ɛ́nɛ́. 39Wen ha̧a̧nú ko Sɔ̧ nɛ́ k’ɛ́nɛ́ in o bezaŋ‘nɛ́ in o wi mɛ nyɛi̧a fara lɛŋ, kóó o ndé nɛ̀ Gasa Wan Sɔ̧ k’ɛ́ɛ́ tɛ́ sa a̧.»
40Pierre tɔ̧ɔ̧ ŋma wen woyo nɛ̀ dɔka-a, de nɛ̀ sedaako ha̧ nɛ̀ nɔɔ-ŋgiɗi ha̧ wa'e: «Ɛ̀nɛ̀ zɔ́k tɛ‘nɛ́ wen o ɗaŋ tugun bíí nɔ'ɔ.» 41O wi nɛ̀ kpɛka wen ko Pierre, kpaa zuia wa. Wese'i o mbe bíí nɛ̀ kɔ̧ɔ̧ ɗɔaa duka hee booro-taar ga a zu o wan mɛ ti. 42Wa mboo zu tɛ usamɔ ko o betom in yaa-a nɛ̀ see kpɔk in o ŋmaa, nyɔŋ nɛ̀ mɔ kpɔk in o ŋmaa,#2.42 nyɔŋ nɛ̀ mɔ kpɔ́k ín ó ŋmaa: táámɔ̀'ɔ úsí nɛ́ nyɔŋmɔ́-kɛndao mbɛ́t. kɔfi nɛ̀ Sɔ̧ ɓɔnsɛnɛ.
43Kíì dee o bíí lɛŋ, wen o dɔka mɔɔ-kifi in o mɔɔ-usi-mɔ nɛ̀ Sɔ̧ dee nɛ̀ er o betom. 44O bíí nɛ̀ kɔ̧ɔ̧ ɗɔaa lɛŋ ha̧ Sɔ̧ duka kpɔk in o ŋmaa, ɓɛɛ wa mɔi̧ mɔ kɔ-wa lɛŋ a zu ŋmaa.#Tom 4.32-35 45Wa ɗɔra o fɔ kɔ-wa in mɔ kɔ-wa, ɓɛɛ wa kɛ̧ sede-a nɛ̀ o ŋmaa dam wa, wen ha̧ kóó o ndé mɛ de nɛ̀ san kɔ‘i. 46Wa mɔi̧a in o ŋmaa nɛ̀ see kpɔk kɔ̧́ Tua ko Sɔ̧ dam ɗoŋ wese lɛŋ, ɓɛɛ wa nyɔŋ mɔ nɛ̀ er ŋmaa in o ŋmaa kɔ̧́ tua kɔ-wa nɛ̀ desee in mɔka-see mbɛt. 47Wa gasa Sɔ̧; dukbíí lɛŋ zɔna wa, ɓɛɛ dam ɗoŋ wese lɛŋ, Gasa Wan dee ha̧ o mbe bíí nɛ̀ kpaa yuwar-kpasa-a mɛ dɔk a zu wan mɛ ti.
Currently Selected:
TOM 2: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.