TOM 1
1
Ha̧a̧nú zu Sa̧a̧ Ɔmi
1Nyaa Teofil,
Mi wee ɗoŋ mɔ lɛŋ nɛ̀ Jesu dea in mɔ n'aa usa mbɛt zaŋ kuti kalata kɔ‘m.#Lk 1.1-4 2Mi wee ɗoŋ mɔ nɛ̀ Jesu dea n'aa ku̧u̧ nɛ̀ naŋ tom kɔ̧-a̧ mɛ hɔ nɛnɛ wese nɛ̀ Sɔ̧ baa nɛ̀ a̧ si yiwese. Wese'i, á̧ à̧ ee nɛ̀ tom nɛ̀ ŋgai ko Sa̧a̧ Ɔmi er o betom n'aa hoka so. 3Ɗoŋ fio kɔ̧-a̧, a̧ usa tɛ̀ nɛ̀ kpasa ha̧ wa tɛ o yuwar nɛtɛ nɛtɛ. A̧ usa tɛ̀ ha̧ wa hegɔɔ tɛ zɛ ɓu-naar, tɔ̧ nɛ̀ mgbara mɔɔ-wan ko Sɔ̧ ha̧ wa. 4Ɓɛɛ tɛ ŋma ŋgimbi nyɔŋmɔ, a̧ tɔ̧ɔ̧ mbɔrɔ ha̧ wa'e, ká wa e Jerusalɛm duk na, wen ha̧ wa mɛ kpa mɔ nɛ Dáà baa ha̧ nú wen-aa'i sɛ. A̧ tɔ̧a̧: «Ɛ́nɛ́ zia so wen mɔ‘i nú‘m kaɗi.#Lk 24.49 5Jean zuia bíí nɛ̀ yi, ɓɛɛ k’ɛ́nɛ́, ɗoŋ zɛ tikiɗi, wa tɛ zui'nɛ́ nɛ̀ Sa̧a̧ Ɔmi.»#Mt 3.11; Mk 1.8; Lk 3.16; Jn 1.33
Daŋa-a ko Jesu si yiwese
6Nɛ́ mɔ'ɔ nɛ̀ o wi nɛ̀ mɔi̧a so katɛ Jesu aka a̧ hegɔ: «Gasa Wan! Nɛ́ kinii, ɛ̀nɛ̀ tɛ de nɛ̀ wan ha̧ Israɛl woyo nde?» 7A̧ kifa nú ha̧ wa: «Ŋma mɔ k’ɛ́nɛ́ tɛ iŋa zɛ in ŋgimbi nɛ̀ Dáà gɔna tɛ ŋgai kɔ‘i bo na. 8K’ɛ́nɛ́, ɛ́nɛ́ tɛ kpa ŋgai, ŋgimbi nɛ̀ Sa̧a̧ Ɔmi tɛ zir pii zu'nɛ́, ɓɛɛ ɛ́nɛ́ tɛ ya o wi-sedaako kɔ‘m sɛn Jerusalɛm in nú Judee nɛ̀ oi-aa in Samarii mbɛt hegɔɔ hɔ nɛnɛ nduti nù mɛ.»#Mt 28.19; Mk 16.15; Lk 24.47-48 9Ɗoŋ wen'i, Jesu daŋa si yiwese ɓɔn yí-wa, ɓɛɛ tura-zan kpe ɗoŋ-aa.#Mk 16.19; Lk 24.50-51
10Ɓɛɛ hee mɔ'ɔ nɛ̀ wa biti kɛ̧i̧ mɔ si ɗoŋ-aa fara daŋa-a si yiwese ga, o bíí yiitoo nɛ̀ pi̧i̧ bu laa hɔɔ yor, 11ɓɛɛ tɔ̧: «O wi Galilee, wen ge s’ɛ́nɛ́ yor kɛ̧i̧ nɛ̀ mɔ si yiwese’ɛ ge? Jesu nɛ̀ Sɔ̧ baa si yiwese ɓɔn yí‘nɛ́'ɛ, tɛ́ pii ɗoŋ hee mɔ'ɔ n’ɛnɛ zɔka nɛ̀ a̧ fara daŋa-a si yiwese ga.»
12Ɓɛɛ o betom ko Jesu zir zu kaya nɛ̀‘i sa'e «Kaya Te-nɔ̧́» si ɗoŋ Jerusalɛm mɛ; fara'i nyɛi̧ nɛ̀ Jerusalɛm na, nyɛi̧a-a dee hee kilomɛtrɛ kpɔk ga. 13Wa sii ɗoŋ saaye kaɗi, ɓɛɛ wa daŋ si kɔ̧́ bɛr-tua-mɛ-ŋgɔn fara-yaa kɔ-wa. Nin wa nɛ́ mɔ'ɔ: Pierre, Jean, Jak in Andre, Filip in Tomas, Bartelemi in Matthieu, Jak bem ko Alfe in Simɔŋ mgbák kpasa be-nù in Judɛ bem ko Jak.#Mt 10.2-4; Mk 3.16-19; Lk 6.14-16 14Wa lɛŋ yaa nɛ̀ see kpɔk in o ŋmaa tɛ kɔfa-sɔ̧ ɓɔnsɛnɛ. O ŋma okoo a̧a̧ so mgbara wa, in Marii nàà ko Jesu, ká bá nɛ̀ o nya Jesu mbɛt.
Hoka Matias
15Ŋma wese, Pierre kura ŋgɔn mgbara o nya-wi nɛ̀ mɔi̧a hee gɔmŋmaa-nɛ-ɓu-yiitoo ga, ɓɛɛ tɔ̧: 16«O nya'm, mɔ nɛ̀ yɔra zu Judas wan-duk-ti ha̧ o wi nɛ̀ baa Jesu tɛ̀ɛ́ hɔ kana gba̧a̧. Nɛ́ David a̧ tɔ̧ɔ̧ so wen'i nɛ̀ ŋgai ko Sa̧a̧ Ɔmi. 17Judas nɛ́ gbama wi-de-tom in yɛɛ, nɛ̀ Jesu hoka so mɛ de tom kpɔk in yɛɛ. ( 18Nɛ́ mɔ'ɔ n'aa baa sede-ɗaŋmɔ hi̧fi nɛ̀ fɔ, ɓɛɛ a̧ hɔ̧fi̧ tik nù nɛ̀ ta-tɛ-a nɛ̀ ger, zaŋ-aa mbaŋ, ɓɛɛ nyak zaŋ-aa gbo a nù lɛŋ.#Mt 27.3-8 19O bíí Jerusalɛm lɛŋ zia nyɛrɛ mɔ‘i, ɓɛɛ wa gɔn nin fɔ‘i nɛ nú kɔ-wa'e: ‹Hakɛldama›, mɛ̀ nɛ́ wen nɛ̀ tɔ̧‘e: ‹fɔ-tɔk›.) 20Wen kalata gima ko David tɔ̧ɔ̧ so'e ndé:
‹Tua kɔ̧-a̧ a̧ kífí nɛ́ gɛ̧ɛ̧-tua;
ká bíí ɔ sɛnɛ ɓɔna.›
Tɔ̧ɔ̧ woyo mbɛt'e ndé:
‹Ŋma bíí a̧ bá fara oi-aa.›#Gima 69.25; 109.8
21-22«Ŋma bíí a̧ yé mgbara yɛ mɛ́ duk wi-sedaako kura-ŋgɔn ko Jesu in yɛɛ. Wi’ɛi tɛ duk nɛ́ ŋma bíí mgbara o wi nɛ̀ yara so in yɛɛ ŋgimbi lɛŋ nɛ̀ Gasa Wan Jesu duka in yɛɛ, ku̧u̧naŋ-a tɛ ŋgimbi nɛ̀ Jean zuia nɛ́ bíí hɔ wese nɛ̀ Sɔ̧ baa nɛ̀ Jesu si yiwese ɓɔn yí-ɛɛ.»#Mt 3.16; Mk 1.9; 16.19; Lk 3.21; 24.51 23Nɛ́ mɔ'ɔ nɛ̀ wa kaia o bíí yiitoo a nù, Jozɛf nɛ̀ wa saa'e Barsabas, ŋma nin-a nɛ́ Justus, ɓii wi nɛ́ Matias. 24Ɓɛɛ wa kɔfi Sɔ̧ hee mɔ'ɔ ga: «Gasa Wan, ɛ́nɛ́ iŋa taamɔ kɔ̧́ see o bíí lɛŋ; mgbara o wi nɔ'ɔ yiitoo’ɛ, ɛ̀nɛ̀ úsí wan n’ɛnɛ hoka 25mɛ ye tɛ tom ko betom ko Jesu, wen báá fara nɛ̀ Judas ee duk mɛ yak si mgbák fara kɔ‘i.» 26Nɛ́ mɔ'ɔ nɛ̀ wa pi̧i̧ tani, ɓɛɛ tani ba nɛ́ Matias, ɓɛɛ a̧ ye mgbara o betom ko Jesu ɓu-zua-kpɔk.
Currently Selected:
TOM 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.