2 TESALONIK 3
3
Gasa Wan nɛ́ wi-yor-ɗoŋ wen kɔ‘i
1Hegɔ o nya-ɛɛ, ɛ̀nɛ̀ kɔ́fí Sɔ̧ wen yɛ, wen ha̧ wen ko Gasa Wan mɛ́ pɛsi nɛnɛ nɛ̀ haya-a in ha̧ o bíí mɛ́ zɔn wen'i hee mɔ'ɔ nɛ̀ de mgbara'nɛ́ ga. 2Ɛ̀nɛ̀ kɔ́fí Sɔ̧ mbɛt wen h’ɛ́ɛ́ mɛ́ gbo er o wi-ɗaŋ in o ɗaŋ-bíí wen bó nɛ́ wa lɛŋ a̧ a̧a̧ nɛ̀ kɔ̧ɔ̧ɗɔɔwen na.
3Gasa Wan nɛ́ wi-yor-ɗoŋ wen kɔ‘i; a̧ tɛ́ de h’ɛ́nɛ́ mɛ́ yor nɛ̀ nɔa-a, ɓɛɛ a̧ tɛ́ pɛm'nɛ́ wen Wan-ɗaŋ. 4Wen zu Gasa Wan, ɛ́ɛ́ iŋa nɛ̀ mbetɛ‘e, war k’ɛ́nɛ́, mɔ n’ɛ̀ɛ̀ tɔ̧́, ɛ́nɛ́ de dee, ɓɛɛ ɛ́nɛ́ tɛ́ de kànà hegɔ nɛnɛ siti mbɛt.
5Gasa Wan a̧ ír see'nɛ́ sitɛ kɔ̧ɔ̧mɔ ko Sɔ̧ in tɛ́ nɔɔ-ŋgiɗi ko Krist.
Bíí tɛ́ de tom
6O nya-ɛɛ, ɛ́ɛ́ tɔ̧ mbɔrɔ h’ɛ́nɛ́ nɛ̀ nin Gasa Wan Jesu Krist; k’ɛ́nɛ́ gbam in ŋma nya'nɛ́ nɛ̀ duk nɛ́ wi-tɛɛri na, nɛ̀ deemɔ kɔ̧-a̧ nyɛm ɗoŋ mɔ n’ɛ̀nɛ̀ zɔka tɛ̀ yɛ na mbɛt. 7K’ɛ́nɛ́, ɛ́nɛ́ iŋa hee ge ɛ̀nɛ̀ tɛ́ zɔk nɛ̀ ɗoŋ duka-a k’ɛ́ɛ́ ga. Bó nɛ́ ɛ́ɛ́ yaa so nɛ́ o wi-tɛɛri mgbara'nɛ́ na. 8Ɛ́ɛ́ ak ŋma bíí mɛ́ ha̧ mɔɔ-nyɔŋ h’ɛ́ɛ́ na, ɓɛɛ ɛ́ɛ́ dee tom zɛ nɛ wese, zɔk nɛ̀ bɔnɛ, mbɔi nɛnɛ wen k’ɛ́ɛ́ tɛɛ duk hee tui ga zu ŋma bíí mgbara'nɛ́. 9Nɛ̀ mbetɛ, ɛ́ɛ́ a̧a̧ so nɛ̀ ŋgai mɛ́ nyɔŋ mɔ k’ɛ́nɛ́, ɓɛɛ ɛ́ɛ́ de hegɔ na, k’ɛ̀nɛ̀ zɔk ɗoŋ deemɔ k’ɛ́ɛ́. 10Hegɔ, ŋgimbi n’ɛ́ɛ́ yaa so nɛnɛ in'nɛ̀ɛ́, ɛ́ɛ́ tɔ̧ɔ̧ so h’ɛ́nɛ́ hee mɔ'ɔ ga: «Kà ŋma bíí nɛ́ kɔ̧ɔ̧ dee tom na, ká a̧ nyɔŋ mɔ na mbɛt!»
11Ɛ́ɛ́ zia'e o ŋma bíí a̧a̧ mgbara'nɛ́ nɛ̀ ya de nɛ̀ tɛɛri, kíí nɛ̀ wen, wa kɔ̧ dee ŋma mɔ na. 12Ɛ́ɛ́ tɔ̧ wen’ɛ tɔ̧ nɛ̀ mbɔrɔ ha̧ o wi nɔ‘i nɛ̀ nin Gasa Wan Jesu Krist'e: wa a̧ dé tom nɛ̀ de-a, ɓɛɛ wa a̧ nyɔ́ŋ nɛ́ mɔɔ-oi-tom nɛ̀ er-wa dea.
13Ɓɛɛ war k’ɛ́nɛ́, o nya-ɛɛ, k’ɛ́nɛ́ mbɔi tɛ́ dee demɔ na. 14Kà ŋma bíí mbo zu tɛ́ wen n’ɛ̀ɛ̀ tɔ̧ zaŋ kalata’ɛ na, ɛ̀nɛ̀ zɔ́k wi’ɛi ŋgaɓo, k’ɛ́nɛ́ gbam in a̧ na, wen ha̧ foe mɛ́ de a̧. 15Ɓɛɛ bó nɛ́ h’ɛ́nɛ́ mɛ́ zɔk a̧ hee wisɛn ga na; ɛ̀nɛ̀ gáí nɛ́ a̧ hee nya'nɛ́ ga ɛ̧.
Toka-de-yoŋgo in fanamɔ
16Gasa Wan, wan-ga̧a̧mɔ a̧ há̧ ga̧a̧mɔ h’ɛ́nɛ́ nɛ tɛ-a ɓɔnsɛnɛ tɛ yuwar lɛŋ nɛtɛ nɛtɛ. Gasa Wan a̧ dúk in'nɛ̀ɛ́ lɛŋ.
17Fanamɔ'ɛ nɛ́ mi Paul a̧ yɔr nɛ̀ er-am. Nɛ́ hegɔ a̧‘m yɔr nɛ̀ nin-am ndaa o kalata kɔ‘m kpɔk kpɔk; mɔ'ɔ nɛ́ yɔramɔ kɔ‘m.
18Deemɔ nɛ̀ ta-tɛ ko Gasa Wan k’ɛ́ɛ́ Jesu Krist a̧ dúk in'nɛ̀ɛ́ lɛŋ.
Currently Selected:
2 TESALONIK 3: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.