1 TIMOTEE 1
1
Fanamɔ
1Nɛ́ mi Paul, betom ko Jesu Krist nyɛm nɛ̀ ɗoŋ tɔ̧ɔ̧-wen ko Sɔ̧ Wan-kpasi yɛ, in ko Jesu Krist wi n’ɛ̀ɛ̀ e nɛ̀ ta yɛ, a̧ tom kalata’ɛ 2ha̧ Timotee, kpasa bem kɔ‘m tɛ kɔ̧ɔ̧ɗɔɔwen. Deemɔ nɛ̀ ta-tɛ, deako, in ga̧a̧mɔ ko Sɔ̧ Dáà in ko Gasa Wan k’ɛ́ɛ́ Jesu Krist a̧ dúk in mɛ̀ɛ́.#Tom 16.1
Mbaŋa-tɛ-mɔ zu o ɗaŋ wi-usi-mɔ
3Ŋgimbi n'am kura so mɛ́ yak si Masedoan, mi tɔ̧ɔ̧ so'e mɛ̀ dúk kɔ-mɛ ɓɔn Efɛz, wen ha̧ mɛ́ mɛ́ dor o ŋma bíí tɛ usa o ŋma mɔ nɛtɛ; 4ká wa é see tɛ tɔ̧ɔ̧ géé to in tɔra o tugun nam nɛ̀ nduti-a bo na’ɛ na mbɛt. O mɔɔ nɔ‘i dak nɛ́ kafɛ pi̧ nù sɔɔ géè, nɛ̀ bó nɛ́ gbak wi tɛ́ mɔ nɛ̀ Sɔ̧ ee so zu-a nɛ̀ tɛ́ hɔ gba̧a̧ tɛ kɔ̧ɔ̧ɗɔɔwen na. 5Yuwar mɔ n’ɛ̀ɛ̀ kíí tɛ́ wen’ɛ nɛ́ kɔ̧ɔ̧mɔ wan mɛ́ sa̧a̧-see, in de taamɔ, ká bá nɛ̀ kpasa kɔ̧ɔ̧ɗɔɔwen. 6O ŋma bíí ee war duka-a hegɔ‘i duk, ɓɛɛ tɛ́ɛ̀ ba nɛ́ yuwar-bura-wen nɛ̀ gba̧a̧-a̧ bó na. 7Wa ta kɔ-wa'e wi nɛ́ o gasa wi-usi-heembea, ɓɛɛ wa iŋ gba̧a̧ wen nɛ̀ wa tɔ̧, nɛ̀ wa yor zu-a nɛ̀ ŋgaya-a'i na.
Mgbák yuwar tom ko heembea
8Ɛ́ɛ́ iŋa'e heembea nɛ́ demɔ, kà‘i nɛ́ dee tom-aa nyɛm sɛnɛ. 9Ɛ̀ɛ̀ íŋ mgbara mɔ'ɔ nɛ̀ de-a: bó nɛ́ heembea tɛ̀ɛ́ wen zu o wi-de-mɔ nɛ̀ yuwar-a na, ɓɛɛ mɛ̀ nɛ́ wen o wi-mbo-zu-na, o wi-ŋgazu, o wi-ɗaŋ, o ɗaŋwi, o wi-saka-yí, o wi-ɗaŋ-nin Sɔ̧, o wi-gbɛ-dáà in nàà kɔ‘i, ká bá nɛ̀ o wi-gbɛ-zu, 10o wi-de-dàlà, o wiwii nɛ ɔ in o ŋmaa, o wi-ɗɔr-bara, o wi-ndela, o wi-kan-mɔ nɛ̀ ndela in o wi-de-mɔ nɛ̀ bo zaŋ kpasa usamɔ na. 11Usamɔ nɛ̀ nyɛma ɗoŋ De Mbe Wen gasamɔ nɛ̀ Sɔ̧ Wan-desee ee er-am nɛ́ mɔ‘i.
Dee osoko wen dee demɔ ko Sɔ̧
12Mi de osoko ha̧ Jesu Krist Gasa Wan k’ɛ́ɛ́, nɛ̀ ha̧a̧ ŋgai ha̧‘m, wen a̧ zɔka'e mi nyɛma ha'i mɛ́ e tom er-am, ɓɛɛ a̧ hoka'm mɛ́ de tom kɔ̧-a̧. 13Mi duka so nɛ́ wi-ɗaŋ-nin Sɔ̧, wi-de-ŋgamɔ usi nɛ̀ bɔnɛ ha̧ o bíí, ɓɛɛ a̧ de ko ha̧‘m, wen mɔɔ nɔ‘i n'am dee so'i, mi iŋ na, wen mi kɔ̧ so ɗɔaa na.#Tom 8.3; 9.4-5 14Nɛ̀ mbetɛ, Gasa Wan k’ɛ́ɛ́ dee demɔ nɛ̀ ta-tɛ in am nɛ̀ dɔka-a gan, a̧ ha̧a̧ kɔ̧ɔ̧ɗɔɔwen in kɔ̧ɔ̧mɔ nɛ̀ a̧a̧ tɛ Jesu Krist ha̧‘m mbɛt. 15Wen’ɛ nɛ́ wen-e-nɛ-ta nɛ̀ nyɛma ha̧ bíí lɛŋ mɛ́ kpɛk war kpɔk. Jesu Krist tɛ̀ɛ́ zaŋnu mɛ́ kpasi o ɗaŋwi, ɓɛɛ mgbara o ɗaŋwi nɔ‘i mi nɛ́ kuti-a. 16Kà Sɔ̧ nɛ́ zɔka ko tɛ‘m, mi n'am duka so nɛ́ kuti-a'i, mɛ̀ nɛ́ wen ha̧ Krist mɛ́ usi gasa dee demɔ kɔ‘i tɛ‘m, wen ha̧ o wi nɛ̀ tɛ́ kpɛk a̧ nɛ̀ ɗoŋ wen duka-kpasa kpoo nɛ kpoo, mɛ́ zɔk mɔ‘i tɛ‘m. 17Tu̧u̧-tɛ-mɔ in gasamɔ a̧ dúk nɛ́ ko wannu nɛ̀ duk kpoo nɛ kpoo; ɓaa Sɔ̧ nɛ́ a̧ kpɔk, nɛ̀‘i zɔk na, nɛ̀ fe na mbɛt kpoo nɛ kpoo. Aamɛn.
Bíí biro nɛ̀ ɔ dee
18Timotee, bem kɔ‘m, mɛ̀ zíí wen n'am tɔ̧ ha̧ mɛ'ɛ nyɛm nɛ̀ ɗoŋ tɔ̧ɔ̧-wen oi nú Sɔ̧ zu mɛ́ nɛti, wen ha̧ mɛ́ mɛ́ kpa ŋgai mɛ́ bi nɛ̀ de biro. 19Mɛ̀ kásí kɔ̧ɔ̧ɗɔɔwen in mɛ̀ dúk nɛ̀ de taamɔ. O ŋma bíí mbo zu tɛ́ wen'i na, ɓɛɛ kɔ̧ɔ̧ɗɔɔwen kɔ-wa bin yì. 20Himenee in Alɛkzandrɛ a̧a̧ mgbara o wi nɔ‘i; mi ee wa er Satan wen ká wa tɛ́ɛ̀ duk tɛ ɗaŋa nin Sɔ̧ siti.
Currently Selected:
1 TIMOTEE 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.