2 Makabee 15
15
Nikanɔr ɗaŋa nin-Sɔ̧
1Nikanɔr zia'e Judas in o bíí kɔ‘i a̧-a̧ sɛn nu Samarii, ɓɛɛ a̧ e zu-a mɛ tik wa nɛ biro gee tɛ wese-ɔmtɛ. 2O Juif, nɛ ndak so pata a̧ nɛ doole, tɔ̧ɔ̧ ha̧ a̧: «Ká mɛ de gasa saka-yí in zɔm ɗáŋ gbɛ nɛ wa na. Mɛ tu̧ be-tɛ wese nɛ Wi nɛ kɔr mɔ lɛŋ de nɛ sa̧-a̧ wese gan.» 3Ɓɛɛ yaa-ɗaŋ wigbɛzu'i ak mɔ kà ŋma wan nɛ boo yiwese nɛ tɔ̧ɔ̧‘e wi gasi nɛ wese ɔmtɛ 4O be-Juif kifa ha̧ a̧‘e: «Nɛ́ Gasa Wan nɛ duk kpasa nɛ ɔ wan yiwese, nɛ zu, a ha̧nú‘e wi zɔk mɔɔrɔ-ɗoŋ-yiitoo ɔɔ-zɛ nɛ sa̧-a̧.» 5Ɓɛɛ Nikanɔr kifi nú: «Mi nɛ zu'm mbɛt, mi nɛ wan mɛ zu nù hɛ̧ɛ̧, ɓɛɛ mi há̧á̧ nu'm'e wa kai o boi-biro mɛ de tom ha̧ wannu.» Bɛɛ a̧ kpa be-yuwar dea ɗaŋ tom-gbɛzu n'aa ee zu-a'i na.
Judas ha̧nɔɔŋgiɗi ha̧ o gbama-wibiro kɔ‘i
6Nikanɔr duka tɛ kɔn nɛ ŋguɗi, ɓɛɛ tɔ̧‘e: wi tɛ kai o boi-biro oi Judas in o bii kɔ̧-a̧ de nɛ ŋma mɔ-sedaako gbina biro'i sɛn beegara-ye. 7Ee-ta ko Makabee nɛ Sɔ̧ kaɗi na, A̧ iŋa nɛ dea'e Gasa Wan tɛ tɛ̀ɛ́ gbak a̧. 8Nɛ́ hegɔ, sa a̧ ha̧ nɔɔŋgiɗi ha̧ o bíí kɔ̧-a̧‘e: ká kíí gboo biro nɛ o wi-nɛ-iŋ-Sɔ̧-na ba tɛnɛ‘i de wa na; te-wa a mbaŋ ɗoŋ gbakamɔ nɛ tɛa so ha̧ wa nɛ yiwese nɛti, ɓɛɛ wa'a iŋ nɛ dea'e: kinii Wan nɛ a̧-a̧ nɛ ŋgaiamɔ lɛŋ tɛ gbaka̧ wa mɛ gbin biro woyo. 9A̧ tɔra mɔ nɛ yɔra zaŋ heembea in zaŋ kalata ko o witɔ̧wen oi nú-Sɔ̧, ha̧ nɛ nɔɔŋgiɗi ha̧ wa; ɓɛɛ a̧ mbaŋ tɛ-wa zu o biro nɛ wa gbina so nɛti, ha̧ nɛ nyɔŋa-nin ha̧ wa. 10Ɗoŋ n'aa ha̧mbe ŋgai ha̧ wa kaɗi, ha̧ wen kɔ̧-a̧‘i mɛ diti gan, a̧ usa ha̧ wa'e: o wi-iŋ-Sɔ̧-na yor ɗoŋ wen kɔ-wa na, wa kasi kanamɔ kɔ-wa na mbɛt. 11Judas ha̧mɔɔ-gbak-gbina ɓiro ha̧ o bíí kɔ̧-a̧ kpɔk kpɔk, bó nɛ o sɛ́ɛ̀ in o ŋgeé ɓɛɛ na, batɛ, nɛ́ o de wen n'a̧-a̧ tɔ̧ɔ̧ ha̧ nɛ nɔɔŋgiɗi ha̧ wa. Sɔŋkur-aa, a̧ wee ɗɔŋ ŋma hɔɔzu nɛ‘i nyɛma mɛ kasi ha̧ wa; nɛ́ ŋma hɔɔzu nɛ pí̧í̧ tɔrtɛ tɛ-wa lɛŋ. 12Hɔɔzu kɔ̧-a̧‘i nɛ́ mɔ'ɔ: «Onias gasa wan-ɗafi-sɔ̧ nɛti ɓeemɛ, nɛ duka nɛ de bíí, nɛ ŋmaŋ tɛ na, ga̧-a̧wi nɛ tɔ̧ wen nɛ yuwar-a, ɓɛɛ nɛ ha̧tɛ, dika nɛ bem, mɛ de nɛ demɔ lɛŋ, nyɛia̧ er kɔfi nɛ Sɔ̧ wen dukbíí Juif lɛŋ. 13Hɔɗoŋ-aa, Judas zɔka ŋma tu̧u̧tɛ bíí, nɛ mbui zu mbɛt. Nɛ́ ŋma zɔm mgbɛkɛkɛ bíí nɛ nyɛma yi wan, ɓɛɛ nɛ gasi kɔ̧-a̧ gɔn nɛ ɗɛɗɛ-bíí. 14Onias baa wen, ɓɛɛ tɔ̧: «Wi’ɛi nɛ́ Jeremii, witɔ̧wen oi nú-Sɔ̧, nɛ kɔ̧ɔ̧ o nya kɔ̧-a̧, ɓɛɛ nɛ kɔfi Sɔ̧ wen dukbii in wen Sa̧a̧-Yé nyɛmna.» 15Jeremii nyɛia̧ er mɛ wiiko ha̧ nɛ gbapaa nɛ‘i dee nɛ lɔr ha̧ Judas, ɓɛɛ tɔ̧ ha̧ a̧: 16«mɛ bá sa̧-a̧ gbapaa’ɛ, nɛ́ Sɔ̧ ha̧ ha̧ mɛ; a̧ tɛ gbak mɛ wen ɗɛnaa nɛ o wisɛn.»
Tikaa in fio ko Nikanɔr
(1 Mak 7.39-50)
17O nyɔɔ̧-wen ko Judas ga̧-a̧ see o wibiro kɔ̧-a̧, ha̧ nɛ nɔɔŋgiɗi ha̧ wa, ɓɛɛ de ha̧ o be- ŋgaiwi mɛ de nɛ mɔɔ-wiwii. Hegɔ, wa baa keta'e ká‘i de gbagari na, wi yak biro nɛ hayatɛ ɓɛɛ wi nɛ̀ɛ́ bi ŋmaa nɛ ŋgaitɛ-wi lɛŋ. Wen ɗaŋmɔ nasi nɛ yé Jerusalɛm, yuwar-ɗafasɔ̧, in Tua ko Sɔ̧ tɛnɛ‘i. 18Kíí kɔ-wa be so wen o kóò, o bem, o nya-wa in o nàm kɔ-wa gan na, kuti kíí kɔ-wa gan batɛ nɛ́ wen Sa̧-a̧ Tua ko Sɔ̧. 19Dita-see ko o wi nɛ wa ee so ɓɔn saaye Jerusalɛm bo nɛ geɗɛk mɔ na, wen ɗɛɗɛ-wa gɔn so gɔn zu biro nɛ gɛk tɛnɛ nɛ gee pɛtɛŋ-fara'i. 20Bíí lɛŋ ya so tɛ zɛma mɔ nɛ tɛ hɔ. O wisɛn mɔi̧a̧ kɔ‘i ŋmaa lɛŋ, ɓɛɛ wa ya zɛ́k-zɛ́k zɛm nɛ biro. Wa aa o fɔrɔ sɛn de fara, ɓɛɛ wa nɛk o nyaŋa nɛ mgbɔɔr nɛ mgbɔɔr. 21Makabee mbaɗa gba gíí-wibiro nɛ ya ti a fee, o yaayí boi-biro kɔ-wa nɛtɛ nɛtɛ‘i, in o fɔrɔ nɛ pɛ da̧. A̧ nyɛia̧ er-a sí Yiwese, ɓɛɛ a̧ kɔfi Gasa Wan, Wi-de-mɔɔ-gɔn-ɗɛɗɛ, wen a̧ iŋa'e bo nɛ tɛ o boi-biro a Sɔ̧ e nɛnɛ ha̧‘i mɛ gbin biro na, ɓɛɛ nɛ́ nɛ ɗoŋ ee-zu-mɔ kɔ̧-A̧ wen o bíí nɛ nyɛma yi-A. 22Judas kɔfa Sɔ̧ hee mɔ'ɔ ga: «Gasa Wan, ŋgimbi nɛ Ezekias ɔɔ so nɛ wannu Judéé, Ɛnɛ toma so betom k’ɛ́nɛ́ nɛnɛ, ɓɛɛ a̧ kum bíí booro-gɔmŋmaa nɛ bíí booro ɓu-mɔɔrɔ-ɗoŋ-taar-zua-mɔɔrɔ, mgbara o wibiro ko Sɛnakɛrib. 23Kinii mbɛt, Gasa Wan mɛ Yiwese, Ɛnɛ tóm ŋma de betom k’Ɛ́nɛ́ tɛnɛ ti yɛ, ha̧ a̧ pi̧ bele in gba-kíí poo o wi nɔ'ɔ. 24Ken-er-‘Nɛ́ a tik zu o wi nɛ tɛ̀ɛ́ tɔ̧ ndiŋ wen h’Ɛ́nɛ́, ká bá nɛ biro kpa nɛ sa̧-a̧ dukbíí k’Ɛ́nɛ́‘i.» Nɛ́ hegɔ a̧ Judas kaɗa kɔfasɔ̧ kɔ̧-a̧. 25Nikanɔr in o bíí kɔ‘i dɔma nɛ o mbia gai nɛ gima-biro nɛnɛ. 26Judas in o bíí kɔ‘i bo gɔm nɛ er kɔfi nɛ Sɔ̧, tik o wisɛn. 27Tɛ kɔfa Sɔ̧ nɛ kɔ̧ see, de nɛ biro nɛ er, wa tira o bíí a nu gan gan booro-ɓu-taar-zua mɔɔrɔ, ɓɛɛ wa hɔ zaŋgule wen zu gasamɔ nɛ Sɔ̧ dee zu wa'i. 28Biro kaɗa, hee mɔ'ɔ nɛ wa pɛsi nɛ desee ga, wa kpa yí wɔr Nikanɔr mbɔɗɔnu, nɛ oi o boi-biro kɔ̧-a̧ tɛ-a. 29Ɗɔɔ yili in o hiɗimɔ ŋgúr-ŋgúr, wa dee osoko ha̧ Gasa Wan, nɛ mgbak nú ko o zɔmdáà kɔ-wa. 30Judas nɛ duka so ti bi nɛ biro wen zu o be-nù kɔ‘i, nɛ ŋgaitɛ lɛŋ in nɛ nɔɔ-see, ɓɛɛ nɛ ɓɔna nɛ de taamɔ zu dukbíí kɔ‘i dika nɛ ŋgaiwi, ha̧nú wa'a bír gɔɔzu Nikanɔr in ɓáá-a̧ nɛ oi-aa lɛŋ, a wa kai si Jerusalɛm. 31A̧ hɔ hi̧i̧, ɓɛɛ a̧ saa o wi-saaye, a̧ nɛk o wiɗafisɔ̧ ti taŋge-ɗafisɔ̧, a̧ tom sa o wi kɔ̧ ŋgárá. 32A̧ usa gɔɔzu Nikanɔr, ɗaŋ geé-tum-bíí‘i, in er nɛ yaa-ɗaŋ‘i kɔna so nɛ ŋguɗi, nyɛi̧ nɛnɛ sitɛ Sa̧-a̧ Tua ko Wan nɛ a̧-a̧ nɛ ŋgaiamɔ lɛŋ. 33A̧ ɓira leɓe-Nikanɔr, ɗaŋ bíí‘i, sɛkɛɗɛ-sɛkɛɗɛ, ɓɛɛ a̧ tɔ̧‘e wa'a a taŋ ha̧ o nɔi̧. A̧ gai̧a ɓáá-Nikanɔr nɛ duk nɛ mɔɔ-oi-dawa kɔ̧-a̧ sɛn nú Tua ko Gasa Wan. 34Wa lɛŋ, wa gaia osoko si Yiwese ha̧ Gasa Wan nɛ a̧-a̧ nɛ gasamɔ lɛŋ, tɔ̧ nɛnɛ‘e: «De zɔnamɔ ha̧ Wi nɛ yora zu Sa̧a̧-Fara kɔ‘i, ŋma ndiŋmɔ ndɔ na'i.» 35Judas gai̧a gɔɔzu-Nikanɔr tɛ ŋgɛŋ-ŋgárá, ha̧ o bíí mɛ zɔk nɛ sa̧-a̧ hee mɔ nɛ Gasa Wan ye nɛ ɗoŋ bíí kɔ‘i ga. 36Wa kpɛka lɛŋ‘e ka'i de zɛŋ mɛ er wese'i wɔkɔrɔ na. Wi tɛ de gbaŋa-a dam ɗoŋ pɛ lɛŋ tɛ ɓu-zua-taar ɔɔzɛ ko ɓu-zua-yiitoo fiozɛ, nɛ‘i sa nɛ nú Arameɛn'e Adar, zɛ kpɔk nɛti ha̧ wese nɛ‘i sa'e: wese ko Mardochée.
Sɔŋkur wen ko wi-yɔr-kalatɛ'ɛ
37Mɔ nɛ yaka zu Nikanɔr nɛ́ mɔ‘i. Hee mɔ'ɔ nɛ Jerusalɛm ɓɔna er o be-Juif dika ŋgimbi'i ga, mi mbɛt, mi tɛ kaɗi yɔramɔ kɔ‘m sɛn hɛ̧ɛ̧. 38Kà mɔ n'am yora'i nɛ ɔ déé, in kà a̧ nɛ hɔɔ gba̧a̧, mɔ n'am kɔ̧a̧ so nɛ́ mɔ‘i. Ɓɛɛ kà gbaa-mɔ kɔ̧-a̧ nɛ boa batɛ na, in kà a̧ nɛ duka hega taŋ hi̧i̧, war kɔ‘m n'am nyɛma so mɛ de gan í̧í̧ na. 39Nɔɔ mbiɗa-dɔ̧ɔ̧ ɛnɛ, kóó nɔɔ gee yì ɛnɛ, de na, ɓɛɛ nɛ́ dɔ̧ɔ̧ nɛ zaŋa ŋmaa in yì a duk nɛ gba demɔɔ-nɔɔ nɛ pi̧ tortɛ tɛ wi. Hegɔ mbɛt, nɛ́ yuwar aa o nyɛrɛmɔ nɛ dea a̧ de ha̧ wa mɛ ɔ nyɔɔ̧ kɔ̧ zer o wi nɛ tɔr wa. Ɓɛɛ wen kɔ‘m kaɗa hɛ̧ɛ̧.
Currently Selected:
2 Makabee 15: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.