Jacques 1
1
Dep pa ged’a
1Ni an Jacques, azongâ hAlonina, ma hi Salad’a Jesus Christ-sâ mi. An nga ni gagi agi andjaf suma hAlona suma dogo yam mbà suma a b’rau woi kur duniyad’a petna depa.
He gagazid’a ki ned’a
2B’oziyona, kuk ka lara ge pet ta nga d’i kugugid’a, agi golot ni d’igi vama furîd’a na, 3kayam agi wagiya, kuk ka nga d’i kuk he gagazi magid’id’a, nga d’i zud’ugi á ve tad’a. 4Ar ve ta magid’a ti le sun nda djivid’a pet, kayam agi ndagagi memet yam ahlena pet, ar va kid’agagi d’uo mi. 5Wani le sana adigagi mi kid’ak ned’a ni, ar mi tchen Alona. Alona mba mi humziya, kayam Alona nga mi he mi suma pet hawa bei ngopa. 6Wani mbeî mi tchen ni ki he gagazid’a bei gigrita ba, kayam sama le gigritna mi hle tamî d’igi abilâ halum ma ngol ma simetna nga mi tcham tata na na. 7Sama hina na, ar mi djib’er ala mam mba mi fe va abo Salad’a na d’i, 8kayam mam mi sama hurum mbàmbàna, ni sama djib’er mamba afefetna mi.
Houd’a ki ndjondjoîd’a
9Ar wiyei ma houd’a mi subur tam yam hle d’a Alona mi hlum yam akulod’a. 10Ar wiyei ma ndjondjoîna mi subur tam yam hulong nga Alona mi hulongôm yam kä d’a, kayam ahle mam suma ndjondjoîna a mba kal lei d’igi b’od’a hasunid’a na. 11Kayam afata ti deyâ, ayât mi nde kä, asuna mi so woyo, b’o mamba ti yak keyo, djif mama mi dap pei mi. Sama ndjondjoîna mba mi wal lei kahle mama ni hina mi.
Hlad’ud’a ki kuk ka tetenga
12Sama ve tam ad’enga kur kukina, mi le furîd’a ata yima mi ve tam ad’enga kur kuk mambina, mba mi fe avaval la bei b’lak ka Salad’a mi hle vunam kat mi suma a nga le kamid’a. 13Ata yima sana mi nga kur kukina, ar mi dala: nAlona ba, mi kugunu d’i, kayam tchod’a ndak á kuk Alona d’i. Mam tamba mi ndak á kuk sa d’uo mi. 14Wani sama lara pî, ata yima d’od’oka hi hliwimba ti kal kama, djib’er mam mba tchod’a ti vum ki dauna. 15Ata yima d’od’ok ka tchod’a ti ve wirîna, ti vut ni tchod’a. Le tchod’a ti djeng wa ni, ti vut ni matna.
16B’oziyon suma an le kagi heîna, agi lobogi tagi d’i. 17He d’a hawa d’a djivid’a ki he d’a hawa d’a ndak memeta pet a tcholï nakulo abo Alo ma le b’od’ina, ni ma bei mbuta ba ma anguzam nga d’i pret tuo mi na. 18Kur min mamba mi hei arid’a yam zla mam mba gagazid’a, kayam ei mbud’i suma avo’â hahle suma mam lazina pet.
Humba ki sun nda led’a kata
19B’oziyon suma an le kagi heîna, agi wagi djiviya. Ar nge nge pî mi hum zlad’a atogo, wani mi le lilinga á ded’a. Ar mi mbut ayîna atogo zak kuo mi, 20kayam ayîna hi sanina nga mi le vama d’ingêrâ avok Alona d’i. 21Kayam ndata, agi aragi ahle suma ndjendjed’a ki sun nda tchod’a pet teyo. Agi vagi zla d’a Alona d’a a zaragizi kurugid’a ki lulumad’a, ni d’a ndak á sud’ugid’a.
22Wani agi lagi sunda yam zlad’a hAlona d’a a dagizid’a, ar agi lobogi tagi á humba hawa go d’i. 23Kayam sama hum zlad’a nga mi le sunda kat tuo na, mi hle tamî d’igi sama gol tam kur kotromina na. 24Ata yima mi gol tama, mi ge tam mi iya. Ata yi máma na wat, mi mara mam mi nana ge? 25Le sama gol gat ta ndak memet ta pad’ei woi kur magombid’a, le nga mi le sunda kad’u, le mi ni sama humut nga mi marat tuo wani mi ni sama le sunda katna ni, sa máma, Alona mba mi b’e vunam kam kur sun mam mba led’a.
26Le sama ding djib’er ala mam he gagazid’a yam Alona, wani le nga mi ngom sinam mbuo ni, mi lop mi tamu, he gagazi mam mba yam Alonid’a ni hawa. 27He gagazi d’a irat ta memet ta avok Alona Abuid’a ba wana: Mi i d’u suma hokuyod’a ki suma modonod’a kur ndak mazid’a, mi gol tam ped’et ki tchod’a hi duniyad’id’a mi.
Currently Selected:
Jacques 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.