Jacques 2
2
Agi kagi ir sa d’i
1B’oziyona, agi suma hagi gagazid’a yam Saleina Jesus Christ ma suburina, agi kagi ir sa d’i. 2Kayam le sama ding mba kur tok magid’a ki ngangam ma lora abom ki baru ma djivi ma kal teglesâ atamu, le sama houd’a mba ki baru ma ndjondjorona atam mi, 3le agi hagi ngola mi ma tchuk baru ma djivi ma kal teglesâ agi dum ala: Ang mbeï kak ata yima hud’a, wani agi dagi mi ma houd’a ala: Ang tchol hina djang, d’oze, Ang mbeï kak kä asenu ni, 4agi kagi ni ir tagi d’uo zu? Agi mbud’ugi ni suma ka sariyad’a kur djib’er ra tchod’ina.
5B’oziyon suma an le kagi heîna, agi humugiya. Alona mi man suma hou suma kur duniyad’a ka hina á mbud’uzi suma ndjondjoîna yam gagazi d’a hed’a, kayam azi kal kur leu d’a mam hle vunam kat mi suma a nga le kama. 6Wani agi nga gologi ma houd’a is. Ni suma ndjondjoîna ba, a b’at ahlena abogi d’uo zu? Ni azi ba, a nga igi avok suma ka sariyad’a d’uo zu? 7Ni azi ba, a nga ngul simi ma djivi ma Alona mi tinigizina d’uo zu?
8Gagazi, le agi nga tid’igi yam vun ma hed’a hamulîna memet d’igi vun ma he máma mi de na ala: Ang le yam ndrangâ d’igi ang tanga na ni, agi lagi djiviya. 9Wani le agi nga kagi ir suma ni, agi lagi ni tchod’a. Gata nga d’i kagi sariyad’a kagi kayam agi gagi nga yagi kä ad’ut ti. 10Sama lara pî le mi ngom vun ma hed’a hi gatina pet, wani mi tchila yam ma tuna ni, zlad’a nga d’i vum kazi pet. 11Ni mam tam ma dala: Ang le mizeuna d’uo na ba, mi de kua ala: Ang tchi sa d’i. Le ang le nga mizeuna d’i, wani ang le tchi matna ni, ang mbut ni sama tchila yam gata. 12Agi dagi zlad’a, agi lagi d’igi suma a ka sariyad’a ata minda hi gat ta pad’ei woid’a na mi. 13Sama we nga hohowa ndrama d’uo na, fata Alona mi kam sariyad’a kamba, mba mi wum hohowom mbuo mi. Wani we hohoud’a ti kus yam sariya d’a kad’a.
He gagazid’a ki sun nda led’a
14B’oziyona, le sana mi dala mam he gagazid’a, wani sun mata le nga d’uo ni, djivi mata ni me ge? He gagazi ndata ti ndak á sud’um zu? 15Le wiyeina d’oze wiyeid’a nga mi tit gandilad’a, a nga ki vama te d’uo mi ni, 16le sana adigagi mi dazi ala: Agi i lafiya! Agi i hologi akud’a! Agi hobogiya! wani le agi hazi nga vama ndjunuzina d’uo ni, djivi mata ni me ge? 17Hina mi, he gagazi d’a bei sunuta ni matna.
18Wani sama dingâ mba mi dala: Ang nga ki he gagazid’a, wani an nga ki sunda. Ata yi máma, an mba ni hulong dum ala: Ang tagan he gagazi mang nga bei sunuta, wani sun manda mba d’i tagang he gagazi manda. 19Ang he gagazid’a ala Alona ni tu nata yad’u. Muzuk ma tchona pî mi he gagazid’a hina mi, nga mi zlak ki mandarâ mi. 20Ang ma lilid’a, ang we nga ala he gagazi d’a bei sunuta ni hawa d’uo zu? 21Ni kayam sunda ba, abui ngolo Abraham mi mbut sama d’ingêrâ avok Alona nata yima mi he goroma Isak vama ngat buzunina d’uo zu? 22Ang gola! He gagazi mamba ti le sunda ki sun mamba. He gagazi mamba ti ndak memet ni yam sun nda mi lata. 23Hina na ndak vun mbaktumba hAlona d’a ti dala: Abraham mi he gagazid’a yam Alona; ni kayam ndata ba, Alona mi ndumum sama d’ingêrâ avoromu, mi yum ala Banama. 24Agi wagi ala sana mi mbut d’ingêr avok Alona ni yam sun nda mi lata, nga ni yam he gagazid’a hol li.
25Ni hina ba, Rahap atcha d’a gaulangâ, ti mbut d’ingêr avok Alona ni yam sun nda ti lat ata yima ti ve suma a sunuzina avo hatat ti tinizi kur lovot ta dingid’a mi d’uo zu? 26Le sana nga mi muzuk kuo ni, mi ni matna. Hina mi, he gagazi d’a bei sunuta ni matna.
Currently Selected:
Jacques 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.