Daniel 1
1
DANIEL AZI KI BUNIYÔMA
(1—6)
Daniel azi ki buniyôma avo Babilon
1Kur biza d’a hindi d’a Jojakim nga mi tamula yam suma Juda-nid’a, Nebukanezar amul ma Babilon-na mi mba á dur Jerusalem, mi nguyud’u. 2Salad’a mi he Jojakim abo Nebukanezar, mi bongôm lovota á yo ahle suma a nga kur gong nga kud’ora hAlonid’ina nde. Mi yo suma dingâ magomba, mi izi kur ambas sa Babilon-nda, mi tchuk ahle suma mi yozï hurumbina kur gong nga ngom ahlena kur gong nga kud’ora halo mamid’a.
3Amul ma Babilon-na mi he vuna mi ma ngolâ hazungeî mamina Aspenas ala mi man azungeî suma Israel suma ad’u andjaf ma amula d’oze suma ad’u andjafâ hi suma nglonina nde. 4Nala, azungeî suma bei daka ba na, suma djif suma oîd’a ki ned’a ki wed’a ki wad’ud’ina, suma a ndak á le sunda kur gong nga amula, suma a ndak á hat vun Babilon-na ki lovot ta b’irimba mi na. 5Amulâ mi he vuna ala a hazi te ma mam tuma ki süm guguzlu d’a mam tchata burâ ki burâ gak bizad’a hindi. Bugol biza ndata azi mba kal kur sun mam mba led’a. 6Azungeî suma Juda suma a manazina ni Daniel, Hananiya, Misayel ki Azariya mi. 7Ma ngolâ hazungeîna hamulîna mi tinizi simi ma dingâ. Mi yi Daniel ala Beltasar, mi yi Hananiya ala Sadrak, mi yi Misayel ala Mesak, mi yi Azariya ala Aben-Nego mi.
8Daniel mi nga hurum ala mi min mbut tam ndjendjed’a ki tena ki süm ma tched’a hamulîna d’i. Kayam ndata, mi tchen ma ngolâ hazungeîna hamulîna ala mi lum kad’enga á mbut tam ndjendjed’a ki tena ki süm ma tche máma d’i. 9Yam ad’enga hAlonid’a, ma ngolâ hazungeîna hamulîna mi hum tchenda hi Daniel-la ki minda ki we hohoud’a. 10Wani mi hulong dum ala: An le ni mandara amulâ, kayam mam he vuna yam te magina ki tche magid’a ni mamu. Le mi fagi d’orâ d’igi azungeî suma ding suma bizagi tuna na d’uo ni, mba mi tchanu.
11Kayam ndata, Daniel mi de mi ma sun ma ma ngolâ hazungeîna hamulâ ma mi tinim á ngom Daniel ki Hananiya ki Misayel ki Azariya na ala: 12Ar ang kugumi ami azungeî mangâ, ang hami hum ahlena á ted’a ki mbina á tched’a gak burâ dogo. 13Bugola, ang golomi irami ki d’a hazungeî suma a te tena hamulîna. Hina wani, ang mba le vama ang mba wuma ki sed’emiya.
14Sa máma mi ve zlad’a hi Daniel-la, mi kuguzi ndak burâ dogo. 15Bugol bur ma dogona, irazi d’i mbut vat zenen kal azungeîna pet suma a nga te tena hamulîna, a d’or kalazi mi. 16Tin ad’ud’a kur bur máma mi yo tena ki süm guguzlu mazid’a woyo, wani mi hazi ni hum ahlena á ted’a gogo.
17Alona mi he wad’ud’a ki wed’a ngola kur hata ki ned’a mazungeî suma fid’i ndazina. Daniel nga mi vad’ud’a yam ahle suma nde ir sumina kadï d’a ded’a woi mi.
18Kid’a biza d’a amulâ ngata ndak dad’a, ma ngolâ hazungeîna hamulîna mi mba kazungeî ndazina pet avok amulâ. 19Amulâ mi yo siretna ki sed’eziya. Wani adigazi pet azong ma ding ma ndak d’igi Daniel ki Hananiya ki Misayel ki Azariya na na nga d’i. Kayam ndata, mi tinizi á lum sunda. 20Ata yima amulâ mi djobozi ad’ud’a yam hat ta lara ge d’a yam ned’a ki wed’id’a, nga mi fe hum mba azi hulongômzid’a kal hum mba suma mbuta ki suma a djop ki tchitchiud’a suma kur leu mamba petna a hulongômzid’a yazi dogo.
21Daniel mi le sunda mamuleina gak mba kur biza d’a avok ka Sirus nga mi tamulid’a.
Currently Selected:
Daniel 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.