Daniel 2
2
Adï d’a de Nebukanezar avoka
1Kur biza d’a mbà d’a Nebukanezar nga mi tamulid’a, adïd’a dumu. Djib’er mamba b’lak ngola, nga mi fe lovota á bur sena d’i. 2Amulâ mi ge sunda mi yi suma mbuta, suma a djop ki tchitchiud’ina, suma kumana ki suma a djop ki suma azuleinina, kayam azi vum ad’u adï mamba woyo. Azi a mba, a i gevemu. 3Amulâ mi dazi ala: Adïd’a danu. Djib’er manda b’laga. Ni kayam ndata ba, an min ala agi van ad’u adï d’a danda woyo.
4Suma kumana a hulong de mamulâ ki vun Aram-ma ala: Amulâ, ar va mi lang ngi! Ang dami adï d’a danga, ami mba vangzi ad’ud’u!
5Amulâ mi hulong dazi ala: Vama an hle vuna kama ba wana: Le agi dandi nga woi yam adï d’a danda, agi vandji nga ad’ut tei d’uo mi ni, a mba kizagagi woyo, aziyagi mba mi mbut ni mola hi djimgilîd’a mi. 6Wani le agi dandi woi yam adï d’a danda, agi vandji ad’ut tei mi ni, an mba ni hagi he d’a hawad’a ngola, mba ni suburugi mi. Kayam ndata, agi dandi adï d’a danda, agi vandji ad’ut tei mi!
7A hulong dum yazi á mbàd’a ala: Amulâ, ar ang dami ami azungeî mangâ adï d’a danga tua ba, ami mba vangzi ad’ut tua mi!
8Amulâ mi hulong dazi ala: An we gagazi, agi min fagi ni yina, kayam agi wagi ala an hle wa vunan da’. 9Wani le agi dandi nga woi yam adï d’a danda d’uo ni, sariya d’a ka ndata mba d’i vagi agi pet. Agi nga ndjagagi ni vunagi á dan zla d’a kad’a ki zla d’a mbut ira tala yam zlad’a ti mbut kä d’a. Kayam ndata, agi dandi woi yam adï d’a danda. Hina wani, an mba ni wala agi ndak á van ad’ut tei mi.
10Azi hulong dum ala: Amulâ, sama yam andagad’a ka hî ma mi ndak á de vama ang dum wa na nga d’i. Amul ma ding ma ngolâ d’oze amul ma ad’eng ma mi djop andjaf vama hina na ata suma mbuta ata suma a djop ki tchitchiud’ina ata suma a djop ki suma azuleinina nga d’uo mi. 11Amulâ, zla d’a ang djobomi kata, tad’enga heî. Sama ndak á hulongông humba katna nga d’i. Nalo ma yam ma kaka nga aduk suma yam andagad’a ka hî d’uo na ba, mi ndak á hulongông humba ni mamu.
12Kayam ndata, amulâ mi tchol kayî ma ngolâ kaziya, mi he vuna ala a tchi suma ne suma kur Babilon-na woi pet! 13A nga tchi wala yam sariya d’a kad’a ala a tchi suma ned’a woyo d’a, a nga hal Daniel azi ki buniyôma á tchazi woi mi.
Alona mi tak adï d’a damulîd’a woi mi Daniel
14Ata yi máma Daniel mi i mi fe Ariyok ma ngolâ hi azigar suma ndjola hamulâ ma mi ndeï woi abu á tchi suma ne suma kur Babilon-na woina, 15mi djobom zlad’a ki lemba ki ned’a ala: Ni kayam me ba, sariya d’a kad’a hamulîd’a tad’enga hina djeî ge? Ata yi máma Ariyok mi väd’u zla ndata woi mi Daniel. 16Atogo hina zak Daniel mi i gen amulâ, mi tchenem ala mi aram yina nde, kayam mi fe lovota á vum ad’ud’a yam adï d’a dumba.
17Daniel mi hulong avo hatamu, mi väd’u zla ndata mi buniyôma Hananiya, Misayel ki Azariya, 18mi tchenezi á tchen Alo ma sä akulona yam suma mamba tala mi wazi hohowozi mi tagazi adï d’a gumun ndata, kayam a tchazi woi zlapa ki suma ne suma ding suma kur Babilon-na d’uo d’a.
19Kur andjeged’a Alona mi tak Daniel vama gumun máma kur vama nde tam mbei irama. Ata yi máma Daniel mi le Alo ma sä akulona mersi,
20mi dala:
Ar ei lei mersi mAlona kur atchogoi d’a lara ge pet!
Kayam ned’a kad’enga a tcholï natamu!
21Ni ma nga mi mbut atchogoid’a kahle suma a nga le kurutna,
ni ma nga mi pat amuleina woi yam zlam mazi d’a amula,
nga mi tin suma dingâ blangâzina,
ni ma nga mi he ned’a mi suma ned’ina,
nga mi he wad’ud’a mi suma wad’ud’ina mi.
22Mam mi ma nga mi tak ahle suma mudurina
kahle suma a nga ngeid’ina woina.
Ni ma wahle suma a nga kur nduvundina,
ni ma nga kaka kur b’od’ina mi.
23Ang Alona habuyon ngolona,
an nga ni hang ngola,
an nga ni gileng
yam ned’a kad’enga suma ang handjina,
kayam ang tagan ad’u vama ami djobong kama,
ang ndami ad’u zla d’a gumunda hamulîd’a woi mi.
24Bugola, Daniel mi i gen Ariyok ma amulâ mi hum vuna á tchi suma ne suma kur Babilon-na woina, mi dum ala: Ar ang tchi suma ne suma kur Babilon-na woi d’i! Ang in gen amulâ! An mba ni vum ad’u adï d’a dumba woyo!
25Atogo hina zak Ariyok mi i ki Daniel gen amulâ, mi dum ala: Amulâ, aduk suma Juda suma a yozï magombina an fe sana tu ma mba mi vang ad’u adï d’a danga woina!
Vama tchet ma asem nga ad’enga d’uo na
26Amulâ mi de mi Daniel ma a yum ala Beltasar-râ ala: Na ni ang ndak á dan ndei yam adï d’a danda á vandji ad’ut tei mi zu?
27Daniel mi hulong dum ala: Amulâ, sama ned’a d’oze ma djop tchitchiud’a d’oze ma kumana d’oze ma mbuta ma ndak á väd’u vama gumun ma ang de zlad’a kam wana nga d’i. 28Wani Alo ma akulona ni ma nde ad’u ahle suma mudurina woi abuna. Ni mam ba, mba mi tagang ad’u ahle suma a mba le kur atchogoi d’a mba d’i mbad’ina. Adï d’a danga kahle suma a nde tazi woi irang yam azang mangîna ba wana: 29Amulâ, ata yima ang nga burâ yam azang mangîna, ang djib’er yam ahle suma a mba le kur atchogoi d’a mba d’i mbad’ina. Kayam ndata, mam ma mi ndäd’u ahle suma mudurina woina, mi tagangî ahle suma a mba mbana. 30Wani anu, a tagan ad’u adï d’a muduri ndata woi ni kayambala an kal suma dingâ ki ned’a ped’u d’a d’i, wani ná vang ad’u adï manga woi ná tagang djib’er ra kurunga woyo.
31Amulâ, ang gola, ang we vama tchet ma ngolâ tchola avorongû. Vama tchet máma mi kal ngola heî, nga mi wile wiwilik, á gola ni vama mandarâ mi. 32Yam vama tchet máma yamî lor ra bei zozota ba d’a. Didigam kabomî kawei ma hapma. Hurum kab’alamî kawei ma hleuna. 33Asemî kawei ma wurana, asem ma biyarâ kawei ma wurana abo tu, lubu ma ab’lorina abo tu mi. 34Ata yima ang gol vama tchet mámina, ahina d’a wal tat tei kahina d’a fiyak ka ked’iwureng nga bei sa tin abom atat ba d’a, ti mba d’i nde yam asem ma biyarâ hi vama tchet ma kaweina abo tu lubu ma ab’lorina abo tu mi na, ti tozi woi kikizek. 35Ata yi máma kawei ma wurana, lubu ma ab’lorina, kawei ma hleuna, kawei ma hapma ki lora zla tazi pet a mbut d’igi guguma na mi, simetna mi felezi woi d’igi suma a sir awuna kur ambid’a’â awali na, simetna mi i ki sed’ezi bei wazi yazi ma a i kuana ba. Wani ahina d’a ti nde yam vama a tchet mámid’a, ti mbut ahina d’a fiyak ka ked’iwurenga, ti oî yam andagad’a pet.
36Amulâ, wana nadï d’a danga. Ad’ut ta ved’a ba wana: 37Amulâ, angî ma kal amuleina petna! Alo ma sä akulona mi tining amula, mi hang ad’enga ki sib’ika ki subura mi. 38Mi hang suma kahle suma abageina kaluweina abongû. Ang te kazi pet mi. Gagazi, amulâ, ang tanga ni yam mba lor ndata!
39Amul ma dingâ mba mi tchol blogong á tamula, wani ad’engêm mba d’i ndak d’igi ang na d’i. Bugola, amul ma hindi mala ni kawei ma hleuna na mba mi tamula yam andagad’a pet. 40Amul ma fid’i ma ad’enga d’igi kawei ma wurana na na mba mi tchola. Mba mi to amulei suma avoroma woi kikizek d’igi kawei ma wurana mi to ahlena woi kikizek na mi. 41D’igi ang we asem ma biyarâ hi vama tcheta ki tchitchid’am lubu ma ab’lorina abo tu kawei ma wurana abo tu na, leu ndata mba d’i wal kä. Wani ang mba we vama dingâ kurut d’igi kawei ma wura ma ad’engâ na, kayam ang we kawei ma wurana gizeîd’a ki lubu ma ab’lorina. 42D’igi ang we tchitchid’asem vama tcheta abo tu kawei ma wurana abo tu lubu ma ab’lorina na, ni vama taka ala leu ndata abot tu mba mi tchol ad’enga, abot ma hina mba mi lamangeîd’a mi. 43D’igi ang we kawei ma wurana gizeîd’a ki lubu ma ab’lorina na, ni vama taka ala amuleina a mba djin vunazi á zlap ata taziya, wani a mba zlap ata tazi d’i, d’igi kawei ma wurana nga mi zlap ki lubu ma ab’lorina d’uo na mi.
44Kur atchogoid’a hamulei ndazinid’a, Alo ma sä akulona mba mi tin leu d’a ding nga a mba b’lagat tei d’uo d’a. Andjaf suma dingâ a mba te kat ti. Leu ndata mba d’i to leu mazi ndata woi kikizek, ti mbud’ut vama hawana, wani ndat tata mba d’i ar kaka gak didin. 45Ang we ahina d’a wal tat tei kahina d’a fiyak ka ked’iwureng nga bei sa mi tin abom atat ba d’a ti to kawei ma wurana, kawei ma hleuna, lubu ma ab’lorina, kawei ma hapma ki lora woi kikizeka. Alo ma ngol ma kal teglesâ mi tagangî ahle suma a mba le blogongâ. Adï d’a danga ni vama ndum mbei ma gagazina, ad’ut ta an vangzid’a ni zla d’a ang tin hurung kata mi.
46Ata yi máma amulâ Nebukanezar mi grif kä andaga avok Daniel, mi kud’uromu, mi he vuna ala a hum he d’a hawa d’a ngala ki mbul ma his ma afufuîna mi.
47Bugola, amulâ mi de mi Daniel ala: Gagazi, Alo mangâ nAlo ma kal alona petna, mam mi Salad’a hamuleina mi. Ni ma ndäd’u zla d’a mudurid’a woina. Kayam ndata, ang fad’enga, ang tagan ad’u zla d’a muduri ndata woi wana.
48Bugola, amulâ mi he ngola mi Daniel, mi hum he d’a hawa d’a ablau d’a ndjondjoîd’a mi, mi tinim á te yam andaga d’a Babilon nda pet ta azì ma ngolâ kuad’a, mi tinim ma ngolâ yam suma ne suma avo Babilon-na pet mi. 49Kayam tchen nda Daniel mi tchenemba, amulâ mi he Sadrak, Mesak ki Aben-Nego sun nda te yamba kur andaga d’a Babilon-nda teteng mi. Wani Daniel mi arî ma de d’alâ kur azì mamula mi.
Currently Selected:
Daniel 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.