Rut 3
3
Rut ti bur kä andjege asem Bowas
1Bur tu Naomi ti de makunota Rut ala: Akunonda, djivid’a an halak mandjufâ kayam ndak kak ki furîd’a. 2Ndak wala Bowas ma ndak le sunda ki yugunei mamina nandjavamiya. Nga mi i fladege hî á to awu orsâ kur ambid’ak mama. 3Ndak tchola, ndak mbus tagu, ndak le mbul ma his ma afufuîna atagu, ndak tchuk baru mak ka djivid’a atagu, ndak i ad’um ata yima mam nga mi to awu orsâ kuana. Wani ndak nde tak kei iram mbi gak mi dap tena ki tched’a tua. 4Ata yima mi i bur kä na, ndak gol yima mi i bur kuana. Bugola, ndak i gevemu, ndak yo borogo ma asema akulo, ndak bur kä. Mam tamba mba mi dak vama ndak mba d’i luma.
5Rut ti hulong dat ala: An mba ni lahlena pet suma ndak dan kazina. 6Rut ti i kur ambid’a’â hi Bowas-sâ, ti lahlena pet suma akunota hat vuna kazina.
7Bowas mi te, mi tche, tam mbi lum djivid’a, mi i bur kä avun awu mam ma nga mola kä na. Rut ti mbeï lam lam, ti yo borogo ma asema akulo, ti bur kä. 8Kur andjege dangâlad’a Bowas mi nga akulo hayei, mi mbut iramu, mi watchad’a nga burâ kä asemu#3.8 burâ kä asemu: Nala, ti min ala mi vad’u..
9Mi djobot ala: Ni nge ge?
Ti hulong dum ala: Ni an wei manga Rut. An min ala ang geï abong kanu, kayam ang ndak á van djona.
10Bowas mi dat ala: Goronda, ar Ma didina mi b’e vunam kagu. Ndak tak djivi maka woi ngola, kal la ndak lat avoka, kayam ndak hal nga azungeî suma ndjondjoîna d’oze suma houd’a d’uo mi. 11Ki tchetchemba, ndak le mandar ri. An mba ni lak ahlena pet suma ndak ki djobon kazina, kayam suma hur azinina pet a wala nda’î atcha d’a irata. 12Gagazi, an ndak á vak djona, wani ma go ma kalan an á vak djonina, mi nga. 13Ndak bur kä; ndjivin yorogo ei mba weya. Le mi min vak djona ni, djiviya mi vagu; le mi min nduo ni, an da’î avok Ma didina, an mba ni vagu. Ndak bur kä to yorogo tua.
14Rut ti ar burâ kä gak tcha yorogo, wani ti tchol akulo ki yina kukurumuka á i avo, kayam Bowas mi min ala sa we d’ala ti tcholï ni gevem kur ambid’a’â d’a d’i. 15Mi dat ala: Ndak hanï baru d’a zlupa kaka, ndak vat tei djiviya. Ti vat teyo, mi hat awu orsâ kua, kal kilona dogo yam vahl, mi hlatchi kad’u. Ti hlumu, ti hulong avo.
16Rut ti mba gen akunota Naomi. Naomi ti djobot ala: Akunonda, ni nana ge?
Rut ti vat ad’u ahlena pet suma Bowas mi lazi ki sed’etna. 17Ti dat kua ala: Ni mam tamba, mi hanï awu orsâ kal kilona dogo yam vahl wana, mi dan ala an hulong gevek abon hawa d’i.
18Naomi ti dat ala: Akunonda, ndak kak tchugot djup á we dabid’a hi zla ndatid’a. Bowas mba mi dap zla ndata ini mbeî tua ba, mi tuk tamu.
Currently Selected:
Rut 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.