Rut 2
2
Rut ti i tchi helena kur asinena hi Bowas-sâ
1Naomi ti nga ki sama ngol ma ndjondjoî ma ad’u andjafâ hi ndjuvut Elimele’â; a yum ala Bowas.
2Bur tu, Rut ta Mowap-pa ti de mi Naomi ala: Ndak aran an i abagei tchi helena kur asinena hi sama hurum vana.
Naomi ti hulong dat ala: Akunonda, ndak iya.
3Rut ti iya, nga d’i tchi helena bugol suma zawuna, ti nde ni kur asinena hi Bowas ma ad’u andjafâ hi Elimele’îna.
4Bugola, Bowas mi tcholï Betelehem, mi mba mi de mi suma ze awuna ala: An gagi depa; ar Ma didina mi kak ki sed’egiya!
Azi hulong dum ala: Ar Ma didina mi b’e vunam kang mi!
5Bowas mi djop azong mam ma ngolâ hi suma zawunina ala: Atcha d’a gor ra wanda natchad’a hi nge ge?
6Mi hulong dum ala: Ni gor ra Mowap pa tcholï ki Naomi yam ambas sa Mowap-pid’a. 7Ti djobon ala: Agi aran an i filek awu ma ar bugol suma zed’ina; mba mat ta yorogo dei d’a, ti ni tchola akulo kaset hina, ti tuk tat ni hina nde wü d’a.
8Bowas mi de mi Rut ala: Goronda, ndak huma; ndak i tchi helena kur asine ma ding ngi. Ndak kak ka hî, ndak le sunda ki yugunei mana. 9Ndak gol suma ze awuna; yima azi ze kuana, ndak tchi helena blogoziya. Gola! An he vuna mazungeî mana ala ar sa mi dok ki. Le vunak so ni, ndak i tche mbiyo ma azungeîna a gulum kä kur agolongeînina.
10Rut ti grif kä andaga avok Bowas, ti dum ala: Ni nana ba, ang hurung van an atcha d’a angei d’a ad’u andjaf ma dingîd’a á wan hohowon hina ge?
11Bowas mi hulong dat ala: A van ad’u ahlena pet suma ndak lazi kakunoka bugol matna hi ndjuvu’îna. An we ndak ar abuk kasuk kambas sa a vud’uk kuad’a woi á mba kak kandjaf ma ndak wum nga yak tu d’uo na. 12Ar Ma didina mi wuragak yam djivi mak ka ndak lata; ar Ma didina Alona hi Israel ma ndak mba á ngei tak atama, mi wuragak ngola!
13Rut ti hulong dum ala: Salana, an nda ni ndak nga d’igi yugunei manga na d’uo d’a, ang wan hohowonu, ang b’lengên hurun ki zla mang nga ded’a mi. 14Kid’a lera tena ndaka, Bowas mi dat ala: Ndak mbeï te tena ki sed’emiya, ndak vavungôna, ndak nigim kä aduk süm ma azleîna të. Rut ti kak kä gen suma zawuna. Bowas mi hat awu ma haûd’a; ndat ti mud’a, ti hoba, ti ngom ad’um mba ar abota.
15Kid’a ti tchol akulo á tchi helenid’a, Bowas mi he vuna mazungeî mama ala: Agi arat ti tchi helena angra mbugulu d’a tchuka kä d’a, agi ngobot ti. 16Le agi djinigi mbugulud’a ni, agi arat awu ma dingâ kä ti yomu, wani agi ngobot ti.
17Ti tchi helena kur asinena hi Bowas-sâ gak tcha fladege, ti tomu, ti fawu orsâ kat ndak d’igi kilona dok mbà na. 18Ti hlum ti i ki sed’em avo, ti tagam makunota. Ti hat te ma mi arî abotna mi.
19Akunota ti djobot ala: Ndak tchï helena ini ni lara ge? Ndak le sunda nasine hi nge ge? Ar Alona mi b’e vunam yam sama mi wak hohowo’â.
Rut ti vad’ud’a makunota yam ahle suma a le ki sed’etna, ti dat ala: Sama an leï sunda asine hatama a yum ala Bowas.
20Naomi ti de makunota ala: Ar Ma didina mi b’e vunam yam Bowas! An wala Ma didina mi ar nga djivi mamba kei ei suma arid’ina woi d’uo d’igi mi lat ki suma a bona na. Bowas nandjaf ma tuna ki sed’emiya. Ni ma ndak á tami djomina.
21Rut ta Mowap-pa ti hulong de makunota kua ala: Mam mi dan ala an tchi helena bugol azungeî mama gak awuna mi dap zed’a tua.
22Naomi ti de mi Rut ala: Akunonda, djiviya, ndak i le sunda ki yugunei mama, ar ndak tchila kur asinena hi sama ding ba, mi lak tchod’a d’i. 23Rut ti ar tchi helena ki yuguneina hi Bowas-sâ gak a dap awu orsâ ki gemena zed’a pet. Ti nga kaka zlapa kakunota.
Currently Selected:
Rut 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.