Jacques 3
3
Zla d’a yam sindid’a
1B’oziyona, ar suma ablaud’a adigagi a min á mbut suma hat suma d’i, kayam agi wagiya, ei suma hat suma, a mba kei sariyad’a kei ngola kal suma dingâ. 2Kayam ei pet nga tchilei yam ahlena ngola. Le sana nga mi tchila yam ahlena kur zla mam mba ded’a d’uo ni, sa máma ni sama ndak memetna, mi ndak á ngom tam pet memet mi. 3Wani ei nga tchugi djamad’a avun akulumeina kayam azi humiya, kayam ei vazi kä mumud’ok mi. 4Agi djib’eregi yam batod’a: Ti ni ngola, wani simet ma ngolâ nga mi tanad’u. Hina pî, pirau ma gorâ nga mi d’ob’ot ata yima sama djang batod’a mi min i kuana. 5Hina mi, sinda ni vama gor ma aduk hliu tad’ina, wani nga d’i dahlena ngola.
Ar agi djib’eregi yam aku d’a ngiyeû d’a nga d’i ngal agu d’a ngola. 6Sinda ni d’igi akud’a na. Ndat ni duniya d’a tchod’a, ti nga naduk hliu teya, nga d’i mbud’um ndjendjed’a pet. Nga d’i ngalei ari meid’a woi pet kaku d’a tcholï Jahanamid’a. 7Andjaf amburei suma abageina pet kazureina kaluweina kahle suma dramba ki kulufâ, suma a nga ngomoziya, a ngomozi adjeu mi. 8Wani sama ndak á ngom sindina nga d’i. Ni tcho d’a ndak á ngopa d’uo d’a, ti nga oîd’a ki kuma ma tchi matna. 9Ni ki ndad’u, ei nga lei mersi mi Salad’a Abuya; ni ki ndad’u, ei nga gei suma Alona mi lazi d’igi mam na na vuna. 10Nata vun ma tu máma ba ei nga lei mersi mAlona, ei nga gei ki suma vuna mi. B’oziyona, ar agi lagi ahle ndazina hina d’i. 11Na ni mbiyo ma adjib’etna ki ma aglarâ a ndak á lau ata yima tuna zu? 12B’oziyona, na ni tuluma mi ndak á vut olifâ zu? D’oze guguzlud’a ti ndak á vut tuluma zu? Hina mi, golong nga azulora ti ndak á lau mbiyo ma adjib’etna d’uo mi.
Ne d’a tcholï akulod’a
13Sama ne ma wad’u ma adigagina ni nge ge? Ar mi tak sun mam mba djivid’a woi ki tit mamba ki ge yam mba kä d’a woi ki ned’a. 14Wani le yungôr ma tchona ki huneîd’a a nga kurugiya ni, ar agi suburugi tagi yam gagazid’a d’i, agi kagi zlad’a kat tuo mi. 15Ne d’a hina d’a ti tcholï nakulo d’i; ni ned’a hi duniyad’id’a, ni djib’era hi sanid’a, ti tcholï nata Diable. 16Wani ata yima yungôr ma tchona ki huneîd’a a nga kuana, batranga kandjaf tcho d’a tetenga a nga kua mi. 17Sama Alona mi hum ned’ina ni sama yed’etna avogo. Bugola, ni sama halasâ, ni sama lulumana, ni sama djivina, ni sama we hohowa sumina, ni sama nga mi le sun nda djivid’ina, ni sama bei ka ira, ni sama bei lop ira mi. 18Suma a nga min b’leng nga halasina, a nga zarî b’leng nga halasa, a mba dut ni d’ingêra mi.
Currently Selected:
Jacques 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.