2 Amuleina 25
25
HLED’A HI JERUSALEM-MBA
(25.1-30)
Nebukanezar mi mba ngui Jerusalem á durâ
(Gol Jer 39.1-7; 52.3-11)
1Kur biza d’a zlengâ d’a Sedekiyas nga mi tamulid’a, kur bur ma dogona hi til ma dogonina, Nebukanezar amul ma Babilon-na mi mba ki azigar mama pet á dur Jerusalem. A vanguvora avorot d’ar, a nguyut tei d’uhl. 2Azì ma ngolâ mi ar nguid’a kä gak biza d’a dogo yam tu d’a Sedekiyas nga mi tamulid’a.
3Bur ma zlengîna hi til ma fid’ina, baktara d’a ngola ti nde yam suma hur azinina, a nga fe vama te d’i. 4Azigar suma Babilon-na a tcho ir gulumuna hazì ma ngolîna. Suma Juda suma dur ayîna a ring pet, a buzuk kei kur azì ma ngolâ kandjege dangâla ki lovot ta avun agrek ma aduk gulumun ma mbànina, go kasinena hamulîna, a hle lovot ta i Araba-d’a. Ata yi máma azigar suma Babilon-na a nga nguid’a yam azina. 5Azigar suma Babilon-na a dik amulâ Sedekiyas ad’um gak a vumï sä hur ful la Jeriko-d’a. Ata yi máma azigar mama pet a ndjoî woi vivreng, a aramu.
6Suma Babilon-na a vumu, a im mamul ma Babilon-na avo Ribla. Mi kam sariyad’a kam ata yi máma. 7A ngat Sedekiyas groma iram kä na. Bugola, Nebukanezar mi tcho ir Sedekiyas seyo, mi gum kawei ma hleuna aleina asemu, mi im Babilon.
Nebukanezar mi hle Jerusalem. Yo mazi d’a mbàd’a
(Gol Jer 39.8-10; 52.12-30; 2 Sun hAm 36.17-21)
8Kur biza d’a dogo yam zlengâ d’a Nebukanezar amul ma Babilon-na nga mi tamulid’a, kur til ma vahlâ kur bur ma kid’iziyana hi til mámina, Nebuzaradan ma ngolâ hi suma a ngom yina ma kur sunda hamul ma Babilon-nina, mi mba mi kal avo Jerusalem. 9Mi ngal gong nga kud’ora hi Ma didinid’a kazì ma amula kazì ma ding ma Jerusalem-ma pet, mi ngal azì ma nglo ma dingâ woi kakud’a pepet mi. 10Azigar suma Babilon-na pet suma a nga zlapa ki ma ngolâ hi suma a ngom yinina, a hô gulumun ma ngui Jerusalem-ma kä woi ki zla tam pepet. 11Ata yi máma Nebuzaradan ma ngolâ hi suma a ngom yinina, mi yo suma a ar kur azinina ki suma a i ad’u amul ma Babilon-nina zlapa ki suma d’al suma a arâ mi. 12Wani mi he lovota mi suma hou suma aduk suma kur ambasina á ngom guguzlud’a, á zuma mi.
13Suma Babilon-na a kus kawei ma murguli ma mbà ma hleu ma kur gong nga kud’ora hi Ma didinid’ina ki kawei ma hleu ma ad’um kä na ki hal ma ngol ma kawei ma hleuna suma a nga kur gong ndatina woyo, a i ki sed’ezi Babilon pet. 14A yo ahle suma a lazi ki kawei ma hleunina pet suma a nga le sunda ki sed’ezi kur gong ndatina, nala, duguyona, pelâ, anguleina ki kopma. 15Ma ngolâ hi suma a ngom yinina, mi yo andru ma vakud’a ki tazana kagu ma yam buzuna, nala, ahlena pet suma lora ki suma kawei ma hapma. 16Kawei ma murgulina mbà ki hal ma ngolâ ki vama ad’u kä na suma Salomon mi lazi adjeu ki kawei ma hleuna kur gong nga kud’ora hi Ma didinid’ina pet, sana mi ndak á ngazi anek mazid’a d’i. 17Kawei ma murguli ma lara pî, fiyagam mba akulod’a ni metred’a zlengâ. Yam mba a kat djumbid’a ti nga akulo kam mi. Fiyagat ta akulod’a ni metred’a tu ki nusa. A nguyut yam mba djum ndata ki kawei ma abeyabeina ki vud’agu grenatna woi d’uhl. A lazi dja’î ki kawei ma hleuna.
18Ma ngolâ hi suma a ngom yinina mi ve Seraya ma ngol ma ngat buzuna ki Sofoni ma kam á mbàd’ina ki suma hindi suma a ngom vun gong nga kud’ora hi Ma didinid’ina mi. 19Mi ve ma ngol ma yam azigarâ hi suma Juda-nina, mi yo suma vahl suma d’al suma a le sunda mamulâ suma kur Jerusalem-ma, mi ve ma b’ir mbaktumba hi ma ngolâ hi azigar ma mi yo suma azigarîna, mi yo suma Juda-na dok karagaya suma a nga avo Jerusalem-ma, 20mi i ki sed’ezi gen amul ma Babilon-na avo Ribla. 21Amulâ mi tchazi woi ata yi máma yam ambas sa Hamat-ta.
Ni hina ba, a i ki suma Juda-na magomba woi dei kambas mazid’a.
Gedaliya mi te yamba kur ambas sa Juda-d’a
(Gol Jer 40.7—41.18)
22Wani suma Nebukanezar amul ma Babilon-na mi arazi kur ambas sa Juda-d’ina, mi tin Gedaliya Ahikam goroma Safan gorom ngolona á te kaziya. 23Suma nglona ki sum mazina a hum ala: Amul ma Babilon-na mi tin wa Gedaliya á te yam ambasa. Kayam ndata, a i gen Gedaliya avo Mispa. Azi ni Ismael Netaniya goroma ki Johanan Kareya goroma ki Seraya Tanhumet gorom ma Netofa-na ki Jäzaniya ma Mäka-na goroma zlapa ki sum mazina mi. 24Gedaliya mi gunuzi ki sum mazina ala: Agi lagi mandara azigar suma Babilon-na d’i, agi kagagi kur ambasa, agi lagi sunda mamul ma Babilon-na. Hina wani, agi mba kagagi ki djivid’a.
25Wani kur til ma kid’iziyana hi biza ndatina Ismael Netaniya goroma Elisama gorom ngolo ma ad’u andjaf ma amulina, mi yo suma ad’um dogo. A i Mispa, a tchi Gedaliya ki suma Juda-na ki suma Babilon suma a nga avo hatama mi. 26Ata yi máma suma ki zla tazi pet, gugureina ki suma nglona hi azigarîna, a tchol a ring Ezipte abo mandarâ hi suma Babilon-na.
Evil-Merodak mi we hohowa Jojakin
(Gol Jer 52.31-34)
27Kur biza d’a dok hindi yam kid’iziya d’a bugol la a i ki Jojakin amul ma Juda-na magombid’a, Evil-Merodak mi kak amula yam suma Babilon-na. Kur biza d’a avok ka mi tamulid’a, kur bur ma dok mbà yam kid’iziyana kur til ma dogo yam mbàna hi biza ndatina, mi we hohowa Jojakin, mi ndumî woi kur dangeina. 28Mi dum zlad’a ki djivid’a, mi hum yima ngolâ avok amulei suma a nga ki sed’em avo Babilon-na pet mi. 29Mi he vuna mi Jojakin ala ar mi tchuk baru mam ma dangeina atam mbi, ar mi te tena yam tabulâ hamulîna burâ ki burâ, ata yima mi nga ki iram tua na pet. 30Amul ma Babilon-na mi nga mi hum tena burâ ki burâ gak mat mama, ata yima mam nga ki irama pet mi.
Currently Selected:
2 Amuleina 25: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.