1 Samuel 1
1
ELI AZI KI SAMUEL
(1.1—7.1)
Anne i á kud’or Alona avo Silo
1Adjeu sana nga avo Rama yam ahinad’a hi Efraim-mba, a yum ala Elkana Jeroham goroma. Mam mi Suf ma Efraim-ma gorom ngolo ma danana. Suf mi vut Tohu, Tohu mi vut Elihu, Elihu mi vut Jeroham Elkana abumu. 2Elkana mi vik aropma mbà, Anne azi ki Penina; Penina ti nga ki grona, wani Anne ti nga ki gor ri.
3Bizad’a ki bizad’a Elkana nga mi tchol avo Rama á i avo Silo á kud’or Ma didin ma ad’engêm kal petna, á hum ahle suma ngat buzuna mi. Wani Eli ma ngolâ hi suma ngat buzuna mAlonina groma nga mbà; ma hina a yum ala Hofni, ma mbàna a yum ala Fines mi. Azi ni suma ngat buzuna hi Ma didinina avo Silo. 4Wani d’igi Elkana nga mi he he d’a hawa d’a ngat buzuna na, nga mi he hliu ma a ngad’am mAlonina mi Penina azi ki grot suma andjofâ ki suma aropma pet mi. 5Wani mi he mi Anne hliuna ngola kala, kayam mam le kat heî, wani Ma didina mi b’alat gendreged’a. 6Wani Penina nga d’i b’lak Anne hurut teteu, kayam hurut hat yambala Ma didina b’alat gendreged’a d’a. 7Wani bizad’a ki bizad’a ata yima Anne nga d’i i á kud’or Ma didinina, Penina nga d’i zalat hurut hina teteu. Ata yi máma Anne nga d’i tchiya, ti min te tena d’uo mi.
8Ndjuvut mi djobot ala: Anne, ni kayam me ba, ndak tchi ge? Ni kayam me ba, ndak min te tena d’uo ge? Ni kayam me ba, tak tchuk hina susub’ok ke? Na ni an kal nga gro suma dogona irak kuo zu?
9Bugol tena Anne ti tchol i á kud’or Alona. Eli ma ngol ma ngat buzuna mi nga kaka kä avun gong nga kud’ora hAlonid’a. 10Anne nga kur hur ma hata, nga d’i tchen Ma didina ki simina irad’u. 11Ti hlum vunat ala: Ma didin ma ad’engêm kal petna, le ang wan hohou manda gagazi, le ang djib’er kan ang maran nga d’uo, le ang han gorâ ni, an mba ni hangzi á le sun manga ki iram fafat. Wani sa mba mi welem yam mbuo#1.11 sa mba mi welem yam mbuo: Nala, Aduk Israel-lâ sama welem yam mbuo na ni ma a tinim iram vam mAlonina. Gol Ndum 6.5. mi.
12Ata yima ti nga kur tchenda avok Ma didina tua na, Eli nga mi golot vunad’u. 13Mi golot vunat nga mi le mimizek, wani mi hum nga del la de zlad’a d’i, kayam Anne nga d’i tchen ni kurut krovo. Eli mi djib’er ala ti gurut ni ki süma. 14Eli mi dat ala: Ndak gurut ki süma hina gagak ini lara ge? Ndak ar gurut mak ndata woyo!
15Anne ti hulong dum ala: An gurut nga ni gurud’a d’i, an tche nga süm mbuo mi, an natcha d’a hohoud’a, an mba ni ki djib’er manda avok Ma didina. 16Ang golon d’igi an natcha d’a zlat nga d’uo d’a na d’i. An tchen ngola ni kayam pupuluk ka tanda ki hur man ma hata.
17Ata yi máma Eli mi hulong dat ala: Ndak i lafiya; ar Alona hi Israel-lîna mi hak vama ndak tchenem kama.
18Ti hulong dum ala: Ang we hohowa magom manga. Ti ge tat ti iya, ti te tena, hurut mi b’lengâ. 19Tcha yorogod’a Elkana ki sum mama a i grif kä avok Ma didina, a hulong avo hatazi Rama.
Anne ti vut Samuel, ti i ki sed’em avo Silo
Elkana mi zlap kamamba Anne. Ma didina mi hum tchen mata. 20Kur biza ndata, ti ve wirâ, ti vut gorâ, ti yum ala Samuel, nala, An tchenem nabo Ma didina.
21Bugola, Elkana mi i ki sum mama avo Silo á he vama ngat buzuna mi Ma didina d’igi a nga le kur bizad’a teteu na. Mi i ná ndak vun vama mam hle vunam kama mi. 22Wani Anne ti i nga ki ndjuvut ti, ti dum ala: An djup gak gorâ ar apona tua. Bugola, an mba ni i ki sed’em avo Silo á tagam mi Ma didina; mam mba mi ar sä hî ki iram fafat.
23Elkana mi dat ala: Djiviya! Ndak le vama huruk minima, ndak kak ka hî gak gorâ mi ar apona tua. Ar Ma didina mi ndak vun vun mak ma hled’a. Anne ti ar kaka Rama á he gorotna apona.
24Ata yima ndat aram bei haponina, ti i ki sed’em kur gong nga kud’ora hi Ma didinid’a avo Silo. Azi ki ndjuvut a vamuhl ma bizam hindina#1.24 amuhl ma bizam hindina: Kur mbut ta dinga a dala: Amuzleina hindi., a hlafuta go ki kilona dok mbà yam mbà, a hle süm guguzlud’a agela tu. 25Azi ngat amuhl máma buzuna mAlona. Bugol azi i ki gor máma mi Eli. 26Anne ti dum ala: Salana, ang tang ki irang wana, an natcha d’a ni tchol kambei ka hî geveng á tchen Ma didinid’a. 27Wana ni gor ma an tchenem aboma, mi handji wana. 28Kayam ndata, an hum mi Ma didina ki iram fafat; mam arî mama. Azi grif kä avok Ma didina, a kud’uromu.
Currently Selected:
1 Samuel 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.